Atos 9
9
Saulo Hehchinikanre Piranapni
1Wane pchinika Saulo hinkakletatkalu ruylaxikowakna Jesus halixatshine. Tsru sacerdote, Hoyakalu kamrure kamhatshri, nwaka hyatka Saulo.
2Ranjitlu yonawahlo Damasco poktshi hanjihohnewakapji hajene tshinanu, yonawahlo hinhatshri tshinanu Saulo himukata kachretatkana wane hajene Jesus halixatshine rukchijinipna jejineko ho suxoneko, wan-hixatshine rumukata hanikleta Jerusalém poktshi nwaka hostutkalunetka.
3Seyni hatnu hapo hyapamtawa, Damasco-stsi rapokatka. Waneklukawa potuko tsru katalu tenhohne hichpajikatshri hatawnayehitlu Saulo.
4Saulo yawnamtatka tshiji. Hyijnakotlu satu tokantshi wane htshinjeru:
— Saulo, Saulo, haklu tshinanhe pkamnitno?
5Waneya Saulo wan-tshina:
— Katyihe pixa Tsru Hixikatshriwayi?
Waneya wane htshinru:
— Hita Jesus-no pkamnijetanruno.
6Seyni ppalnanutka. Tsru poktshi pyanu. Waneko pimrine hinkajinyi nalukleru pkamhinripa.
7Seyni Saulo himotsane jejine hitukatka. Hike rumukata tshinretna. Tokantshi halikaka hjemna seyni hike yineru retna.
8Hiyáhoni Saulo palnatka. Rumrekhatmakatka seyni hi rapkathojitatka. Hiyáhoni hkanojimtluna Saulo Damasco poktshi rutakatkaluna.
9Waneya map-hohne Damasco rawa. Wane rawka pchinika metkatni. Hike hnika, hike rura.
Ananias Hapkapyehixyawaklu Saulo Piranapni
10Damasco rawakanata satu jeji Jesus halixatshri Ananias tshinkaluru. Hoyakalu pixkonu tshinanu Tsru Hixikatshriwa Jesus hepomhalu:
— Ananias!
Waneya Ananias hihitlu:
— Hewino, Tsru Hixikatshriwa.
11Waneya Tsru Hixikatshriwa wan-tshinru:
— Ppalnanu. Hatnu hapo Direita hiwakatletatshri pyanu, Judas-pji nwaka. Wane pujhinri satu jeji Saulo tshinkaluru, Tarso poktshi hajeru hanjihohnetatshri.
12Saulo satu jeji rupjeta Ananias tshinkaluru. Xye rupjereru jihlokhipnayehitlu, himyo rutakhohotlu rexyawakpatnaka.
13Waneya Ananias hihitlu wane htshina:
— Tsru Hixikatshriwa, hixo yine njempiranyehixyalu xye jeji hi psokananu hektutu hkamhiyatkana potukalune Jesus halixatshine, Jerusalém hajene.
14Hiyrun-koxa xawakni hewi rapoka tsru hixikatshinwa sacerdote-ne hinhatshriyma hkachixyawakapna wanna ptowruneka pixa hiwaka munanhatshine.
15Waneya Tsru Hixikatshriwa wan-tshinru:
— Seyni wane pyanu klu tshinanu nnuretlu xye jeji hkamrurewaxyawakpatka hita tshinanu. Hita hiwaka hpohixinripa judeu mixkane yehiya, pohirtshin-yehiya, israel-nerune klopichane yehiya.
16Hitako hekhitanru Saulo ptowruka hsalewninripa Hita hiwaka tshinanu.
17Hiyáhoni Ananias yatka, Judas-pji hjihloka waneya Saulo hoho rutakamyotatka. Waneya wane htshina:
— Nomole Saulo, Tsru Hixikatshriwa hewi nyokanatjeru walekni Jesus pixa hetleru hatnu hapoya. Wale yokanatno pexyawakpatnaka hiyrun-koxa ptsepoxikotka Hoyakalu Hiwejikaluru.
18Waneya waneklukawa potuko rujruk-hichyaleyhaletatka chimatataji pixkalutu. Retatka. Waneya hpalnatka, h-batiza-tkatka.
19Waneya rali niklexinixka hjemlu hixko rixyawakatnaka. Waneya Damasco rutukatka pa hohnekaka Jesus halixatshineyma.
Saulo Damasco Rawyawaka Piranapni
20Waneya waneklukawa hanjihohnewakapjikaka Jesus pirana runkakleta Saulo. Wane htshina:
— Jesus, Hoyakalu whene rixyawaka.
21Waneya ptowruneka Saulo jematshine himyeka. Wane htshinna:
— Hi he xyekni Jerusalém hajene, Jesus munanhatshine hiylajetatshrikni wale? Hi he walekni hanikna Jesus halixatshine hostutkalune tsru hixikatshinwa sacerdote-ne yehi?
22Seyni Saulo pnute mixkowahchinikanutatka haté judeu-ne Damasco hajene hi rimatahchinikanutluna Saulo hiphujexyawaklu Jesus, Cristo rixyawaka tshinanu.
23Waneya hix-hohne hiknohinixka judeu-ne hapatjehchinikanutatka ruylaxyawakapluna Saulo.
24Seyni Saulo jempiranyehitna. Judeu-ne hislahpotutlu poktshi hiphaptotkaka hohohne hoyetshno koxa ruylaxyawakapluna Saulo.
25Seyni hoyetshno rixini Saulo homkahitatshine satu chiwatu hitokote rutakluna Saulo. Waneya wan-hixatshri hkaplakkakluna Saulo poktshi cerca-te.
Saulo Jerusalém Hiyrunu Tarso Rawyawaka Piranapni
26Waneya Saulo yanwakatlu Jerusalém poktshi. Rujhalu Tsru Hixikatshriwa Jesus halixatshine rimotsaxyawaka. Seyni wanna ptowruneka pikatkalu. Hi ralixluna Saulo halixatshri rixyawakatka.
27Hiyáhoni Barnabé hwaplu. Waneya raniklu Saulo nuretkalune yehi. Waneya Barnabé hinkakna nuretkalune Saulo pirana, Jesus hiynumsaxyalu pirana. Hiyrun-koxa Barnabé hinkakna hanu rixa Saulo hinkaklewle Jesus hiwakaya, hi hpika hinkaklewleta, Damasco poktshiya.
28Waneya Saulo wannayma rutukatka. Jerusalém poktshi psoluko hyajeta runkaklewjeta Jesus hiwakaya hike hpika.
29Hiyrun-koxa ruhjetna judeu-ne, grego-nru yanumaxikatshine. Seyni wanna hijhalu ruylaxyawakapluna Saulo.
30Waneya wale pirana rimatyehixinna halixatshine hapatjetatshine ranikluna Saulo haté Cesareia poktshi. Waneya hyokanatluna Saulo Tarso poktshi nwaka hyiywakapa.
Cristo Halixatshine Hapatjetatshine Hixolewnakajikowaka Piranapni
31Hiyáhoni Cristo halixatshine hapatjetatshine xkehkaka Judeia tshijneya, Galileia tshijneya hiyrun-koxa Samaria tshijne psoluyaka hihlewahchinikanutatka. Htseruwahchinikanutatkana hiyrunu hkahwakpiratluna Tsru Hixikatshriwa Jesus hiyrunu rixolewnatkana, Hoyakalu Hiwejikaluru hislahle tshinanu.
Eneias Hitskalajikowaka Piranapni
32Ptowru poktshikaka hyapamxyawaka Pedro hiyáhoni rapyehitkoxna potukalune Cristo halixatshine Lida poktshi hwatshine.
33Wane rexyalu satu jeji Eneias tshinkaluru. Oito mhale pchinika hi ruchpajyalu hijeko klu tshinanu hi rumukata yanreta.
34Waneya Pedro wan-tshinatkalu:
— Eneias, Jesus Cristo hitskalakyi. Ppalnanu, pihnanutanru pijeko.
Waneya waneklu papko potuko hpalnatka.
35Hiyáhoni Lida poktshi hajene hiyrunu Sarona poktshi hajene hichinhatlu xye jeji waneya wanna ptowruneka halixatkalu Tsru Hixikatshriwa Hoyakalu.
Dorcas Hiwekkajikowaka Piranapni
36Waneya Jope poktshiya twa sato suxo Jesus homkahitatshro Tabita tshinkaluro. (Grego-nruya Dorcas ttshinka.) Ptowru hohneruka kihleru tkamhajekanatni hike mwikane tepixjekanatni.
37Waneya waneklu papko tyeyixanatka, tupnanatka. Teromanetkana waneya teno hwahrukotatshri tutakkanatka.
38Lida poktshi hi howukaylu Jope poktshi. Hiyáhoni Cristo halixatshine jempiranyehixinri Pedro Jope rawyawaka, hepi yine hyokananwakatluna Pedro. Ranjipotutluna Pedro chinpotukawa hyanwakaxyawakapna.
39Hiyáhoni Pedro palnatka wannayma hyatka. Rapojinixka Pedro wanna hanikatkalu teno hruko. Walestsi hyopkakakanatna hixo hipnahnurutatshrone. Wanna tshiyahata. Wanna hekhitlu Pedro mkatshri kihleru hiyrunu histonokaka Dorcas-ni kamhaleru wanna yehi twakanaxinni.
40Waneya Pedro yokanatna ptowru yineru waneya hyoptsojita ranjihohnetatka. Waneya ruprotakyehitlo Dorcas mane waneya wane htshina:
— Tabita, ppalnanu xako!
Waneya tumrekhata, tetlu Pedro waneya ttuplatatka.
41Romyokanwakatlo waneya hyotunkaklo. Hiyáhoni potukalune Jesus halixatshine hiyrunu hipnahnurutatshrone htomhatka Pedro waneya rekhitna Tabita hiwejyawakatka.
42Waneya wale pirana himatka psoluyako Jope poktshiya. Hiyáhoni hixo halixlu Tsru Hixikatshriwa Cristo.
43Waneya hix-hohne Jope poktshi rutukatka Pedro. Simão-pji rawakanata. Waleni couro-mta jihlekleru.
Currently Selected:
Atos 9: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
