Luka 21

Yoovelleella ya naamukhwelle

(Mrk 12.41-44)

1Yesu awehilleeye wa athu yamwaapheenllaayo aawoona athu eeyuuma yaari mu enyumba ya Mulluku emorihellaka moosungellamo ddoovelleella ddiwa. 2Vano aamoonattho naamukhwelle oohoowa avokhellakamo asimakobiri meelli. 3Nave Yesu aallota wi, “Ddawoona, kinimuulleellani wi, naamukhwelle oohoowooyo sika amorihellemo ddinchichi ohiyana ni attheenaayo. 4Vawi amoddaayo yaavelleella moollikana ni nnddo yavahullalliiwa va eyuumiiwa koma olliyoolla ni ohoowa wayenngu, oovelleella ddittheddene aariiyena wi achelleke.”

Dda okumulliwa wa enyumba ya Mulluku

(Mat 24.1-2; Mrk 13.1-2)

5Amodda yaanallota dda enyumba ya Mulluku wi yaamakiwa ni malluku oophwanelliwa phaama ni oreerihiwa ni ddoovelleella dda wa Mullukunndde. Vano Yesu aallota wi, 6“Ddittheddene munooneenyundda, mallapo eneerophiya awi khavikhalla nlluku naari nimodda va nikhwaaye nihinaamorihiwe.”

Ddookatamiha ni ddoohoosa

(Mat 24.3-14; Mrk 13.3-13)

7Amodda yaamukoha Yesu wi, “Ahuddihi, ddineereye niini ddenndda? Echizindikiro yawi enthaweeyo yookwakhwana enaakhalle yawiidde?”

8Yesu ahaalleella wi, “Chenjerani wi muthu ahiwoottottheni. Vawi athu anchichi eneerophiya mu nnddina naka ni ollota wi, ‘Mi tti Mesiya,’* nave ‘Enthawi yookwakhwana’ koma muhaathware. 9Nyuwaano mwiiwa dda ekhoto ni owana, muhinahoowa m'murimani mwanyu vawi tti ddoophwanella wi ddeereye koma emallihello khenaphiye.”

10Ahaalleellattho wi, “Mutundu ni mutundu mmodda oneerekowana navettho omwene ni omwene omodda oneerekowana.” 11Navettho oneerokhalla ezivomerezi ddawoopiha owaaka ettalla ni millilli m'mapuroni moohiyanahiyana. Oneerokhallattho ddeko ddawoopiha ni ezizindikiro dduullupalli oddullu. 12Koma ddihineereye ddittheddenenndda, muneerohoosiwa ni omakiwa, muneerewiipiwa millatu mu enyumba ddamavekello* ni ohiyiwa mundende. Muneerovelleelliwa wa mamwene ni oolamulella kaambiiwa nyuwaano tti oohudderaaka. 13Yoolla onaakhalle mpataanyu wawi mwakhalle amboni a othenga waphaama. 14#Luk 12.11,12Dduwellani, muhinakhupanya muhinaphiyewo wi munaaye mwallote tini wi mwiiteteze. 15Vawi kineerewuuvahani yoollota ni ezeru ddawi naari adanaanyu khewora okhoota apaalle wuuvaanyihani. 16Makhollwaanyu, asinninyu, abalaanyu ni akhwiinyu, eneerewuumakani nave amoddanyu eneerowiiphani. 17Athu attheene eneerowiitani kaambiiwa nyuwaano tti oohudderaaka. 18Koma khaniwa nitathiyavo naari neehi nimodda na murwaanyu. 19Kaambiiwa mwavillella muneerewaakhella okumi woohimalla.

Yesu anallota dda woonongeya wa Yerusalemu

(Mat 24.15-21; Mrk 13.14-19)

20“Mwamoona Yerusalemu aapheelliwe ni akhoto a adani, dduwellani wi okumulliwa waye wohaatamella. 21Vano ayo eri o Yudeya ethawelle omiyaangoni nave ayo eri m'muzindani ekhumemo nave ayo eri m'matani otte wa muzinda ehivollowemo. 22#Hos 9.7Vawi enaakhalle mallapo oohokollosellana wi ddittheddene ddalembiwe mu mawu a Mulluku ddikwakhwanihiwe. 23Enthawi yeeyo ootulli enaakhalle atthiyana ayo enaakhalle ni erukullu vamodda ni awaamwiha anamwani! Vawi oneerokhalla ohoosiwa wawoopiha mu ellapo yeella ni ollaka wa Mulluku va athu a mu ellapo yeella. 24Amodda a yaayo eneerewiiphiwa ni masupada, amodda a yaayo eneerophariwa okaporo oya ellapo ddinchichi ddoohiyanahiyana. Nave Yerusalemu aneerewoonongiwa ni athu oohimullapella Mulluku ophiyera enthawiiwa emanlle.

Owa wa mwaana a muthu

(Mat 24.29-31; Mrk 13.24-27)

25 # Yes 13.10; Ezk 32.7; Yow 2.31; Yaw 6.12,13 “Vineerokhalla ezizindikiro vanndduwani, vamweerini ni vatheneerini. Nave va ellapo yavatthi, orive mutundu wa athu oneerohoosiwa ni ohalleellihiwa yaweera ekaamba ya oruma wa ephevo ya va enyanja. 26Athu eneerongomowa ni woova, etiyerellaka nnddo ddinaaweereye va ellapo yavatthi kaambiiwa masiva a muddullu eneerotikhiwa. 27#Dan 7.13; Yaw 1.7Vano mi, Mwaana a Muthu, kineerewooneya kiwaaka vamiraponi ni masiva muullupalli ni ntitimiho. 28Vano ddeko ddenndda ddaawaambaka weereya, venyani wehani muddullu vawi woopolliwa wanyu wohaatamella.”

Mahuddero a muteekho wanamukuyu

(Mat 24.32-35; Mrk 13.28-31)

29Vano aallota niphwanaphwaniho wi, “Ganizerani dda muteekho wanamukuyu ni miteekho ddittheddene. 30Enthambi ddiwa ddaamba ophuwa makukhu, munnadduwella wi ellimwe yohaatamella. 31Emoddamoddave yeeyo nyuwaano mwawa moona ddenndda dduwellani wi omwene wa Mulluku wohaatamella. 32Ddawoona, kinimuulleellani wi ddeko ddenndda ddineereweereya athu a mbadoolla amodda ehinakhwe. 33Oddullu ni ellapo yavatthi ddineeromalla koma mawaaka khemalla. Ddaaphuwaka makukhu anaanweene munnadduwella wi ellimwe yohaatamella.

34“Chenjerani wi mirima ddanyu ddihikondeke wiichellachella ni owirya ddoolezeliha navettho oviheeriwa ni dda va ellapo wi nllaponno nihuuphiyereni moorurumusa wonanko musampha. 35Vawi nineerewaaphiyera athu attheene ookhalla va ellapo yavatthimva. 36Chenjerani enthawi ddittheddene, muvekellaka wi muwore ovulluwa mu ddeko ddittheddenenndda ni wiimella vamiitthoni va mi, Mwaana a Muthu.”

37 # Luk 19.47 Mallapo mattheene Yesu aanahuddiha mu enyumba ya Mulluku koma mahiiyu aanakhalla va mwaango wa Olivi. 38Nave ohinase athu attheene yaanawa mu enyumba ya Mulluku wi emwiiwelle.

Currently Selected:

Luka 21: MW2019

Highlight

Copy