Atos 17
17
Tessalônica Poktshi Rawyawakna Paulo Hiyrunu Silas Piranapni
1Waneya wane pnute Anfípolis poktshi hiyrunu Apolônia poktshi hyapamtna Paulo, Silas haté Tessalônica poktshi rapokna. Wale poktshi rawa satu hanjihohnewakapji judeu-nerune tshinanu.
2Waneya Paulo rixjexyawaka rixa hjihlokyehitlu. Mapa hapnanuxikalur-hohne Paulo hiynumsatna Hoyakalu tokanu yonatkaluru piranaya.
3Runkaksatna haté rekhitna Cristo hijha hipnaleta wane pnute raluka yotunrexyalu hipuktshi. Wane htshina:
— Xye Jesus nunkakletyehixyahi waleni Cristo tshinkaluru.
4Satkaka judeu-ne halixlu Cristo pirana waneya romkahitna Paulo, Silas. Hixo grego-nerune Hoyakalu halixatshine haté hixo suxone phurone homkahitna.
5Seyni judeu-ne malixkane hahxatna Paulo, Silas hiyáhoni rawapna satkaka jejine mahchinikanune waneya wanna hapatjetna hixolune yine hiyáhoni tsru sejirtshi rixkakna hixolune. Jasão tshinkalurupji nwaka hya hasukletna hixolune Paulo, Silas yine hoji hetanu hkochpajyawakapna.
6Seyni hi rukchikatkana Paulo, Silas wale tshinanu ranikluna Jasão tshinkaluru hiyrunu pimrine Hoyakalu halixatshine tsru poktshi chefe-tene nwaka. Wane htshin-sapletna:
— Nyi yine psol-tshijneka himtukatshinetka hiyrunu xawakni wkata runna.
7Jasão hislahjetna Paulo, Silas hipjiya. Wanna ptowruneka majnakowjexyalu César hiykole pirana, wale tshiji towutatshri potukni, klu tshinanu wane htshinhimatna: Waneru satuko pohirtshi, Jesus tshinkaluru.
8Waneya rali jemlexinixkaluna tokantshi hixolune yine hiyrunu tsru poktshi towutatshine koxa jihekanuwpotuta.
9Waneya hipokananu ranjitiyirotetluna Jasão hiyrunu pimrine Cristo halixatshine waneya rali wenutlexinixkana ruchotatkana.
Bereia Poktshi Rawyawakna Paulo, Silas Piranapni
10Waneya wale yetshno potuko Cristo halixatshine yokanatatkana Paulo, Silas Bereia poktshi nwaka. Wane rapojinixkana, judeu-ne hanjihohnewaklepji hyanna.
11Wane hajene Tessalônica hajene yohnika himatkaleruni hiyrunu ruslahpotutluna tokantshi. Ptowru hohnekaka ruchtotatna Hoyakalu pirana yonatkaluru rimaxyawakapluna ho halikaklahe xye pirana ho hike.
12Hiyáhoni híxona judeu-ne halixa, hixolune grego-nerune halixlu, suxone grego-nerone chefe-tene koxa halixlu.
13Seyni Tessalônica hajene judeu-ne himaxinixka Paulo hinkakletlu Hoyakalu pirana Bereia poktshiya wane koxa hyanna wanna hkojwakahchinikanuxyawakna Bereia hajene.
14Hiyáhoni Cristo halixatshine chinpotu yokanatatkalu Paulo mar powha sreta hyiywakapa. Seyni Silas, Timóteo koxa Bereia poktshi hituka.
15Paulo hanikjene himotsatlu haté Atenas poktshi. Wane pnute Bereia poktshi hsatkapna, Paulo tokanu ranikanwakatna Silas, Timóteo. Wane htshina: Punanwakatanno chinpotukawa.
Paulo Hinkakle Pirana Atenas Poktshiya Piranapni
16Waneya Silas, Timóteo hkahwakka pchinika Paulo Atenas poktshiya, hkojwakahchinikanutatka klu tshinanu retlu wale poktshi katseplu mayawletshicha.
17Waneya Paulo hiynumsatna judeu-ne hiyrunu judeu mixkane kahchinikanurune hanjihohnewakapjiya. Hiyrun-koxa ptowru hohneruka riynumsatna yine hichanrewawakaya.
18Satkaka hijha himatkaletatshri epicureus tshinkalune hiyrunu estoicos tshinkalune ruhjekakna Paulo-yma. Repomhana:
— Klu raluka tshinreta xye kyanumsakleru?
Pimrine hihitlu:
— Hatatjewa runkaklewyehitlu hoyakalune mimathetkone.
Wane htshinna klu tshinanu Paulo hinkakletlu kihler-potuko tokantshi hiwekkaklewatatshri Jesus hiyrunu riwejinixnaka pirana.
19Waneya ranikluna Paulo Areópagos hapatjere nwaka. Waneya wane htshinna:
— Wuya puhle hinkakletanwu xye herotu chinikantshi pasrukjexyawu.
20Xye punkakle herotutkani hixaya. Waluk-himatjemletlu.
21Atenas hajene ptowruneka haté pnute hajen-koxa hasruha jemletlu herotu pirankaka.
22Waneya Paulo yopkaka Areópagos hapatjere hanikajite. Wane htshina:
— Jejine Atenas hajene, psoluyaka nethi hixa ptowruka himalwuta hyoptsojityehita.
23Klu tshinanu poktshi niknohamxini nethi kluneru hyoptsojityehita hixa. Netlu satu henekachalu hitajikowaka, wane htshina yonreta: “HOYAKALU MIMATHETKOTU TSHINANU”. Hixa yoptsojityehitlu satu hoyakalumka seyni hi himatyehitlu hixa. Xyekni Hoyakalu potu nunkajyahi.
24Psol-tshijneko hkamha haté ptowruka xye tshijne hajeru hkamha Hoyakalu. Tenhohne tshij-koxa Hitsrukatni wale. Hi rujhalu pantshi yine kamhaleru rawyawakapa.
25Xye Hoyakalu honra yine hiwejinri heneklewatatshri, hinnipha heneklewatatshri hiyrunu yine halukleru heneklewatatshri. Hi rujhalu repixikowaka yineya. Rimwalu ptowru rujhaleru.
26Hyinuwajikolu Hoyakalu kamhalu satu jeji. Waleko ruchpajyatka ptowru nerkaka xye psol-tshijne rawyawakna. Klu tshinanu Hoyakaluko henekpapkolutna riwejyawakna hiyrunu renekna rawyawakna.
27Hoyakalu rujhiywakapna pa katako ptowruchaka rujhinri rukchikanruna. Klu tshinanu hi howuklu Hoyakalu hixa satkaka tshinanuya.
28Klu tshinanu wale wiwejya, waleymatkawu. Satkaka hixa hinkakjene wan-tshina: “Hixa Hoyakalu whenenwu.”
29Hoyakalu whenene wixyawaka tshinanu hi wkahwakanru yine kamhaleru mayawletshicha ouro kamhikolu, prata kamhikolu, sotlu kamhikolu Hoyakalu rixyawaka.
30Mitshikawni yine hi himathetlu Hoyakalu hiyáhoni retachakanatna yine. Seyni xawakni Hoyakalu ptowru yineru hinkaka rehchinikanuxyawakapa.
31Hiyáhoni Hoyakalu hitaklu wale hohne psol-tshijneka rapnokaxikolupa hpotuknuyma. Mitshikawako Hoyakalu nuretlu satu jeji xye kamrurtshi hkamhiywakapa. Hiyáhoni Hoyakalu ptowru yineru rekhita hnurreruko rixyawaka klu tshinanu Hoyakalu yotunkaklu hipuktshiya.
Satkaka Hitsluhitatlu Satkaka Halixyawaklu Piranapni
32Waneya hjeminixkana yine hipnatshine hiwejyawakpatnaka pirana satkaka heyikpiranatlu. Satkaka wan-tshina:
— Pa hohnepa wjemanutnaklu xye pirana.
33Waneya wale papko Paulo wane hichpajya.
34Seyni satkaka yine halixlu Paulo hiyáhoni rimotsatluna. Satu halixatshri hiwakni Dionísio, wale Areópagos hajerni. Hiyrun-koxa sato suxo Dâmaris hiwakatletatshro halixlu hiyrunu pimrin-koxa halixlu.
Currently Selected:
Atos 17: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
