Marcos 9
9
1Waneya Jesus hali hinkakletatkana wane htshina: — Hichinikanru xye: Satkaka hewi hajeru hma mupnaknukawa, retanru Hoyakalu pohirewaxyawaka hapokatshritka hpixkonuyma.
Jesus, Moisés, Elias Piranapni
2Waneya seis hohne pnut-hohne, Jesus teno mrijiwaka hanikna Pedro, Tiago, hiyrunu João. Wannapkatkani. Waneya wanna hetanu hyokmanhojitatka Jesus.
3Himkal-koxa klata, klat-potuko rixa, katajru jeromkaklerone yohnik-powranu rixatka.
4Retluna Elias-ni, hiyrun-koxa Moisés-ni. Riynumsatluna Jesus.
5Waneya Pedro wan-tshinru Jesus:
— Kasruklewakleru, kihleru wiko wwiywaka. Hayeri wkamheru mapa pantshi; satu pixanupa, satu Moisés-nupa, satu Elias-nupa.
6Waneya rasruklene himyekpotuthonuka. Pedro hi himata klukta htshinanu.
7Waneya hohimkohi hichyatna. Waneya hohimkohi hitokote ruchpajyatka tokantshi wla tshinatshri:
— Xyekni nowhene nalukleru. Hyijnak-tokanutanru!
8Waneklukawa hsajruruyhaletna seyni Jesus tsonu retna.
Elias Hapojinri Piranapni
9Waneya himriji hserpijinixkana Jesus hijretna retakanatanruna hike hmunkajyawakanupna hma miwekkanuko pchini Jeji Whene hipuktshiya.
10Wanna yijnakotlu Jesus towuxyana seyni ruhjekakna wannakakluko klu pirana htshina riwejinpatnaka pirana.
11Hiyáhoni repomhaluna Jesus, wla htshinruna:
— Klu tshinanhe kasruklewaklerune hinanchitkaluru pirana hasruklewatatshine wan-tshina Elias hapka hapokanu?
12Waneya Jesus wan-tshinna:
— Halikakni, Elias hapokanu ruhlexyawakaplu ptowruko. Seyni haklu tshinanhe yonatkaluru tokantshi wan-tshina Jeji Whene salewnapotutanhonuka malukkotupni?
13Seyni wane ntshinhi Elias-ni hinpatka seyni rapnokatka raluk-hixlexikowaka rixka yonatkaluru tshinyawaka pixka rixluna.
Jesus Mturu Kamtshite Hakajyawaka Piranapni
14Waneya rapojinixkana pimrine rasruklenestsi, retna hixolune yine rasruklene sajrukastsitanune. Satkaka kasruklewaklerune hinanchitkaluru pirana hasruklewatatshine hihjekakakanata.
15Hajeyri yine hixolune hexinixkalu Jesus rimyekna wanna ptowruneka waneya rasukanwakatluna ralikluna.
16Waneya Jesus hepomhana kasruklewaklerune hinanchitkaluru pirana hasruklewatatshine:
— Haklu himuhjekaka?
17Waneya jeji hixolune yehi hwakanatatshri hihita:
— Kasruklewakleru, naniklu noturu pexyawakaplu klu tshinanu rawya kamtshi myanumatkatu.
18Ptowru hohneruka kamtshi kamnitlu, ruknoklu tshiji. Waneya hyinuwaka hichpaksolnamletana, raskiyhita, ruhrokamta. Pasruklenemka nanjita ruknojyawakapluna kamtshi seyni hi rumukatna.
19Waneya wane htshinna Jesus:
— Yine malixaklenhi. Haté hi pejnu hohnekta nimwanhi hixa? Haté hi pejnu hohnekta nakotanhi? Wkata panikanru mturu.
20Waneya ranikanwakaxinixkaluna mturu Jesus nwaka kamtshi hetlu Jesus waneya hipokananu hkowchoklu mturu. Mturni tshiji hyana ruprurumtana ruchpaksolnamamtana.
21Waneya Jesus hepomhalu ruru, wla htshinru:
— Hi pejnu hohnehe wan-rixatka piwhene?
Waneya ruru hihita, wla htshinru:
— Hmatureyakawa.
22Hixo kata kamtshi tshitshmero hiknoklu, honha ruknoklu koxa ruylaxyawakaplu seyni pixa himukata hepixlexinipno, pepixanno. Petwamonutanunwu hixni.
23Waneya Jesus hihitlu:
— Numukathe? Ptowru potuko himukata hakanhaleta ralixini yineru.
24Waneya ruru wla tshin-saplewleta:
— Nalixyi. Pepixanno nalixyawakpotupyi.
25Waneya Jesus hexinixkana hixolune yine wale nwaka hapokatshinepa, htowutlu kamtshi, wla htshina:
— Kamtshi majnaklu manrutu, puchpajinixkalu xye mturu, hikeklu hohne pjihlokanutnaklu.
26Waneya kamtshi saplewata, hkowchoklu mturu waneya ruchpajyatkalu, ruchotlu mturu hipnatshri pixka hixatshriko. Wale tshinanu ptowru yineru wan-tshina, rupnanatka.
27Seyni Jesus kachimyotlu mturu, repixlu hyopkajyawakapa.
28Waneya Jesus jihlojinixka pantshi rasruklene wannapka rixinixkana, repomhaluna, wla htshinruna:
— Klu tshinanhe hi wumukata hiknokletlu kamtshi?
29Waneya Jesus hihitna:
— Xye pixkalutu kamtshi hi hiknokka, hanjihohneru hiyrunu hohajirewlu tshinanu tsonu.
Jesus Hinkaklethnapuxyawaklu Rupninri Riwejinritnaka Pirana Hiyrunukotnaka Piranapni
30Waneya Jesus hiyrunu rasruklene hichpajyalu wale poktshi, riknohamtluna Galileia tshijne. Jesus hi halukna yine rimaxyawakapna rawyawaka,
31klu tshinanu rasrukna rasruklene, wla htshinna:
— Jeji Whene tshinkaluru yine renekko. Wanna hiylatanru seyni map-hohne rixinri riwekanutnaka.
32Seyni wanna hi himatjema klu piranakta htshina Jesus seyni hpika hepomhaletluna.
Kat-pothe Hijhakaluru Hoyakalu Pohirewaxyawakaya Piranapni
33Waneya Jesus rasrukleneyma hapoklu tsru poktshi Cafarnaum tshinikowaka. Hajeyri pantshi rapojinixkana, Jesus hepomhana doze rasruklene:
— Haklu himuhjekakamta hatnuya?
34Seyni potshkena wanna klu tshinanu hatnu ruhjekajyana katnihe hijhakalur-potu.
35Waneya Jesus tuplata waneya htomhana doze rasruklene. Waneya wla htshinna:
— Satkaka yineru haluka tsru hixlexnawa, rujhalu wale nanwaka malukkotu rixyawaka ptowru yineru repixanu.
36Waneya hkachitlu satu mturu, hyopkakkaklu wanna hanikajite. Hsapriklu. Waneya wla htshinna rasruklene:
37— Katukta hihle yoptoletlu xye pixkalutu mturu nhiwaka tshinanu hit-koxa hyoptotanu. Hiyrunu katukta yoptotanno hita, hi hita tsonu hyoptota seyni hyoptotanru nyokanatjeru koxa.
38Waneya João wan-tshinru:
— Kasruklewakleru, wetlu jeji kamtshi hiknokatshri pixa phiwakaya seyni wimaletlu klu tshinanu hi hixa wepirni.
39Waneya Jesus hihita, wla htshina:
— Hi himaletanru klu tshinanu yineru hetkaluru kamhatshri hita hiwakaya, hi xekoyaka hektuwaka htshinanwakatanno.
40Klu tshinanu katukta hi kamnitwu, repixwu.
41Hichinikanru xye: Satu yineru honha copa stonha hixiniphi Cristo-nerunhi hixyawaka tshinanu, halikakni hyoptotanru rumlujikolupa.
Himtuwna Halixlekakatshri Piranapni
42Waneya Jesus wla tshina:
— Katukta himtuwna halixlekakna nalixjene mtserkakanewa, kihlepotmaklu tsru sotlu rostunojixikowaka waneya mar powha ruknojikowaka.
43Pimyo himtujinipyi, pkastakanru. Klu tshinanu kihlepotmaklu mtsoji hiwekkajikowaka, hepi myoluko tshitshmero tshitshi hikeklu muwnakatu yehi ruknokkona,
44[tsomi mupniywakanu hiyrunu tshitshi hikeklu muwnakatu yehi.]
45Pijixi himtujinipyi, pkastakanru. Klu tshinanu kihlepotmaklu myape hiwekkajikowaka, hepi jixiruko tshitshmero hikeklu hohne mnikawnakatunapa ruknokkona,
46[tsomi mupniywakanu hiyrunu tshitshi hikeklu muwnakatu yehi.]
47Piyhale himtujinipyi, pkochpakanru. Klu tshinanu kihlepotmaklu pa yhalepkalutu hiwekkajikowaka Hoyakalu pohirewaxyawakaya, hepi yhaleruko tshitshmero ruknokkona,
48tsomi mupniywakanu hiyrunu tshitshi hikeklu muwnakatu yehi.
Tuwu Piranapni
49— Klu tshinanu satkaka yineru tuwutko tshitshmeroya.
50Tuwu hijhakalurni seyni hma tuwrenuklunu hi repixlewata. Tuwu pixkalunephi, hike mixkanephi hixkakluko.
Currently Selected:
Marcos 9: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
