Yohane 9
9
Yesu anamuchiriha muthu oohoona
1Nave Yesu eeteeye m'musewuni aamoona muthu oohoona eyariwellwaaye. 2Oohudderaaye yaamukoha wi, “Ahuddihi, achimwalle ttaani wi muthu olla ayariwe oohoona, olliyoolla apaalle attiitthinnya ni amennya?”
3Yesu ahaakhulla wi, “Khe wi muthu olla aachimwa apaalle attiitthinnya ni amennya koma ayariwe oohoona wi mitteko dda Mulluku ddooneye mwa olliye. 4Ninaphwanella weera mitteko dda yooyo aakirumalle miyaano ori otthaana. Mahiiyu onimawa nave vano khaavo muthu anaawore ophara mutteko. 5#Mat 5.14; Yoh 8.12Miyaano vookhallani mu ellapo yavatthi, kiri owala wa ellapo yavatthi.”
6Aallotilleeye nndda aattaphera vatthi eettheya ethaya ni maraalle nave amara matokwaayo vaddullu va miittho a muthooyo, 7nave aamulleella wi, “Khawe wasuusulle owiitthoninko mu nthiya na Shilowamu.” (Ottaphullella wi, Oorumiwa.) Sika muthoolle aayaawo asuusulla owiitthoni waye nave aawaawo oonaka.
8Vano akhwaaye ni athu yamonne khalle wi aari oovekaveka yaallota wi, “Ethiyo khe yoolle aakeraatthi vatthi avekavekaka?”
9Amodda yaallota wi, “Tti yooyo.” Nave amodda yaallota wi, “Khe olliye koma animoonophwanaphwanana.”
Sika muthoolle yeekha aallota wi, “Tti meene.”
10Yaamukoha wi, “Vano ddiworeyille mwawiidde wi wooneke?”
11Ahaakhulla wi, “Muthu ooromolliwa Yesu aheettheya ethaya amara vaddullu va miitthwaaka nave akilleella wi kiye o Shilowamu kasuusule owiitthoni waka. Sika kaayaawo kasuusulla nave kahoona.”
12Yaamukoha wi, “Ari wuuwi yooyo?”
Ahaakhulla wi, “Nginadduwella.”
Afarisi enamukohesesa muthu achirihiwoolle
13Muthu olle khalle aari oohoona aakuselliwa wa Afarisi.* 14Nllapo nno Yesu eettheyilleeye ethaya ni omuchiriha oohoonoolle naari nllapo na Sabata. 15Vano Afarisi yaamukohattho muthoolle wi, “We woonillettho mwawiidde?” Nave ahaakhulla wi, “Aheettheya ethaya amara vaddullu va miitthwaaka, kaasuusulla owiitthoni waka vano kinnoona.”
16Amodda a Afarisi yaallota wi, “Muthu amuchirihalloolla khe oovenyera wa Mulluku kaambiiwa khanathwara malamulo a nllapo na Sabata.”
Koma amodda yaallota wi, “Muthu oochimwa ttuuwora mwawiidde weera ddoottikhiniha ddawi ddiidda?” Nave waari ovaanyihana mwa yaayo.
17Sika Afarisi yaamukohattho wi, “Onallota wi ahuuchiriha ohoona wawo, vano weyaano onallota tini dda olliyoolla?”
Muthoolle ahaakhulla wi, “Tti namallotella.”
18Attekweene a Ayuda* kheyaakhulupililalle wi aari oohoona nave wi vano ohoona ophiyera yaawiithana makhollwaaye. 19Yaakoha wi, “Olla tti mwaninyu munalloteenyu wi aayariwe oohoona? Vano yeereyille tti tini wi ooneke?”
20Makhollwaaye yahaakhulla wi, “Ninnadduwella wi olla tti mwanihu ni wi aayariwe oohoona. 21Nave khaninadduwella wi anawora woona mwawiidde nave khaninamudduwella oyo amuchirihalle. Mukoheni, ohunnuwa, aneerowaakhullani yeekhaaye.” 22Makhollwaayaayo yaallotille ddenndda kaambiiwa yawoova attekweene a Ayuda vawi Ayudaayo yahiiwanana khalle wi arive muthu oyo anaallote wi annakhulupilila wi Yesu tti Mesiya* ahaakhullelliweke ovollowa mu enyumba yamavekello 23Ella sika ekaambiiwa makhollwaaye yallotille wi, “Olliye ohunnuwa, mukoheni!”
24Vano yaamwiithana wiilli muthoolle khalle aari oohoona ellota wi, “Llupella vamiitthoni va Mulluku, ninnadduwella wi muthu uuchirihalloolla tti oochimwa.”
25Muthooyo ahaakhulla wi, “Nginadduwella aari muthu oochimwa apaalle iyaayi. Koma ello emodda kinadduwelleemi tti yawi, kaari oohoona koma vano kinnoona.”
26Yaamukoha wi, “Aaweerenlle weyaano tini? Uuchirihalle mwawiidde?” 27Vano ahaakhulla wi, “Kohuulleellani khalle koma khamwiiwalle. Munapaallella tini wiiwattho? Apaalle nanyeenettho munapaalla okhalla oohudderaaye?”
28Yaamunyaambusa ellota wi, “We tti oohudderaaye koma hiyaano tti oohuddera a Mose. 29Ninnadduwella wi Mulluku aallota ni Mose koma dda muthu yoolla khannadduwella anavenyereeye.”
30Muthoolle ahaakhulla wi, “Ddinnanittikhinihathi ddenndda, nyuwaano khamunadduwella nko anavenyereeyewo komave aakichiriha. 31Ninnadduwella wi Mulluku khanawiiwellella athu oochimwa. Koma muthu mmodda aamullapellaka Mulluku nave aneera opaalla waye vano Mulluku annamwiiwellella. 32Waambeella ephatuwello ya a ellapo yavatthi khaddiniiweyeke wi muthu mmodda oomooniha muthu oohoona eyariwellwaaye. 33Muthu yoolla aariki oohivenyera wa Mulluku khaawore weera ello yeella.”
34Yaamwaakhulla wi, “We waari khalle oochimwa wayariweewe. Nave weyaano ttuunihuddiha hiyaano?” Vano kheyaamwaakhullenlle ovollowa mu enyumba yamavekello ovenyera nllapo nenno.
Oohoona wa m'murimani
35Yesu iiwalleeye ddeereyillennddo, aamuphwanya muthu achirihiwoolle nave aamukoha wi, “We onnakhulupilila mwa Mwaana a Muthu?”
36Muthoolle ahaakhulla wi, “Killeelleni, ttaani yooyo wi kakhullupilile mwa olliye!”
37Yesu aallota wi, “Woomoona khalle nave tti yooyo anallota ni weyaano.”
38Muthoolle aallota wi, “Apwiya, kinnakhulupilila.” Sika aamukokhorella Yesu.
39Yesu aallota wi, “Kaawa mu ellapo yavattheella wi keeruze wi ayo ehinoona yoone nave ayo enoona ekhalle oohoona.”
40Afarisi amodda yamwaatamenlle yaamwiiwa alloteeye ddenndda nave yaamukoha wi, “Hittho khaninoona?”
41Yesu ahaakhulla wi, “Mwakhanlleke oohoona, khamwaakhalle ni mullatu ekaamba ya machimo. Koma vano kaambiiwa munallota wi munnoona, mullatwaanyu wookhallavove.”
Currently Selected:
Yohane 9: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.
