Atos 18
18
Paulo Corinto Tshijne Hwiywaka Piranapni
1Waneya wane pnute Atenas poktshi ruchpajya Paulo Corinto poktshi nwaka hyatka.
2Wane rexyalu satu judeu Áquila tshinkaluru Ponto hajeru. Hi hix-hohne Itália tshijne ruchpajyawana wale hhanunro Priscila-yma. Klu tshinanu Cláudio, tshiji towutatshri, towutna judeu-ne ptowruneka Roma poktshi ruchpajyawakapna. Waneya Paulo yanwakatna Áquila hiyrunu Priscila.
3Waneya wannayma rutukatka Paulo klu tshinanu waleko kamrurtshi hkamhakoxna wanna. Lona-pjikaka kamhatshinni wanna. Wane hkamrurewaxya wannayma.
4Ptowru hapnanuxikalur-hohneko riynumsatna judeu-ne, grego-ne koxa hanjihohnewakapjiya. Htowutna Jesus ralixyawakapna.
Paulo Jesus Pirana Runkaklexyawaka Piranapni
5Waneya Silas hiyrunu Timóteo tshinkalune Macedônia tshijne ruchpajiniklunutkana, Paulo henejnawa runkajyawakna yine kihler-potuko tokantshi. Wale tsonu hkamrureta. Rekhitna judeu-ne Jesus, Cristo rixyawaka.
6Seyni hi hyoptotluna Paulo hinkakle hiyrunu hektuwaka htshinna, wale tshinanu Paulo hiplokamkata waneya wane htshinna:
— Pa hohne hamhatshinenaphi hixako htshinanupni. Powramyono hixa hrahni tshinanu. Hi hita tshinanupni! Xawaknipatka judeu mixkane tsonu nyanwakatanutka.
7Waneya hanjihohnewakapji ruchpajinixka Paulo satu jeji, Tício o Justo tshinkalurupji hyatka Paulo. Hanjihohnewakapjistsi rawapjita. Xye jeji kahwakpiratlu Hoyakalu.
8Halikaka Crispo tshinkaluru, wale hanjihohnewakapji chefe-te, wale hiyrunu walepji hwatshine ptowruneka halixlu Tsru Hixikatshriwa Cristo pirana. Híxona Corinto poktshi hajene jemtokanutlu Paulo hiyáhoni ralixluna, h-batiza-tkatkana.
9Waneya hoyetshno rixinixka Paulo Hoyakalu pixkonu tshinanu retlu satu hetkaluru. Tsru Hixikatshriwa Hoyakalu wan-tshinru:
— Hi ppikanu! Seyni pnute pya hinkakletanna yine hi putuk-hinkakletanna yine.
10Pixaymano. Hike yotnekanyi klu tshinanu hixo nonerune xye poktshi hwa.
11Waneya Paulo wane hitukatka pa mhale hanikaji mhale, Hoyakalu pirana rasrukna yine.
Gálio Tshinkaluru Hoji Sreta Rapojyawaka Paulo Piranapni
12Waneya Gálio tshinkaluru, Acaia tshijne chefe-te rixakanaxini, satkaka judeu-ne pa hchinikanurunni hkamnixyawakluna Paulo. Waneya ranikluna Paulo hijhahchinikanyehixikowaka.
13Waneya judeu-ne wan-tshina:
— Xye jeji hasrukna yine Hoyakalu rimalwuxyawakna seyni hi Moisés yonreru tshinyawaka rasrukna.
14Waneya hyanumpiraxini Paulo, Gálio wan-tshinna judeu-ne:
— Judeu-ne, satu pa hixanu jhamleru rixkamka ho kamrurtshi muhletu rixkamka, numukata yijnakoletanumkahi.
15Seyni tokantshicha rixyawaka tshinanu hiyrunu hixako yonruru pirana rixyawaka tshinanu, hixako hihletanru. Hita hi nujhahchinikanyehitanru xyekaka tshinanu.
16Hiyáhoni jemahchinikanjexikowaka hkochpajyatkana.
17Waneya ptowruneka kachitlu Sóstenes tshinkaluru, wale hanjihohnewakapji chefe-te, waneya jemahchinikanjexikowaka hinaple ruylajinruna. Seyni Gálio hike htshina.
Paulo Satokanwakaxyawaklu Antioquia Piranapni
18Waneya hix-hohne Corinto tshijne rutukatka Paulo waneya Cristo halixatshine ruknokamta Paulo waneya hpokownatka Paulo Síria tshijne hyiywakapa Priscila, Áquila-yma. Hma pokownaknuklunuwa Paulo jiwjitka Cencreia poktshiya klu tshinanu mitshi Hoyakalu runkaklexyalu rixannu.
19Waneya Éfeso poktshi rapojinixkana wane ruknokamtna Priscila, Áquila. Waneya hanjihohnewakapji hjihloka Paulo judeu-ne riynumsaxyawakapa.
20Hiyáhoni ranjitluna Paulo wannayma rutujyawakapa hix-hohne seyni hi raluka.
21Waneya Paulo hichpakpiraxinixka waneya wane htshina:
— Hoyakalu halujinipa nsatokanu pa hohne.
Hiyáhoni hpokownatka Paulo Éfeso poktshi ruchpajyatka.
22Cesareia poktshi yopjewakle rapojinixka, ruptekatka Paulo Jerusalém nwaka hyahapkata Cristo halixatshine hapatjetatshine hyoptoxyawakapa, waneya rali hiynumsalexinixkana halixatshine Jerusalém hajene Antioquia sreta hyatka.
23Pimri hohnekaka wan-rutuka Paulo waneya hyatka. Galácia tshijne hiyrunu Frígia tshijne hyapamta hapatjetatshine hmixkowahchinikankajyawakapa.
Apolo Tshinkaluru Éfeso Hiyrunu Corinto Poktshi Rawyawaka Piranapni
24Satu judeu, Apolo tshinkaluru, Éfeso poktshi hapokatka. Alexandria poktshi hmatuxyatka wale. Kihle hinkaklewleru wale hiyrunu rimatjempotutlu Hoyakalu pirana yonatkaluru.
25Wale hasrukkatka Tsru Hixikatshriwa Hoyakalu hatnu hapote pirana tshinanuya. Tsru htokanuyma runkakletlu Jesus seyni João batiza-xyawaka pirana tsonu rimatatka.
26Waneya psol-mixkonuka hyinuwaka hinkaklewleta hanjihohnewakapjiya. Waneya hjeminixkaluna Priscila, Áquila, wannapji ranikluna Apolo waneya repixluna pnute rimatjemyawaklu Hoyakalu hatnu hapote pirana. Waleni Jesus Cristo pirana.
27Waneya hnurexinixkalu Apolo Acaia tshijne hyiywakapa Cristo halixatshine Éfeso hajene mixkowahchinikankakatkalu hiyrunu hyonanwakatna wane hajene Cristo halixatshine. Ruykotna kihle yoptole rixyawakapluna Apolo. Waneya wane rapojinixka Apolo hepixatkana wanna Hoyakalu hichiniklewle pirana halixatshinetka.
28Klu tshinanu Apolo psol-mixkonuka ruykotna judeu-ne hixowakaya, Hoyakalu pirana yonatkaluruyma rekhitna judeu-ne Jesus, Cristo rixyawaka.
Currently Selected:
Atos 18: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
