Yohane 8

Mutthiyana aaphariwe araruwaka

1[Nave Yesu aaya o mwaango wa Olivi. 2Osaka wene ohinase aahokollweella o enyumba ya Mulluku. Athu attheene yaatthukumana moomwaapheella nave akeraatthi aamba waahuddiha. 3Ahuddihi a malamulo* ni Afarisi* yaawaana mutthiyana oophariwa araruwaka nave yaamwiimesa variyari viwa. 4Yaamulleella Yesu wi, “Ahuddihi, mutthiyanoolla aaphariwa araruwaka. 5#Lev 20.10; Deu 22.22-24Mu malamulwaahu Mose aalamulella wi mutthiyana awi ddiidda iiphiwe voomuvokhani malluku. Vano nyuwaano munihina tini?” 6Yaallotille ddenndda wi emweese Yesu wi emphwanyelle mullatu woomuvaanyihera. Koma Yesu aawaramella vatthi analemba vatthi ni eyaallaaye. 7Vano yavirellelliiwa omukoha ahiinuwa allota wi, “Aarivo mmodda a nyuwaano ahinachimweke waambeella khalle aambe omuvokha nlluku.” 8Eerille nndda aawaramattho analemba vatthi. 9Nave yiiwalliiwa nndda yaavenyavo mmoddammodda waambeella ni attekweene. Yesu ahaanllevo yeekhaaye nave mutthiyanoolle iimenlle vaavo. 10Ahiinuwa allota wa olliyooyo wi, “Mutthiyana we, eri wuuwi yaalle? Khaavo mmodda ahanlle wi awiipe mullatu?”

11Ahaakhulla wi, “Khaavo.”

Yesu aallota wi, “Nameenettho nginawiipa mullatu. Rowa koma ohichimwe wiilli.”]

Yesu, owala wa ellapo yavatthi

12 # Mat 5.14; Yoh 9.5 Yesu aallotattho wi, “Mi tti owala wa ellapo yavatthi. Oyo anakithwara miyaano aneerokhalla ni owala woovaha okumi nave kheetattho mwiipiphini.”

13 # Yoh 5.31 Afarisi yaallota wi, “Oniivelleellella omboni weekhaawo, sika ombonaawo tti woohiroromelleya.”

14Yesu ahaakhulla wi, “Naari kiivelleellellaka omboni meekhaaka, ombonaaka tti woororomelleya kaambiiwa kinnadduwella nko kinavenyereemi ni nko kinayeemi. 15Nyuwaano muneeruza wonanko mmo athu eneeruzelliiwa koma miyaano nginamweeruza arive muthu. 16Koma kaarimi keeruzaka, echiweruzwaaka tti yawoona kaambiiwa khe miyaano meekhaaka kineeruza koma miyaano ni Attiitthaaka ayo yaakirumalle. 17#Deu 19.15Nave ddoolembiwa m'malamulwaanyu wi omboni wa athu eelli tti woororomelleya. 18Miyaano kinniivelleellella omboni meekhaaka nave Attiitthaaka ayo yaakirumalle miyaano tti ombonittho.”

19Vano yaamukoha wi, “Attiitthaanyu eri wuuwi?”

Yesu ahaakhulla wi, “Khamunakidduwellesesa miyaano naari Attiitthaaka. Mwaakidduwelleseseke miyaano, mwawerewaadduwellattho Attiitthaaka.”

20Yesu aallotille nndda ahuddiheeye mu enyumba ya Mulluku vakhuviru ni moosungellamo ddoovelleella. Nave khaavo muthu amphanre kaambiiwa enthawaaye yaari ehinaphiye.

Khamuwora oyaawo nko kinayeemi

21Yesu aallotattho wi, “Kinimavenyavo miyaano nave muneerokaashaasha koma muneerokhwa ekaamba ya machimwaanyu nave khamuwora oyaawo nko kinayeemi.”

22Vano attekweene a Ayuda* yaallota wi, “Anallota wi khaniwora oyaawo nko anayeeye. Apaalle anaaka addiiphe yeekhaaye?”

23Yesu ahaakhulla wi, “Nyu munavenyera va ellapo yavatthimva nave miyaano kinavenyera oddullu. Nyuwaano tti a ellapo yavatthimva koma miyaano khe a ellapo yavatthimva. 24Sika kahuulleellani wi muneerokhwa ekaamba ya machimwaanyu vawi mwaahikhulupilila wi miyaano tti meene, muneerokhwa ekaamba ya machimwaanyu.”

25Yaamukoha wi, “We ttaani?”

Yesu ahaakhulla wi, “Oyo kuulleelleemini ovenyera vawaamba.#8.25 Oyo kuulleelleemini ovenyera vawaamba: apaalle Kaambiiwa tini kinaallotekeemi ni nyuwaano? 26Kookhalla ni ddeko ddinchichi ddawi killote dda nyuwaano dda wuuvaanyihani. Koma oyo aakirumalle miyaano tti awoona nave kinalleella ellapo yavatthi ddennddove kiiwalleemi wa olliye.”

27Kheyaawiiwesesa wi Yesu allota dda Attiitthinnya. 28Sika aallota wi, “Mwakitthomeya vamutandani mi Mwaana a Muthu, muneerodduwella wi miyaano tti meene. Vano muneerodduwellattho wi ngineera ddeko ni olamulello wa meekhaaka koma kinallota nnddo Attiitthaaka yaakihuddihalliiwa wi killote. 29Nave oyo aakirumalle miyaano ari ni miyaano, khaakihiyalle meekhaaka kaambiiwa kinneera ddennddove ddinamuhakallalliha olliye.”

30Attheene yamwiiwalle Yesu allotaka ddeko ddenndda, yaakhulupilila mwa olliye.

Yawoona eneerewuuttaphullani

31Vano Yesu aallota ni Ayuda alle yaakhulupilila mwa olliye wi, “Mwaasungaka mawaaka m'murimani mwanyu ndithu nyuwaano tti oohudderaakathi 32muneerodduwella yawoona nave yawooneeyo eneerewuuttaphullani.”

33 # Mat 3.9; Luk 3.8 Yaamwaakhulla wi, “Hi niri edduullu dda Abrahamu nave khannakhallekevo akaporo a arive muthu. Munaaka tini voollotani wi, ‘Muneerottaphulliwa?’ ”

34Yesu ahaakhulla wi, “Ddawoona, kinimuulleellani wi, oyo anachimwa tti kaporo a machimwaayo 35Kaporo khanakhalla mmodda a athu a mpa mmo anaphareeyemo mutteko koma mwaana sika anakhalla mmodda a athu a enyumba yeeyo enthawi yoohimalla. 36Sika miyaano mwaana a Mulluku kuuttaphullani, muneerottaphulliwathi. 37Koodduwella wi nyuwaano muri edduullu ya Abrahamu. Naari mupaallaka okiipha miyaano kaambiiwa khamunapaalla osunga mawaaka m'murimani mwanyu. 38Kinallota dda nnddo koonilleemi wa Attiitthaaka nave nyuwaano muneera nnddo mwiiwalleenyu wa attiitthaanyu.”

39Yaamwaakhulla wi, “Attiitthiihu tti Abrahamu.”

Yesu ahaakhulla wi, “Mwaariki anamwani a Abrahamu mwaawerekeweera wonanko mmo Abrahamu eerelleeye.#8.39 Mwaariki anamwani a Abrahamu mwaawerekeweera: Ddoolemba ddimodda ddakhalle ddookhalla ni mawu awi Mwaarimi muri anamwani a Abrahamu erani. 40Koma munapaalla okiipha miyaano, kuulleelleemini yawoona eyo kiiwalleemi wa Mulluku. Koma Abrahamu khaaweerille wonanko nyuwaano! 41Nyuwaano muneera wonanko attiitthaanyu.”

Yahaakhulla wi, “Hi khanaayariwe muuraruwani, nookhalla ni Attiitthiihu mmodda, Mulluku.”

42Yesu aallota wi, “Mulluku akhanlleke Attiitthaanyu, mwaawerokikonda miyaano kaambiiwa kaavenyenre wa Mulluku vano kiri wuno. Miyaano ngaawiille mwa olamulello wa meekhaaka koma Mulluku sika aakirumalle. 43Khamuniiwesesa ddoollota ddaka kaambiiwa tini? Kaambiiwa khamunapaalla wiiwa mawaaka. 44Nyuwaano tti anamwani a attiitthaanyu, Satana nave munapaalla weera minkhella dda attiitthaanyu. Yooyo aari mullupa awiipha ovenyera vawaamba nave khaari mwa yawoona kaambiiwa mwa yooyo kheyaamo yawoona. Analloteeye ddawoottha, anallota ovenyera m'murimani mwaye kaambiiwa tti awoottha ni attiitthiiwa a awoottha attheene. 45Koma miyaano kaambiiwa kinallota ddawoona, khamunakikhulupilila. 46Ttaani a nyuwaano anakeera miyaano wi tti oochimwa? Kaallotaka ddawoona, khamunakikhulupilila miyaano kaambiiwa tini?” 47Oyo anavenyera wa Mulluku anniiwa mawu a Mulluku. Koma nyuwaano khe oovenyera wa Mulluku sika ekaambiiwa muhiniiweenyu.

Yesu ni Abrahamu

48Ayuda yaamukoha Yesu wi, “Ethiyo ninnoottha voollotani wi, nyuwaano tti Musamariya* nave mookhalla ni munepa woonanara?”

49Yesu ahaakhulla wi, “Nginna munepa woonanara. Kinaatitimiha Attiitthaaka koma nyuwaano munnakinyaambusa miyaano. 50Miyaano nginaashaasha ntitimiho nameekhaaka koma vookhalla mmodda ananaashaasha nave yooyo sika anaaweeruze. 51Ddawoona, kinimuulleellani wi, oyo anasunga mawaaka m'murimani mwaye khawa akhwa.”

52Ayudaalle yaallota wi, “Vano noodduwella wi mookhalla ni munepa woonanara. Abrahamu aakhwa nave anamallotella yaakhwa. Sika nyuwaano munihina, ‘Muthu anasunga mawaaka m'murimani mwaye khawa akhwa.’ 53Ethiyo nyuwaano tti muullupalli ohiyana ni Abrahamu oyo akhwille? Nave anamallotella yakhwillettho? Vano nyuwaano munaddeesa aani?”

54Yesu ahaakhulla wi, “Kaariki kiititimiheke meekhaaka, ntitimiho naka khanaakhalle ni mutteko. Attiitthaaka ayo munalloteenyu wi tti Mullukwaanyu sika enakititimiha miyaano. 55Nave nyuwaano khamunadduwella koma miyaano kinnamudduwella. Nave kallota wi nginamudduwella kinaakhalle awoottha wonanko nyuwaano. Koma miyaano kinnamudduwella nave kinnasunga mawaaye m'murimani mwaka. 56Attiitthaanyu Abrahamu aanatiyerella wi oone nllapo na ophiyera waka vano ahoona nave aahakallalla.”

57Vano Ayudaalle yaallota wi, “Ethiyo vawi khamunna miyakha ddookwakhwana 50, moomoona Abrahamu?”#8.57 moomoona Abrahamu?: Ddoolemba ddimodda ddakhalle ddookhalla ni mawu awi Abrahamu aawoonani?

58Yesu ahaakhulla wi, “Ddawoona, kinimuulleellani wi, Abrahamu ahinayariwe, miyaano kaari kiriwo khalle.”

59Vano yaatota malluku wi emuvokhe Yesu. Koma Yesu ahiipittha yeekhaaye nave akhumamo mu enyumba ya Mullukweelle.

Currently Selected:

Yohane 8: MW2019

Highlight

Copy