Atos 8
8
Saulo Kamnixyawakna Cristo Halixatshine Hapatjetatshine Piranapni
1Hiyrun-koxa Saulo hikchikhihlenutlu Estêvão-ni ruylaxyawakatkana. Wale hohne Cristo halixatshine hapatjetatshine Jerusalém poktshi hajene yinuwaka salewnaleta tsru potuko. Hiyáhoni hkopalatkatkana halixatshine Judeia tshijneya psoluka, Samaria tshijneya psoluka. Seyni nuretkalune tsonu Jerusalém hitukatka.
2Satkaka jejine kahchinikanurune kapnatlu Estêvão manni. Htshiyahpotutna Estêvão-ni tshinanu.
3Seyni Saulo hijhalu Cristo halixatshine hapatjetatshine hnikaxyawakna. Papji pejnu hjihloka, hkochtshekna jejine, suxon-koxa waneya kapna ruknokanatkana.
Filipe Hinkaklewaxyawaka Samaria Tshijneya Piranapni
4Hiyáhoni hipalatatshine ptowruchaka hyana, runkakletluna tokantshi Hoyakalu pirana.
5Waneya Filipe Samaria poktshi nwaka hya. Runkaklewyehitna Cristo pirana.
6Hapatjetatshine hixolune yijnakpotutlu Filipe tshinyawaka. Ptowru yineru yijnakotlu, retakanatluna himyekaklewatatshrikaka Filipe kamhaleru.
7Klu tshinanu kamtshine hichpajyatkana hixo yine, tsru saple rixna kamtshine ruchpajinixkana. Hiyrun-koxa hixo hiktehatshine myankane koxa hitskalhatka.
8Hiyáhoni rumuwatna Samaria poktshi hajene.
Kahontshi Simão Piranapni
9Wale poktshi koxa rawakanata satu jeji Simão hiwakatletatshri. Mitshikawa kahontshitkani wale poktshiya. Rimyekjekanatna Samaria hajene. Tsru potu rutajnawa,
10hiyáhoni wale poktshi hwatshine ptowruneka tsrukakalune, hike mwikane koxa hislahpotutlu htokanu. Wane htshinna:
— Xye jeji Hoyakalu pixkonu himwatshri, “Tsru Pixkonurutu” tshinkalurni.
11Ruslahpotutluna klu tshinanu hix-hohnepotukananu rimyekakatkana kahontshi rixle tshinanu.
12Seyni Filipe hinkaklexinixkalu kihler-potuko tokantshi Hoyakalu pohirewaxyawaka pirana hiyrunu Jesus Cristo pirana. Jejine, suxon-koxa halixatka waneya h-batiza-tkatkana.
13Simão koxa halixatka. Rali batiza-letkoklunutka, Simão himotsatlu Filipe. Rimyekatka Simão klu tshinanu retlu hetkalurkaka, himyekaklewatatshrikaka Filipe kamhalerkaka.
Pedro Hiyrunu João Samaria Tshijne Rawyawakna Piranapni
14Nuretkalune Jerusalém hitukatshine jempiranyehixinna Samaria hajen-koxa yoptoxyawakatkalu Hoyakalu pirana hyokananwakatna Pedro, João.
15Waneya rapojinixkana Pedro, João, ranjihohnetna Samaria hajene yoptoxyawakaplu Hoyakalu Hiwejikaluru.
16Klu tshinanu nyi yine batiza-tkatka Jesus Cristo hiwakaya tsonu seyni Hoyakalu Hiwejikaluru hi wanna hoho rapokawa.
17Waneya Pedro, João himyona hitakhohotna Samaria hajene hiyáhoni wan-rixa yoptoletluna Hoyakalu Hiwejikaluru.
18Seyni rexinixka Simão nuretkalune himyona hitakhohoxinixkana Hoyakalu Hiwejikaluru renejikowakpatkana waneya tiyiro ranikanwakatna Pedro, João.
19Wane htshina:
— Hit-koxa penekanu xye pixkontshi. Waneypakni katukta nomyo nutakhohotanu Hoyakalu Hiwejikaluru hyoptoxyawakapa.
20Seyni Pedro wan-tshinru:
— Pixa ptiyiroteymako tshitshmero yanu klu tshinanu pkahwaklu Hoyakalu henekachale hanjitka tiyiroyma.
21Pixa hi himukata hapaka hepixletwu xye kamrurtshiya klu tshinanu hi potuk-hajyi Hoyakalu hetanuya.
22Pehchinikanutanu xye hektutuya waneya Tsru Hixikatshriwa Hoyakalu panjitanu pa katako xye hektutu chinikantshi paji hwatshri ruknojinyi.
23Klu tshinanu hitaho katsepoyyi hahxalu hiyrunu hektutu hostutatkayi.
24Waneya Simão wan-tshinna Pedro, João:
— Tsru Hixikatshriwa Hoyakalu hanjiyehitanno hixa xye ptowruka htshinyawaka hma makanhayehixyawakanupno.
25Hiyáhoni Pedro, João hali hinkakletatkana yine Hoyakalu pirana hiyrunu rali hiphujtaletatkaluna Jesus kamrure pirana, hsatokluna Jerusalém nwaka waneya pa poktshikaka Samaria tshijne hyapamxyawakna runkaklexyaluna kihle piranalu potuko hiwekkaklewatatshri pirana.
Filipe Hiyrunu Phuro Hislahjetatshri Piranapni
26Waneya hiwejikaluru Tsru Hixikatshriwa Hoyakalu towreru tenhohne hajeru hiynumatlu Filipe:
— Ppalnanu sul sreta pyanu hatnu hapo Jerusalém Gaza yapatshri, kahnete poktshi hatnu hapote.
Waneya hpalnatka Filipe, hyatka.
27-28Hatnu hapo hyoptoxyalu satu jeji Etiópia hajeru, htshijne nwaka yamtatshritka. Etiópia hajero suxo phuro Candace hislahatshrini wale. Tpohirewle psoluka hislahatshrini wale. Jerusalém rapkapatka Hoyakalu hpoyahnuxyawakapa waneya h-carro-te, cavalo kosleru hsatojya rethakananumtlu Hoyakalu tokanu hinkakletatshri Isaías-ni yonawahle.
29Waneya Hoyakalu Hiwejikaluru wan-tshinru Filipe:
— Pyanwakatanru, pomkahitanro twu carro.
30Hiyáhoni Filipe hasukanwakatlu, hjemlu rethakanaxyawaklu Hoyakalu tokanu hinkakletatshrini Isaías-ni yonre. Waneya repomhalu:
— Pimatjemluhe pethatanru?
31Waneya ruhitlu:
— Hanhe numukata himatjemletlu nethatanru hike masrukanutno?
Waneya htshanixlu Filipe ratskoxyawaklo carro waleyma htuplaxyawakapa.
32Xyekatkani Hoyakalu tokanu yonatkaluru psojite rethakanatanru: “Hatatjewa carneiro hiylawaka hanikkaluru pixka hiyrunu carneiro jiwjitkaluru pixka rixa hike htshina waneko pixka rixanu, hi hyanumatanu.
33Reyikkatka rapnokkatka. Hi kaklopichlu hma pohixikowakanupna hiklopichane klu tshinanu hkona hiwekletkatka xye tshijneya.”
34Waneya phuro hislahatshri hepomhalu Filipe, wane htshina:
— Nepomhanyi, punkakanno katu piranrahe hkochtsheka Isaías ho walenrahe ho satuko?
35Hiyáhoni Filipe yinuwaka hinkakletlu. Xye pirana yonatkaluruko hyinuwaka hihle hinkaklepotutlu kihler-potuko tokantshi hiwekkaklewatatshri Jesus pirana runkaklu.
36Waneya hatnu hapo hyapamtawana honha yehistsi rapokna. Phuro hislahatshri wan-tshina:
— Petanru honu, klu himaletno n-batiza-xikolupa?
37Waneya Filipe wan-tshina:
— Palixiniplu psoluka pajiya pumukata.
Waneya ruhitlu:
— Nalixlu Jesus Cristo Hoyakalu whene rixyawaka.
38Hiyáhoni htowutlu rutukajyawaklo h-carro-te waneya hyopikatkana wanna hepi honha hjihlokna waneya Filipe batiza-tlu phuro hislahatshri.
39Hkanijiniklunna Hoyakalu Hiwejikaluru kochtshekamtlu Filipe hiyáhoni phuro hislahatshri hikeklu hetatnaklu Filipe seyni phuro hislahatshri yatnaka poyikowamtatshritka.
40Chinpotukawa Azoto poktshi rakanhiyatka Filipe, runkaklewamta kihle piranalu potuko hiwekkaklewatatshri pirana ptowru poktshikaka hyapamxyawaka Cesareia poktshi rapojyawakatka.
Currently Selected:
Atos 8: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
