Luka 14

Yesu anamuchiriha muthu oovoriiwa

1Va nllapo na Sabata Yesu aaya o enyumba ya mmodda a attekweene a Afarisi* wi ache nave yaamweetellella. 2Vano muthu oovoriiwa ereta yawiipa meto ni miwono aawa wa Yesu. 3Yesu ahaakoha ahuddihi a malamulo* ni Afarisi wi, “Malamulwaahu ennaakhullella omuchiriha muthu va nllapo na Sabata?”

4Koma alliwaayo yaamaalleya. Vano Yesu aamukusa muthoolle amuchiriha nave aamulleella wi avenyevo. 5#Mat 12.11Nave ahaakohattho wi, “Ttaani a nyuwaano ari ni mwaana amorenlle apaalle eng'ombe emorenlle mwiihimeni va nllapo na Sabata, khawa amukhumihamo apaalle ayikhumihamo enthawi yeeyo va nllapo na Sabata nenno?”

6Athwaalle kheyaaworille omwaakhulla.

Wiiyeviha ni owaakhella alleto

7Yesu awoonilleeye athu ayo yiithaniwe wi achena etthoollaka mipando ddoolemu, ahaallotella niphwanaphwaniho wi, 8#Miy 25.6,7“Mwaneena a okwati awiithana omachellelloni, ohitthoolleke okeraatthi vampandoni woolemu kaambiiwa apaalle mwaneenooyo aamwiithana muthu oolemu ookhwaranya weyaano. 9Sika mwaneena awiithanilleni attheenenyu aneerollota wa weyaano wi, ‘Mvahe muthoolla mpandwaawo.’ Nave vookitthani wi wakeraatthi vatthi oneerowulliwa muru. 10Koma wiithaniwa, khawe wakeraatthi vatthi vawi mwaneena awiithanooyo aneerollota wi, ‘Mukhwaaka, khawe wakeraatthi vampandoni valle,’ Ddenndda ddineereweeriha wi ovahiwe olemu vamiitthoni va athu attheene ewiille va machellellomvo. 11#Mat 23.12; Luk 18.14Vawi attheene enaddunnuwiha weekhiiwa eneeroyevihiwa nave ayo eniiyeviha weekhiiwa eneerewunnuwihiwa.”

12Nave Yesu aallota wa muthu amwiithanillooyo wi, “Waavahaka yoocha yootthaana apaalle yamisikuwa ohiwiithaneke akhwaawo apaalle abalaawo apaalle a nlloko nawo apaalle awaatamanana eeyuuma vawi ni alliwattho eneerowiithana wi yuuhokolloselle. 13Waakhozaka machellello, owiithane oohoowa, oorakalla, ookhwa meto, oohoona. 14Vano oneerokhalla muthu oodalisiwa kaambiiwa khewora wuuhokollosella koma Mulluku sika anuuhokolleselle va nllapo nno athu oolungama eneeriiwa evenyihiwe wa ookhwa.”

Niphwanaphwaniho na machellello uullupalli

(Mat 22.1-10)

15Mmodda a athu ayo yacha ni Yesu iiwalleeye mawaalla aallota ni Yesu wi, “Oodalisiwa tti muthu anaawe akhallevo vamachellelloni mu omwene wa Mulluku.”

16Yesu aallota wi, “Waakhalla muthu mmodda akhozille machellellwaaye uullupalli, aawiithana athu anchichi. 17Ekwakhwanne enthawi ya machellello, aamuruma mullupa muttekwaaye wi aalleelle alleto awiithaniwaalle wi, ‘Waawoni, ddeko ddittheddene ddohiithwa!’ 18Nave athwaalle mmoddammodda yahaamba ollota ddookhupanya ddiwa. Awaamba aallota wi, ‘Tti okulla wene emataaka, vano kinaphwanella kayoone, sika akhullellani okhupanya waka.’ 19Mmoddooyo aallota wi, ‘Tti okulla wene eng'ombe ddaka ddoollima khumi, vano kinaaka keesere ollimana, sika akhullellani okhupanya waka.’ 20Mmoddooyottho aallota wi, ‘Ttuutthella wene, sika ekaamba ya yeeyo ngiwora owa.’ 21Mullupa muttekoolle aahokollowa nave aalleella ddittheddene apwinnyaalle. Vano apwinnyaayo yaasha murima emulleella mullupa muttekoolle wi, ‘Akuva, khawe omisewuni ni o ettilla dda etawoneella nave waweena athu oohoowa, oorakalla, oohoona ni ookhwa meto.’ 22Nave mullupa muttekooyo awiithanille athwaayo aallota wi, ‘Apwiya, mwaakilamulalleenyu koheera koma enyumbeeyo kheddanlle.’ 23Nave apwinnyaalle yaamulleellattho mullupa muttekoolle wi, ‘Khawe omisewuni ni ettilla dda otte wa etawoneella nave waawatihere athu wi ewe ophiyera enyumbaakeella eddanlle. 24Kinimuulleellani wi khaavo naari mmodda awiithaniwaalle oyo anaallawihe machellellwaakaalla.’ ”

Ddoophwanelliha wi okhalle oohuddera

(Mat 10.37-38)

25Mulloko wa athu anchichi waamuthwara Yesu, vano aarukunuwa allota wa athwaayo wi, 26#Mat 10.37“Muthu aapaallaka okhalla oohudderaaka akikondeke miyaano ohiyana ni attiitthinnya ni amennya, mwaariye ni anaaye, asinne ni arokoriye naari okumaayeene. 27#Mat 10.38; 16.24; Mrk 8.34; Luk 9.23Ayo ehinatukhulla mutandiiwa ekithwara miyaano khenaphwanella okhalla oohudderaaka.

28“Ttaani a nyuwaano apaalla omaka enyumbaaye yootthinddaanyerana khanaamba akeraatthi nave eerengella makobiri wi oone aari arina ookwakhwanella omalliha muttekooyo? 29Waaheera ddenndda nave waahiwora omalliha omaka enyumba yeella otthattille matthipello, athu vawoonani ddenndda eneerewuuttheya. 30Eneerollota wi, ‘Muthu yoolla ahaamba omaka enyumbaaye koma khawonre omalliha mutteko yoolla!’

31“Ttaani mwene anaya okhotoni wi awane ni mukhwaaye, ahinaambe okeraatthi aganizera wi awoone akhotwaaye 10,000 yaarimi eri ookwakhwanella owana ni akhoto a mmoddoolle, ayo eri 20,000? 32Vano oona wi khawora owanana ari voorekamellana aneeromuruma muthu wi akumane ni mmoddoolle wi aveke murendelle.” 33Yesu aamalliha ollota ni mawu awi, “Khaavo a nyuwaano anaawore okhalla oohudderaaka ahinahiye ddeko ddittheddene ariiyena.”

Mwiinyu wootthulluwa

(Mat 5.13; Mrk 9.50)

34“Mwiinyu tti waphaama koma watthulluwa khoweerihiwattho wi oddiveke. 35Khokhallattho waphaama owuhella m'matani wonanko manyowa koma owutathilla. Ngiiwani vano mwaarina maaru awiiwana!”

Currently Selected:

Luka 14: MW2019

Highlight

Copy