Marcos 11
11
Jesus Jihlojyawaklu Jerusalém Piranapni
1Waneya Jesus rasrukleneyma hapokpiraxinixka Jerusalém poktshi, Oliveiras mriji rapokna, Betânia, Betfagé poktshikakastsitkana. Waneya Jesus yokanatna hepi rasruklene.
2Waneya wla htshina yokanretna Jesus:
— Poktshi pnute hajeru nwaka hyanu. Waneya chinpotukawa hjihlokanru, hetanru jumento whene tsatkaluru hikeklu myapatjitkotuwa. Hkochrikanru wale hanikanru wkata.
3Seyni satu yineru hepomhiniphi kluhe wla himixa waneya wla htshinanru:
— Kasruklewakleru haluklu. Seyni chinpotukawa hsatkakanru.
4Waneya hyatkana. Rukchikluna jumento whene tsatkaluru hatnuya. Htsatka pantshi hiphaptotestsi. Hkochrijinixkaluna wale,
5satkaka yineru hepomhana:
— Klunerhe hkamha? Haklu hikochriklu jumento whene?
6Waneya ruhitluna htshin-towutlexyawakna Jesus. Hiyáhoni ritshitluna waneya ranikluna.
7Waneya rasruklene haniklu jumento whene Jesus nwaka. Waneya himkalna jumento-tji hoho rutakna. Waneya Jesus hatskotjihohotlu.
8Waneya hixo yineru koprakamkata hatnu hapo, pimrine kopalatlu kachehiru tshij-hoho campo rawapyaluna.
9Waneya kosekamtatshine hiyrunu hapkatamtatshine saplewamta:
— Himalwutkalurni Hoyakalu! Kihlehchinikanuru Tsru Hixikatshriwa Hoyakalu hiwaka hinikatshri!
10Kihlehchinikanurupni wutsrukatni Davi-ni pohirewaxyawaka hinatshripa. Tenoya hoyakawaxikowaka!
11Waneya wane pnute Jesus jihloklu Jerusalém poktshi. Waneya Hoyakalupji hya. Retjetlu psoluka. Seyni kayi rixyawaka tshinanu Jesus, Betânia poktshi nwaka hya doze rasrukleneyma.
Figueira Piranapni
12Waneya wale prika hsatkapinixkana Betânia poktshi, Jesus hnatshnemnutka.
13Waneya howuka rexyalu figueira katseplu hisure hiplu. Waneya wane hya hisahi rujhiywakapa. Seyni rapokyehitlu hisure tsonu reta klu tshinanu hi hipapkolni hisahi rawyawaka.
14Waneya Jesus wan-tshinru figueira:
— Hikeklu hohne pniksahitkotka. Rasruklene yijnakotlu xye hima.
Jesus Hoyakalupji Hapkapyawaka Piranapni
15Waneya Jesus rasrukleneyma hapojinixka Jerusalém poktshi, hjihlojinixka Hoyakalupji, hyinuwaka hakaklexyatkana ptowruneka wane maronewaxikatshine, hichanrewatatshin-koxa. Hyotkakanru mes-kakni tiyiro ripekowaklena. Tuplawakkakni koxa hyotkaka pombo ruchankawaklena.
16Hi ritshitatkalu Hoyakalupji ranijikowaka hejnu.
17Waneya wla rixa hasrukletna:
— Wla htshina yonatkaluru Hoyakalu pirana: “Nopji hanjihohnewakapji htshinka ptowru yineru hanjihohnewakleni.” Seyni hixa katshowhurune hwiywaka hkamhiyatkalu.
18Waneya tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine yijnakotlu xye. Hyinuwaka hijhaletluna ruylaxyawakapluna Jesus. Klu tshinanu hixolune yine ptowruneka himyekahchinikanuta rasruklewle tshinanu hiyáhoni hpikluna.
19Waneya rutshpojinixka, Jesus rasrukleneyma poktshi ruchpajyatkana.
Figueira Piranapakotnakni
20Waneya wale prika yetshpotukawa figueira riknohamxinixkana retanatkaluna figueira-ni. Riprihanatka haté hitskih-potuko.
21Waneya Pedro hichinkaplu Jesus tshinyawakanru. Waneya Pedro wan-tshinru Jesus:
— Petanu kasruklewakleru, figueira-ni hektuwaka ptshinanwakatanroni hipnanatka.
22Waneya Jesus hihitlu, wla htshinru:
— Hichinikanru xye. Halixiniklunru Hoyakalu,
23hixa himukata tshinretmaklu xye mriji: “Ppalnanu mar powha puknojinwa.” Waneya hma kahekkanuklunru hihchinikanu seyni halixinri wan-rixa hiphujewnalexyawakapa waneyamka wane potuko rixanu.
24Wale tshinanu wane ntshinhi: Hanjihohnexini, pa hixanu hanjixini, halixanu hyoptoxyawakatkalu waneya hixa ptowruka henekkotka.
25Hiyrunu hanjihohnexiniklunuwa, hektuwaka hkamhanwakatjeru hamtakahchinikanyehitanru rektunu. Waneya Hirtshi tenhohne hajer-koxa hamtakahchinikanyehitanru hixa hektunu.
26Seyni pimrine hektunu hma mamtakahchinikanyehixinipa hixa, Hirtshi tenhohne hajer-koxa hi hamtakahchinikanyehixinhi hixa hektunu.
Jesus Tsru Potu Hitakkalurni Piranapni
27Waneya hsatkapna Jerusalém poktshi. Jesus Hoyakalupji yapakananumta waneya tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine judeu-ne tsrukakalutene koxa hapokanwakatlu.
28Waneya repomhaluna:
— Hanhe ruchpajya ptowutjeru xyekaka pkamhiywaka? Kathe henekyi xye tsru hitakkaluru?
29Waneya Jesus hihitna, wla htshinna:
— Hit-koxa satu hepomhalu nixanhi hixa. Hihixinri xye, hit-koxa hinkakanhi hixa katu henekno xye tsru hitakkaluru xyekaka nkamhiywaka.
30Hinkakanno xako. Kathe xawaka towutlu João h-batiz-lewaxyawaka? Ho Hoyakalu ho jeji?
31Waneya hyinuwaka hiynumsakakletna wannakakluko waneya wla htshinkakna:
— Wla wtshininri Hoyakalu, waneya repomhanunwu: “Haklu tshinanhe hi halixlu João?”
32Seyni wla wtshininri jeji ruchpajya htowutjeru hpikna hixolune yine klu tshinanu ralixluna João-ni Hoyakalu tokanu hinkakletatshrini rixyawaka.
33Wale tshinanu wla htshin-hihretluna:
— Hi wimatlu.
Waneya wla htshina Jesus:
— Hit-koxa hi hinkakanhi hanukta ruchpajya xyekaka ntowuxijeru.
Currently Selected:
Marcos 11: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
