Yohane 7

Asinne a Yesu khenamukhulupilila

1Ddimallille nndda Yesu aheetella mu Galileya. Khaapanlle weetella mu Yudeya kaambiiwa attekweene a Ayuda* yapaalla omwiipha. 2#Lev 23.34; Deu 16.13Nave enthawi ya Ehakallallo ya Ayuda ya Misasa yahaatamella. 3Sika asinne a Yesu yaamulleella wi, “Venyaniwoni wuno muye o Yudeya wi oohudderaanyu ni alliwattho yoone mitteko ddanyu nnddo muneereenyu. 4Vawi khaavo muthu aneera ddeko mwawiipittha apaalla okhalla oovuwa. Sika mwaaweeraka ddeko ddenndda, muddoonihelle nyookha va ellapo yavatthi.” 5Vawi naari asinnaayo kheyaamukhulupilila.

6Yesu aallota wi, “Enthawaaka khenaphiye koma wa nyuwaano erive enthawi tti yaphaama. 7Athu a ellapo yavattheella khewiitani nyuwaano koma ennakiita miyaano kaambiiwa kinnavelleella omboni wawi mitteko ddiwa tti ddoonanara. 8Nyuwaano yaaniwoni o ehakallallo. Koma miyaano ngiyaawo#7.8 ngiyaawo: Ddoolemba ddimodda ddakhalle ddookhalla ni mawu awi nginayaawo. kaambiiwa enthawaaka khenaphiye.” 9Aallotilleeye nndda aahalla mu Galileya.

Yesu o Ehakallallo ya Misasa

10Asinne a Yesu eyiille o ehakallallo wulle, Yesu nayeenettho aayaawo ohiri mwawooneya koma mwawiipittheya. 11Attekweene a Ayuda yaamwaashaasha va ehakallallweelle. Yaakoha wi, “Ari wuuwi yoolla.”

12Nave athu yaanong'ona mmodda ni mukhwaaye dda olliyooyo. Amodda yaallota wi, “Olla tti muthu aphaama.” Koma amodda yaallota wi, “Iyaayi, yoolla anawoottottha athu.” 13Koma khaavo muthu aallotille dda olliye mwawooneya ekaamba yoowoova attekweene a Ayuda.

14Vano yaphiyalliiwa variyari va ehakallallo, Yesu aavollowa mu enyumba ya Mulluku aamba ohuddiha. 15Attekweene a Ayuda yaattikhina ellota wi, “Muthu yoolla, anadduwella mwawiidde ddeko ddinchichi ahinahuddere?”

16Yesu ahaakhulla wi, “Ehuddihwaaka khe yaaka koma enavenyera wa Mulluku oyo aakirumalle. 17Arive muthu anapaalla weera opaalla wa Mulluku aneerodduwella wi ehuddihwaaka enavenyera wa Mulluku apaalle wi kinallota ddoovenyera m'muruni mwaka. 18Muthu oyo anallota dda m'muruni mwaye anapaalla ntitimiho na yeekha. Koma oyo anapaalla ntitimiho na oyo aamurumalle, olliye tti awoona nave kheyiivo yawoottha mwa olliyooyo. 19Mose ahuuvahani malamulo, khe ddiiddo? Koma khaavo a nyuwaano anathwara malamulwaalla. Muneeseesella tini okiipha?”

20Mulloko waathoolle wahaakhulla wi, “Wookhalla ni munepa woonanara! Ttaani aneesesesa owiipha?”

21Yesu ahaakhulla wi, “Kaheera yoottikhiniha emodda nave attheene mwaattikhina. 22#Lev 12.3; Gen 17.10Mose ahuulamulani wi mwaaphaddeke aniinyu aallopwana. Naari khe Mose koma makhollwaanyu sika yaambille. Vano munnaaphaddattho aniinyu aallopwana nllapo na Sabata. 23#Yoh 5.9Mwaana aamullopwana munnamuphadda va nllapo na Sabata wi malamulo a Mose ethwariwe koma munakishella murima kaambiiwa kaanamuchiriha muthu nllapo na Sabata? 24Muhineeruzaka vawoonani makhallello koma mweeruzeke mwawoona.”

Athu enaganiza wi Yesu tti Mesiya

25Athu amodda o Yerusalemu yaallota wi, “Olla khahiyo oyo attekweene eneeseesiiwa omwiipha? 26Ngamooneni annallota vawooneya koma attekweene khenallota ello wa olliyoolla. Apaalle alliwaalla ennadduwella wi yoolla tti Mesiya?* 27Nave Mesiya awa, khaavo anaadduwelle nko anaavenyereeye. Koma attheene ninnadduwella nko muthu yoolla anavenyereeye.”

28Yesu ahuddihaka mu enyumba ya Mulluku, aallota mookhuwa wi, “Munnakidduwella miyaano nave munnadduwella nko kinavenyereemi. Ngiwiille mwa olamulello wa meekhaaka. Oyo aakirumalle tti awoona nave nyuwaano khamunamudduwella. 29Koma miyaano kinnamudduwella kaambiiwa kavenyenre wa olliyoolla nave aakiruma.”

30Vano athu amodda yaapaalla omphara koma khaavo aworille weere ello va olliye kaambiiwa enthawaaye yaari ehinaphiye. 31Nave anchichi yaamukhulupilila ellota wi, “Ethiyo Mesiya ninamutiyerehooyo, aneereweera ddoottikhiniha ddinchichi omukhwaranya muthu yoolla?”

Akhoto enarumiwa wi yammake Yesu

32Afarisi* yiiwalliiwa athu enong'onaka dda Yesu m'mullokoni mulle, alliwaayo ni allupa mukutho uullupalli yahaaruma akhoto a o enyumba ya Mulluku wi yammake. 33Yesu aallota wi, “Kinaakhalle ni nyuwaano o enthawi yooyeva nave vano kineerohokollweella wa yooyo aakirumalle. 34Muneerokaashaasha koma khamukiphwanya navettho khamuwora oyaawo nko kinaakhallekeemiwo.”

35Attekweene a Ayuda yaakohana wi, “Anaaye wuuwi wi hiyaano nihimuphwanye. Apaalle anaaye o mizinda dda athu ayo ehiri Ayuda wi aahuddiheke yaayo, nko athwaahu epallalleyelliiwawo? 36Anallota wi, ‘Muneerokaashaasha koma khamukiphwanya navettho khamuwora oyaawo nko kinaakhallekeemiwo.’ Anaaka tini?”

Muhinje wa maaddi ookumi

37 # Lev 23.36 Va nllapo noomallihella navettho nuullupalli na ehakallallo Yesu ahiimella allota mookhuwa wi, “Muthu avolliwa nthona anaphwanella awe wa miyaano wi awirye. 38#Ezk 47.1; Zek 14.8Nave muthu anakikhulupilila miyaano awirye wonanko mmo mawu a Mulluku enallotiiwa wi, ‘Mihinje dda maaddi ookumi ddineerokhuma ovenyera mwa muthu yooyo.’ ”#7.38: Mawu a Yesu mu mavesi 37-38 ttuuttaphullelliwattho wi “Muthu avolliwa nthona anaphwanella awe wa miyaano wi awirye. 38 Mawu a Mulluku enallota wi, ‘Mihinje dda maaddi ookumi ddineerokhuma ovenyera mwa muthu anakikhulupilila miyaano.’ ” 39Yesu alloteeye ddenndda allota dda Munepa oyo ookhulupilila mwa olliyooyo eneeriiwa yaakhelle. Va enthawi yeeyo Munepa Waweellooyo waari ohinavahiwe kaambiiwa Yesu aari ahinatitimihiwe.

Athu ennavaanyihana

40Athu amodda m'mullokonimmo yamwiiwalliiwa allotaka ella yaallota wi, “Olla sika namallotella!”#7.40 namallotella: Onani 1.21.

41Amodda yaallota wi, “Olla sika Mesiya!”

Koma amodda Yaallota wi, “Mesiya khavenyera o Galileya. 42#2 Sam 7.12; Mik 5.2Mawu a Mulluku enallota wi, Mesiyooyo anaakhalle edduullu ya mwene Davide nave anaayariwelle mu Betelehemu, m'muzi mmo mwakhalla Davide.” 43Sika waakhalla ovaanyihana m'mullokonoolle ekaamba ya Yesu. 44Amodda mwa yaayo yapaalla omuphara koma khaavo oyo aworille weera ello va olliye.

Ohikhulupilila wa attekweene a Ayuda

45Akhotwaalle yahokollowilliiwa, allupa mukutho uullupalli ni Afarisi yahaakoha wi, “Khamuwiillena kaambiiwa tini?”

46Akhotwaalle yahaakhulla wi, “Khaavo anallota wonanko muthu yoolla!” 47Afarisaalle yahaakoha wi, nanyeenettho owoottotthani? 48“Moodduwella wi khaavo naari mmodda a attekweene a Ayuda naari Mufarisi mmodda oyo amukhulupililalle olliyoolle. 49Koma athu ayo ehinadduwella malamulo a Mose ennamukhulupilila sika tti ootembeleliwa!”

50 # Yoh 3.1,2 Mmodda a Afarisaayo aari Nikodemo, muthu oyo aayiillewo khalle woomoona Yesu. Olliye aallota wa amoddaayo wi, 51“Ethiyo malamulwaahu ennamuvaanyiha muthu nihaambille omwiiwa olliye wi nidduwelle eyo enreeye?”

52Yaamwaakhulla olliye wi, “Wettho onavenyera o Galileya?” Huddera mawu a Mulluku nave oneerodduwella wi khaavo namallotella anavenyera#7.52 khaavo namallotella anavenyera: Yoolemba emodda yakhalle eri ni mawu awi namallotella khavenyera. o Galileya.

53 # 7.53: Ddoolemba ddimodda ddakhalle khaddinna Yoh 7.53—8.11. Ddimodda ddookhalla ni mawu yaalla vatulli va Yoh 21.24. Ddimodda ddookhalla ni mawu yaalla vatulli va Luk 21.38. Emodda yookhalla ni mawu yaalla vatulli va Yoh 7.36. Vano arive muthu aarowa owaniwa.

Currently Selected:

Yohane 7: MW2019

Highlight

Copy