Luka 13

Orukunuwa murima apaalle okhwa

1Va enthawi yeeyo waari athu amodda ayo yawiille wa Yesu, emulleellaka dda Agalileya ayo yiiphiwe ni Pilato eheraatthiki mukutho wa Mulluku. 2Yesu ahaakoha wi, “Muneesa wi Agalileyaayo yaari oochimwesesa ohiyana ni Agalileya attheene kaambiiwa yiiphiwe mwawi ddiidda? 3Iyaayi koma kinimuulleellani wi mwaahirukunuwa murima nanyeenettho muneerokhwa wonanko yaayo. 4Nave muneesa wi athu 18 yaphittiwe ni enyumba yootthinddaanyerana yakumuwalle o Shilowamu mu Yerusalemu, yaari oochimwa ohiyana ni athu attheene ookhalla o Yerusalemunko? 5Iyaayi koma kinimuulleellani wi mwaahirukunuwa murima nanyeenettho muneerokhwa wonanko yaayo.”

Niphwanaphwaniho na muteekho wanamukuyu woohimma

6Yesu ahaalleella niphwanaphwaniho wi, “Waakhalla muthu mmodda oyo aari ni muteekho wanamukuyu oyo waalliwe m'matani mwaye mwa ezipaso ddampesa. Aaya wi aashemo ezipaso ddanamukuyu koma khaaphwanyillemo. 7Vano aallota wa oomullimella wi, ‘Ngoona, miyakha miraru ddoomalla kiwaaka wi kaashe ezipaso ddanamukuyu ohiphwanyamo, uhavo! Okhallekeve onanarihaka ethaya kaambiiwa tini?’ 8Oomullimelloolle ahaakhulla wi, ‘Apwiya, uhiyeni muyakha mmoddave yoolla, kineerowukatella mukhwipimmo kihellemo manyowa. 9Vano muteekhoolla wimma muyakha woosiisello, ddaphaama koma waahimma, oneerewuuhiwavo.’ ”

Yesu anachiriha va nllapo na Sabata

10Va nllapo na Sabata Yesu aanahuddiha mu enyumba yamavekello. 11Mwemmo mwaakhalla mutthiyana ookhalla ni munepa woonanara, oyo wamweeriha wi avoriiweke wa miyakha 18. Aari ookhoromana mutthana wawi khaawora wiimella mowookowa. 12Yesu amoonilleeye, aamwiithana allota wi, “Moowe, moottaphulliwa o eretaanyu!” 13Vano ahiiyaatthi mattaaye va olliyooyo nave enthawi yeeyo ahookowa iimella, amutitimiha Mulluku.

14 # Eks 20.9,10; Deu 5.13,14 Vano muttekweene a mu enyumba yamavekello mulle aasha murima kaambiiwa Yesu aachiriha va nllapo na Sabata nave ahaalleella athu attheene wi, “Vookhalla mallapo matthanu ni nimodda oowaakhullelliwa ophara mutteko, muweeke mallapo yaalla muchirihiweke, ohikhalla va nllapo na Sabata!”

15Apwiya yahaakhulla wi, “Awoottha nyu! Khe nyuwaano munattaphulla eng'ombe ddanyu apaalle abulwaanyu vamukweeni muyaakana wowaawiryiha maaddi va nllapo na Sabata? 16Nave ollattho nayeene tti edduullu ya Abrahamu oyo amakiwe ni Satana wa miyakha 18. Vano ahittaphulliwe va nllapo na Sabata?” 17Waakhulla wonngu wahaawulliha muru adanaaye attheene koma athu amodda attheene yaahakallalla ni ddeko ddittheddene ddoottikhiniha eerilleeye.

Niphwanaphwaniho na mmiddo wooyevesesa

(Mat 13.31-32; Mrk 4.30-32)

18Yesu ahaakoha wi, “Omwene wa Mulluku tti wonanko tini? Nave omwenooyo kinawuuphwanaphwanihe ni tini? 19Tti wonanko mmiddo wa muteekho wa masitadi oyo muthu awumiddalleeye m'matani mwaye. Wahunnuwa okhalla muteekho muullupalli nave epallame ddinnamaka emphuru ddiwa mu enthambi ddaye.”

Niphwanaphwaniho na yisiti

(Mat 13.33)

20Yesu aallotattho wi, “Omwene wa Mulluku kinawuuphwanaphwanihe ni tini? 21Tti wonanko yisiti oyo mutthiyana aamuttakanyihereeye ni othu wa tirigu munchichi ophiyera waafufuma muttheene.”

Mullako mung'onong'ono

(Mat 7.13-14,21-23)

22Yesu aheeta m'matawoni ni m'mizi aahuddihaka athu voolendonaaye wooya o Yerusalemu. 23Muthu mmodda aamukoha wi, “Apwiya, oovullusiwaayo enaakhalle athu ooyevave?” Yesu aawaakhulla wi, 24“Mullipihelle ovollowella va mullako mung'onong'ono kaambiiwa, kinimuulleellanithi wi athu anchichi eneereweesa ovollowellavo koma khewora. 25Vano mwaneena a enyumbeeyo aneerowalla o mullako nave amodda a nyuwaano muneerewiimella vaatte, mookothaka vanchiwini mullotaka wi, ‘Apwiya, nihullelleni.’ Olliye aneerewaakhulla wi, ‘Nginuudduwellani. Munavenyera wuuwi?’ 26Nave muneerewaakhulla wi, ‘Hiyaano naacha nave naawirya vamodda ni nyuwaano nave mwaahuddiha etawoni yoowanihu!’ 27#Mas 6.8Aneerollotattho wi, ‘Nginuudduwellani. Munavenyera wuuwi? Mukivenyerevo, attheenenyu athu oonanara!’ 28#Mat 8.11,12; Mat 22.13; 25.30Vano muneerewinlla ni okhuuriha miino voowoonani makhollwaahu, Abrahamu, Isaki ni Yakobo ni anamallotella attheene mu omwene wa Mulluku. Nyuwaano muvokhiwe vaatte. 29Athu eneerovenyera wookhuma nndduwa ni woovollowa nndduwa, ompoto ni omwera nave eneerocha va machellello mu omwene wa Mulluku. 30#Mat 19.30; 20.16; Mrk 10.31Nave anchichi ayo eri awaamba eneerokhalla ookomihera nave ayo eri ookomihera eneerokhalla awaamba.”

Yesu aninllella muzinda wa Yerusalemu

(Mat 23.37-39)

31Enthawi yeeyo Afarisi* amodda yaawa wa Yesu ellota wi, “Muvenyewo wuno muye waamodda wene kaambiiwa Herode* anapaalla awiipheni.”

32Yesu ahaalleella wi, “Khaweni mwamulleelle khatwe, Herode wi kinaakhumihe minepa ddoonanara ni waachiriha athu ollello ni osiisello nave omuroto kineeromalliha muttekwaaka. 33Navettho kinaphwanella kikhwaranyeke voolendonaaka ollello, osiisello ni omuroto vano kaambiiwa khe waphaama wi namallotella akhwe otte wa Yerusalemu.

34“Yerusalemu, Yerusalemu! Athwaawo ennawiipha anamallotella nave ennaavokha malluku owiipha athu yarumihelliwiiwa ni Mulluku! Tti mallapo makavi kapanlleemi waakhupaarella athwaawo attheene wonanko mwanakhu anaakhupaarelleeye asaanaaye vatthi va muuphellwaaye koma nyuwaano khamwaapanlle. 35#Mas 118.26Vano muzindaanyu oneerohiyiwa moohikhalla ello. Kinimuulleellani wi waambeella vano ophiyera muhoollo khamuwa mukoonattho, ophiyera muneerollota wi, ‘Oodalisiwa tti oyo anawa mu nnddina na Apwiya.’ ”

Currently Selected:

Luka 13: MW2019

Highlight

Copy