Atos 16
16
Paulo Haniklu Timóteo Piranapni
1Waneya Paulo Derbe poktshi hapoka wane pnute Listra poktshi rapokatka. Listra poktshiya rawa satu Cristo halixatshri Timóteo tshinkaluru. Runro Judeia-néroni, Cristo halixatshro koxni wala, seyni ruru grego-nerni.
2Cristo halixatshine ptowruneka Listra hiyrunu Icônio hajene tshinre kihle piranyehirni Timóteo.
3Hiyáhoni Paulo haluk-hanikletlu Timóteo waleyma, wale tshinanu hjiprojhaptojimtata. Wan-rixa klu tshinanu wanestsi hajenkaka judeu-ne himathetlu Timóteo hiru grego-neru rixyawaka.
4Waneya pa poktshikaka hyapamxiniklunu renekamtatkana Cristo halixatshine hapatjetatshine wale tokantshi hanukta htshintokanutna nuretkalune hiyrunu Jerusalém poktshi hajene Cristo halixatshine hapatjetatshine kosekatshine, ruykotatkana wale ptowruka hkamhiywakapna.
5Hiyáhoni wale tshinanu Cristo halixatshine hapatjetatshine xkehkaka mixkowata ralixleyna, hiyrunu pa hohnekaka Cristo halixatshinkaka hixolewnatnaka.
Paulo Hetlu Satu Jeji Hoyakalu Pixkonu Tshinanu Piranapni
6Waneya Paulo rimotsaneyma koprutna Frígia tshijne, Galácia tshijne koxa. Seyni Hoyakalu Hiwejikaluru hi hitshitna Hoyakalu pirana runkajyawakna Ásia tshijneya.
7Mísia tshijne hjihlokpiraxinixkana, Bitínia sretamka hyapiratna seyni Hoyakalu Hiwejikaluru hi hitshitna.
8Waneya Mísia tshijne riknohachatna Trôade poktshi yopjewakle rapokna.
9Wale yetshno Paulo Hoyakalu pixkonu reta. Retlu satu jeji Macedônia hajeru, hyopkaka hiyrunu ranjitlu: Punanu Macedônia sretaya pepixanunwu.
10Hiyáhoni rali hetlexinixkalu hetkaluru, wuprukatka Macedônia nwaka wyiywakapa klu tshinanu wimathetlu Hoyakaluko tomhatkawu kihle piranalu potuko hiwekkaklewatatshri pirana wunkajyawakapna wane hajene.
11Waneya Trôade poktshiya wpokowniyatka waneya mar powha hanikajite hwatshijitatshri Samotrácia tshinikowaka wyahapkata. Wale prika Neápolis poktshi yopjewakle wapoka.
Paulo Filipos Poktshi Rawyawaka Piranapni
12Waneya wane wuchpajyatka Filipos poktshi nwaka wyatka waleni tsru potu poktshi Macedônia tshijneya, romano-ne hwiywakni koxa wale, wane wutuka pimri hohnekaka.
13Waneya hapnanuxikalur-hohne tsru poktshi wuchpakamxya wenu wnaha wapoka. Hanjihohnewakapji wkahwaka wukchijyawaka waneya. Wane wtuplata. Suxone hapatjetatshine wiynumsata waneya.
14Sato suxo yijnakotatshro Lídia tshinkaluro, walani Tiatira poktshi hajéroni, mkatshri kihleru hichankajetatshroni wala. Seyni Lídia kahwakpiratlu Hoyakalu hiyáhoni tyijnakotwu. Hoyakalu kotpukhajitlo timatjemyawakaplu Paulo hinkajyatkalo.
15Waneya wala hiyrunu topji hwatshine ptowruneka batiza-tka. Wane pnute Lídia tshanixwu, wane ttshina:
— Hoyakalu halixatshro pikahwajinno nopji hapokanu, wane hwanu.
Hipokananu ttshanixwu hiyáhoni wane wutukatka.
Towretshro Hitskalajikowaka Piranapni
16Pa kata hanjihohnexikowaka wyamxini sato suxo towretshro yoptotwu. Waneylo hiwejikaluru hektutu. Ttowutjene jejine kayatlu tsru tiyiro klu tshinanu wala hinkakletlu hinamtatshri.
17Twu suxo Paulo hatjini tyachata hixaymalo. Tsaplewata, wane ttshina:
— Nyi jejine Tsru Hixikatshriwa Hoyakalu homkahitatshinni! Wanna hinkaklewyehithi hiwekkaklewatatshri pirana!
18Waneya hix-hohne wane tixatka. Paulo kojwakahchinikanutatka hiyáhoni ruprotaka wane htshinatkalu hiwejikaluru hektutu:
— Jesus Cristo hiwaka pixkonu tshinanu ntowutyi puchpakmanexinixkalo suxo!
Waneklukawa potuko ruchpakamtatka.
19Waneya rexinixkana tanjitjene jejine hike pnute rumukata kayalexyatkalona suxo hinkaklewleya hkachitluna Paulo, Silas koxa waneya hkosemtatkaluna tsru poktshi hanikajite, tshiji towutatshine nwaka ranikatkana.
20Wanna hanikna Paulo, Silas romano chefe-tene sreta waneya wane htshina:
— Nyi jejine judeu-nerunni hiyrunu wanna tsru kojwaklu rixpoktshitwuna.
21Rasrukjetwu hinanchitkaluru wkamhiywakapa. Hixa romano-nwu hi wumukata wan-hixleta.
22Waneya hixolune hapak-kachitlu Paulo, Silas. Romano chefe-tene suskamkakjixatkana hiyrunu hahaje hkotshipjetjikjixyatkana.
23Waneya rali kotshipjeretatkaluna hixo kata Paulo hiyrunu Silas preso rutakkatkana. Preso chefe-te towutka rinotpotuxyawakna.
24Wale hjemnixka wan-rixa towutlexikowaka, hitok-potuko rutakna. Hahmuna ptaji rimostujixitka.
25Waneya hanikaj-yetshnostsitkani Paulo, Silas hanjihohnekanata Hoyakalu rimalwukanata chikaltshiya preso hajen-koxa yijnakotna.
26Waneklukawa potuko tsru hiyoliklu tshiji rixa wale tshinanu pantshi yopkakhohleru chikolu hiyolikatka. Waneya ptowru hiphaptokaka hitpukamta. Haté corrente preso hajene hostutkaluru hichpirokachata.
Preso Hinotatshri Halixyawaklu Hoyakalu Piranapni
27Waneya ruyokatka preso hinotatshri retlu hiphaptokaka rutpukatka. Hkahwaklu preso hajene hasukatka. Hiyáhoni hkotshirote hkochpaka ruylapiraxnawa.
28Seyni Paulo saplewata:
— Hike hektutu pixinwa, hixa ptowrunekwu hewi.
29Waneya preso chefe-te hanjitlu katalu hiyáhoni hitoko hruko rasukamta rutatakleyma. Waneya Paulo, Silas-stsi hyoptsojixya.
30Waneya preso chefe-te hanikna maleka sreta waneya wane htshinna:
— Jejine, kluhe numukata kamhaleta niwejyawaka?
31Wanna hihitlu:
— Palixanru Tsru Hixikatshriwa Jesus Cristo waneklu piwekkakko pixa hiyrunu pipji hwatshine.
32Hiyáhoni Paulo, Silas hinkaklu preso chefe-te Hoyakalu pirana hiyrunu walepji hwatshine koxa runkakna.
33Wale papko hoyetshno ranikna Paulo, Silas hkotshipjexikoluchre rerokatkana. Waneya wane pnute wale hipji hwatshineyma batiza-tkatka.
34Waneya hipji ranikna Paulo, Silas waneya rohlutna. Preso chefe-te hipji hwatshine koxa poyikowata klu tshinanu ralixatkaluna Hoyakalu.
Paulo Hiyrunu Silas Hichoxikowakapa Preso Yehiya Piranapni
35Rumrerejinixka hohi romano chefe-tene soldado-ne yokananwakatlu preso hinotatshri, wane htshin-towutletluna: “Puchotanna nyi jejine.”
36Waneya preso chefe-te wan-tshinru Paulo:
— Romano chefe-tene tshinre hima hixa kochpakkotka. Halujini hyanutka kihlehchinikanuphi.
37Seyni Paulo hihitna soldado-ne:
— Hike hektutu wkamha hiyrun-koxa romano-nerunwu seyni wanepnawaka hkotshipjetwuna hixolune hetanu. Waneya preso rutakwuna. Xawakni raluka yokanretwu hike hmatshinanunekwu? Hik-hetko! Seyni wanna potuko romano chefe-tene hinanu hkochpajyawakapwuna.
38Waneya soldado-ne yatka romano chefe-tene runkajyawakapna. Romano chefe-tene jeminixka romano-nerune rixyawakna Paulo, Silas, hpikatkana.
39Wane hyatkana romano chefe-tene desculpas ranjitna hiyrunu hkochpakna preso-ya. Romano chefe-tene hanjitna ruchpajyawakapna poktshiya.
40Hiyáhoni Paulo, Silas preso hichpakamxinixka Lídia-pji hyatkana. Wane hyoptoxyatkana Cristo halixatshine hiyáhoni hmixkowahchinikankakatkana halixatshine wane pnute hyatkana.
Currently Selected:
Atos 16: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
