Marcos 10
10
Jesus Kopruhaxyawaklu Jordão Wenne Piranapni
1Waneya Jesus wane ruchpajya, Judeia tshijne hyatka, hkopruhatlu Jordão wenne. Waneya hixolune yine hapatjeyehitlu hiyrunukotnaka. Wale hasrukna rixa hasruhlexyawaka pixka.
Hiknokahnunrolu Piranapni
2Waneya satkaka fariseu-ne yanwakatlu Jesus hepomhalu retumhiyluna. Repomhaluna:
— Moisés hiykole pirana yonatkalurlahe hi tshipetlu jeji hhanunro ruknojyawakapa?
3Waneya Jesus hihitna satu hepomhaluyma:
— Kluhe ruykotatkahi Moisés-ni?
4Waneya wanna hihita, wla htshinruna:
— Moisés hiykole yonatkaluru wan-tshina jeji ruchohnunroxinipa ruchoxyalo pirana yonaxikolu renekanro, hhanunro tmixyawakanpatka waneya hyokanatatkalo.
5Waneya Jesus wan-tshina:
— Moisés yonatlu xye yokanruru hixa chiko hchinikanu hixyawaka tshinanu.
6Hyinuwajikolu xye tshijne hiyakoxikolu klu papko Hoyakalu hixkajyawaklu jeji suxo rixyawakna.
7Wale tshinanu jeji hichotlu ruru, runro, rimwiywakaplo hhanunro.
8Hiyáhoni hepitkana seyni pa manepkalunetkani, wale tshinanu hi hepna, satupkalu.
9Hiyáhoni hike yineru xako hitspalkakanru Hoyakalu hapatjetanune.
10Waneya rapojinixkana pantshi, rasruklene yinuwaka hepomhaletlu wale pirana.
11Waneya Jesus hihitna, wla htshinna:
— Jeji hichohnunroxini, satoko hhanunroxini rimopatatkalo.
12Hiyrun-koxa suxo hichohnuruxini, satuko thanuruxini, timopatatkalu.
Jesus Hiyrunu Mturune Piranapni
13Waneya wane pnute satkaka hanikna mturune Jesus yehi ruhlewahchinikanyehixyawakapna seyni rasruklene hi hitshitna.
14Seyni Jesus hexinixkalu xye hi rukchikhihlenutlu, waneya wla htshina:
— Hetachatanna mturune hyanwakaxyawaknona. Hi himaletanna. Klu tshinanu Hoyakalu pohirewaxyawaka hayinetene mturune pixkalune koxni wanna.
15Hichinikanru xye: Katukta hi yoptotanru Hoyakalu pohirewaxyawaka mturu pixka, hi hjihlokanru.
16Hiyáhoni Jesus saprikna mturune, ruhlewahchinikanyehitna, rutakamyohohotna.
Jeji Phuru Piranapni
17Waneya hyinuwaka yanrexinixnaka Jesus, satu jeji hasukanwakatlu, hyoptsojityehitlu wale hoji sreta, waneya repomhalu, wla htshinru:
— Kasruklewakleru kihleru, klunerhe nkamhanu niwejinri hikeklu hohne nma nikawniywakanupa?
18Waneya Jesus wla tshinru:
— Haklu tshinanu wane ptshinno kihle nixyawaka? Wale tsonu Hoyakalu kihle, hikeni hiyrunu.
19Pimathonru hiykolu pirana: “Hi puylalewatanu, hi hapoklewatanu, hi ptshowhuwatanu, hi pimrine pweyatanu, hi pimrine pyokwijetanu, pkahwakpiratanru puru, punro.”
20Waneya jeji hihitlu:
— Kasruklewakleru, nmatureyakawa haté xawakni nomkahitlu xye hiykolu ptowruka.
21Waneya Jesus yopukhatlu ramotleyma, wane htshinru:
— Seyni satu pa hixanu pmaha kamhaletawa. Wane pyanu, puchankanru ptowruka pimwanru, penekanna ptowruka mahaxikatshine, wane pixa pohirewnaletanu tenhohneya. Punanu cruz putaykopitanu waneya pomkahitanno hita.
22Waneya wale pirana hyijnakoxinixka phuru, hyatka, hwamonuwnapotuta. Hjihekanuwatatka klu tshinanu phurupotukni.
Pohirewnalu Hma Mepixyawakanru Yineru Hoyakalu Pohirewaxyawaka Hjihlojyawaka Piranapni
23Hiyáhoni Jesus sajruruyhaletatka. Waneya wla htshina:
— Hi pa yaprenukananru phurune Hoyakalu pohirewaxyawaka hjihlojyawakapna!
24Waneya rasruklene himyekpotuthonuka seyni Jesus pnuteko tshina:
— Nowhenene, hi pa yaprenukananru Hoyakalu pohirewaxyawaka hjihlojyawaka.
25Kyapreru camelo tsapujripna hjihlojyawaka seyni wane yohnik-yapren-potu phuru Hoyakalu pohirewaxyawaka hjihlojyawaka.
26Hiyáhoni wale pirana hjeminixkana rasruklene rimyekpotuthonukna. Hiyáhoni repomhakakna wannakakluko:
— Ha han-hixatshri hiwekkakko?
27Waneya Jesus yopukhatna, waneya wane htshina:
— Jeji hi himukata seyni Hoyakalu himukata klu tshinanu Hoyakalu ptowru himukatatshrini wale.
28Waneya Pedro wan-tshina:
— Petanu ptowruka wuchota pixa womkahixyawakatka.
29Waneya Jesus hihita, wla htshina:
— Nmunanhalu ptowru yineru hipji hichotatshri, ho himolene ho himolerone, ho runro, ho ruru, ho hiwhenene ho tshijkaka hichotatshri ramoxyawaka tshinanno hiyrun-koxa kihle piranalu potuko hiwekkaklewatatshri pirana ramoxyawaka tshinanu,
30hyoptotanru yohnik-potu xawakni riwejinri. Hyoptotanru cem yohnik-kata hipji, himolene, himolerone, hinrone, hiwhenene, tshijkaka hiyrunu salewaktshi. Hiyrunu xye riwejinripa hinatshri hyoptotanru riwejinri hikeklu hohne mnikawnakatupa.
31Hiyrun-koxa hixolune kosekakanatatshine hapkatatanutka. Waneya hixolune rapkatle hwatshine kosekanutka.
Jesus Hinkakatnaklu Rupninri Hiyrunu Riwejinritnaka Piranapni
32Waneyakni Jesus doze rasrukleneyma hatnu hapo hyana hkankaluna Jerusalém poktshi. Jesus kosekamta. Rasruklene hapkatatatshine himyeka Jesus tshinyawakna tshinanu pimrin-koxa wannaymalune pikatka. Hiyáhoni Jesus kahnete hanikna rasruklene hiyrunukotnaka. Waneya Jesus hinkakna riknohjerupa pirana, wla htshinna:
33— Jerusalém poktshi nwaka wyamtanu. Waneya Jeji Whene tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine renekko. Waneya rukolukanuwnakakanruna ruylajixanruna, judeu mixkane renekko.
34Jesus reyikanna, rutskahjetanruna, rutpehjetanruna, ruylatanruna; seyni map-hohne rixinri riwekanutnaka.
Tiago Hiyrunu João Hanjireru Piranapni
35Waneya wane pnute Tiago hiyrunu João, Zebedeu whenene, hapokastsitlu Jesus, waneya wane htshinruna:
— Kasruklewakleru, wuya penekanwu wepuklerupa.
36Waneya Jesus hepomhana, wla htshina:
— Kluhe haluka nkamhiywakhi?
37Waneya ruhitna, wla htshinruna:
— Pitshitanwu satu ppotukle sretate htuplaxyawakapa, satu pa sta sreta htuplaxyawakapa poyaknu yehi ppohirewnale tuplawakle ptuplaxinipa.
38Waneya Jesus hihitna:
— Hixa hi himatlu klukta hanjita. Hixlahe himukata hirrexyalo copa salewaktshi yehi nurinropa? Himukata batiza-letkahe n-batiza-xikolu pixka?
39Waneya wane htshinruna:
— Wumukata.
Waneya Jesus wan-tshinna:
— Halikaka, hixa hirinro copa salewaktshi yehiya hiyrunu n-batiza-xikolu h-batiza-tko hixa.
40Seyni htuplaxyawakaplu npotukle sreta ho npastate sreta hi hitanni neneklewaxyawakapa. Xye ptaklukaka sreta hajene Hoyakalu halpokohnapulene tshinanupa.
41Waneya pimrine rasruklene dez, hjeminixkaluna wale pirana rahkanwakatna Tiago, João.
42Hiyáhoni Jesus tomhana wanna ptowruneka walestsi rapojyawakapna, waneya wla htshinna:
— Hixa himatlu phurune towutanune xye tshijne hajene towutjetna yine hiyrun-koxa wanna towutjene towutjetna wanna koxa.
43Seyni hixkakluko hi wan-rixa. Katukta hijhakalur-pira, pimrine repixanu,
44hiyrun-koxa katukta haluka towuwletanu, walepni pimrine towrerupa.
45Klu tshinanu Jeji Whene koxa hi hina repixikowakapa, seyni runa repixyawakapna yine, riwejinri renejyawakapna, hixolune yine hektunu hwenuxyawakapa.
Jesus Mtsawa Bartimeu Hiwakatletatshri Hitskalajyawaka Piranapni
46Waneya Jesus rasrukleneyma hapoklu Jericó poktshi. Waneya wale poktshi ruchpajinixka rasrukleneyma, hixoluneyma koxa, hyoptotluna mtsawa Bartimeu hiwakatletatshri, Timeu whenni. Mtsawa tuplakanatlu hatnu tnumne. Ranjitlu renekachaxikolu.
47Waneya hyijnakpiranyehixinixkalu Jesus, Nazaré hajeru, hiknohamxyawaka, hyinuwaka saplewletatka:
— Jesus, phurni Davi-ni whene, petwamonutanunno.
48Hiyáhoni hixo yineru hiykotlu mtsawa potshke rixyawakapa seyni hsaplewata hiyrunuko:
— Phurni Davi-ni whene, petwamonutanunno!
49Waneya Jesus hitukatka waneya wla htshina:
— Htomhanru mtsawa.
Waneya htomhaluna waneya wla htshinruna:
— Pmixkowahchinikanuyakatanu! Ppalnanu. Htomhayi!
50Waneya Bartimeu hichale hiknokamta hiyáhoni hpalnamta chinpotu hyanwakatlu Jesus.
51Waneya Jesus hepomhalu, wla htshinru:
— Klunerhe paluka nkamhiywakyi?
Waneya mtsawa hihitlu:
— Kasruklewakleru, naluk-hetletatnaka hiyrunuko!
52Waneya Jesus wla tshinru:
— Pyanutka. Palixle tshinanu hihlerurutkayi.
Waneklukawhapka Bartimeu yinuwaka hetletatka hiyrunuko. Waneya romkahitlu Jesus hatnu hapoya.
Currently Selected:
Marcos 10: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
