Atos 15
15
Ruhjekakle Judeu Mixkane Tshinanu Piranapni
1Waneya pimrine jejine Judeia hichpajikatshine Antioquia poktshi hapoka. Wanna yinuwaka hasrukletna Cristo halixatshine wane htshinna:
— Hma mustakakjixkanuklunru hiptojimta Moisés yokanatanru tshinyawaka hixa hi himukata hiwekkakletko.
2Seyni Paulo, Barnabé koxa hi hikchikhihlenutlu rasruklewaxyawakna hiyáhoni ruhjekakna repomsakakna. Hiyáhoni rutakluna Paulo, Barnabé hiyrunu pimrine tsrukakalune Jerusalém hyiywakapna riynumsaxikowakapna nuretkalune hiyrunu Cristo halixatshine hapatjetatshine kosekatshine xye hepomsalu tshinanu.
3Cristo halixatshine hapatjetatshine Antioquia hwatshine hepixa yokanrexyawakna waneya Fenícia tshijne Samaria tshijne koxa hyapamxiniklunna wane hajene runkakna judeu mixkane halixyawaka pirana. Hiyáhoni Cristo halixatshine ptowruneka poyikowamta.
4Waneya Jerusalém rapojinixkana, Cristo halixatshine hapatjetatshine yoptotna, nuretkalune yoptotna hiyrunu Cristo halixatshine kosekatshine koxa yoptotna. Wane pnute runkaklewatna ptowru pirana Hoyakalu kamrurewaxyawaka wanna tshinanu.
5Seyni satkaka fariseu-ne halixatshinetka yopkaka, hyanumatna:
— Judeu mixkane haluk-jiprojhaptojimtaleta hiyrunu Moisés yonreru koxa romkahitanna.
Nuretkalune Hiyrunu Tsrukakalune Hapatjeta Jerusalém Poktshiya Piranapni
6Hiyáhoni rapatjetatkana nuretkalune Cristo halixatshine kosekatshine koxa xye hepomsalu tshinanu.
7Repomsakakna waneya howukchini hpalnatka Pedro, wane htshinna:
— Nomolene, hixa himatlu mitshikawa Hoyakalu nurexyano hixa tskalaya kihle piranalu potuko hiwekkaklewatatshri pirana nunkaklexyawakapna judeu mixkane wanna koxa himukata yijnakoletlu, ralixyawakapluna.
8Hoyakalu, ptowru yineru hchinikanu himathetatshri, hekhitlu hyoptoxyawakatkana judeu mixkane klu tshinanu renekatkana Hoyakalu Hiwejikaluru hixa pixka.
9Hoyakalu hetanuya pixkakaklunwu hixa, wanna. Ralixlena tshinanu hpowrathajitna.
10Ha xawakni, haklu tshinanhe hyahotlu Hoyakalu judeu mixkane Cristo halixatshine hoho hitajyawaklu xye hinolu. Hi wutsrukatenniko himukata hakotletlu xye hinolu, hix-koxa hi hakotatkalu.
11Seyni Tsru Hixikatshriwa Jesus walixyawaklu tshinanu wiwekkakka ruhlenu renekachale tshinanu, wanna pixka hchinikannu tshinanu.
Tiago Hiykole Piranapni
12Waneya potshketkana hixolune yine hapatjetatshine. Hyijnakotluna Paulo, Barnabé runkaklewaxyawakna ptowru hixatshri hetkalurkaka hiyrunu himyekaklewatatshrikaka Hoyakalu kamhiywakna judeu mixkane wannamyoya.
13Waneya rali yanumletatkana Tiago wan-tshina:
— Nomolene, hyijnakotanno:
14Xawakni potuko Simão hinkakatkawu hanu rixa hepixletna Hoyakalu judeu mixkane mitshikananu klu tshinanu satkaka wanna tskalaya hnuretatka rayinetene rixyawakpatkana.
15Waneko pixka rixtokanutna Hoyakalu tokanu hinkakletatshine mnukawa, wan-rixa yonretka:
16“Xye hiknohinpatka, nsatokanutnaka Davi-pji yawnatshri nuhletanutnaka. Napatjetanru hiknajrotatshri waneya nkamhapjitanutnaka.
17Waneya pa nerkaka himukata hapohchinikanretanru Tsru Hixikatshriwa Hoyakalu haté judeu mixkane ptowruneka nhiwaka hitakatshine,
18htshina Tsru Hixikatshriwa Hoyakalu, xye ptowruka kamhatshri. Xye tshijne yinuwajinikananuko rimatakanatatka Hoyakalu kamrure tshinanu.”
19Waneya Tiago pnute hya hinkakletatka:
— Wane ntshina hita, hi wkojwakanna judeu mixkane Hoyakalu halixatshinepni.
20Seyni halikaka wyonanwakatanna yonawahlo wan-tshinatshri: Hi hnikanru mayawletshicha henekkaluru nikalhitu, hi koxa hapoklewatanu, hi hnikanru hichrikaplaluru hituko, hi hihrahako hnikanu.
21Klu tshinanu mitshikawakananuko Moisés hiykole pirana hinkakletkatka pa poktshikakaya hiyrunu haté xawakni ptowru hapnanuxikalur-hohne runkakletka pa hanjihohnewakapjikakaya.
Ruhixikolu Hyokananwakatluna Antioquia Piranapni
22Hiyáhoni nuretkalune, Cristo halixatshine hapatjetatshine kosekatshineyma hiyrunu halixatshineymakananuko hnuretna satkaka jejine wannaya hyokanaxikolupna Antioquia Paulo, Barnabé-yma. Waneya hnuretna Judas, Barsabás hiwakatletatshri hiyrunu Silas. Cristo halixatshine ptowruneka kahwakpirpotutna nyi yine.
23Waneya sato yonawahlo hyokananwakatna Antioquia Cristo halixatshine, wane ttshina: “Hixa nuretkalunwu, Cristo halixatshine hapatjetatshine kosekatshinwu hiyrunu Cristo halixatshine ptowrunekwu halikanhi hixa wimolene judeu mixkane Antioquia hwatshine, Síria tshijne hwatshine, Cilícia tshijne hwatshine koxa.
24Wjempiranyehitna pimrine hix-yehi hichpajikatshine wane hapkapa hkojwakahchinikanuxyawakhi tokantshi tshinanu. Seyni hi wyokanatna.
25Hiyáhoni hixa ptowrunekwu wukchikhihlenutlu satkaka jejine wyokananwakaxyawakaphi wimatletleneyma Paulo, Barnabé.
26Nyi jejine henejnawa riwejinrina Jesus Cristo hiwaka tshinanu.
27Wale tshinanu wyokananwakathi Judas hiyrunu Silas. Wanna koxa hinkakanhi ptowruko wyonatanru pirana.
28Klu tshinanu Hoyakalu Hiwejikaluru hiyrunu hix-koxa hikchikhihlenutlu xye hinolu hma manijyawakanupna seyni xye tsonu rimretpotutanna:
29Hi hnikanru mayawletshicha henekkaluru nikalhitu, hi hihrahako, hi hichrikaplaluru hituko hnikanu. Hi hapoklewatanu. Xye ptowruka hma kamhaknuklunru kihlephi hixa. Seyoka.”
Ruhixikolu Hethaxikowaka Piranapni
30Waneya hyokanatatkana, Antioquia rapokna. Rapatjexinixkana Cristo halixatshine hapatjetatshine renekatkana yonawahlo.
31Rethaxinixkalona yonawahlo hpoyikowamtna hkojirexikoluna pirana tshinanu.
32Judas hiyrunu Silas, Hoyakalu tokanu hinkakletatshine rixkal-tshinanu, runkakna halixatshine hixo hiykolu pirana hiyáhoni hmixkowahchinikankakatkana halixatshine.
33Pchini tsonu wan-rutukna Judas hiyrunu Silas waneya Cristo halixatshine yokanatatkana kihle hchinikanurune nuretkalune hyokanatjerna yehi hyiywakapna.
34Seyni Silas wane haluk-hitukleta pchini tsonu.
35Seyni Paulo hiyrunu Barnabé Antioquia hituka, Hoyakalu tokanu rasrukjetna, runkaklewjetna Antioquia hajene halixatshineyma.
36Pa hohnetkani Paulo wan-tshinru Barnabé:
— Wuya wsatokanu wapyehixyawakapna wimolene ptowru poktshikak-hajene Hoyakalu pirana wunkakanune mnukawa, hiyrunu wetanna hanu rixna wanna.
37Seyni Barnabé haluk-haniklet-koxlu João Marcos tshinkaluru.
38Seyni Paulo hi haluk-hanikletlu João Marcos, klu tshinanu ruchotna Panfília yehiya, hiyrunu hi repiretna kamrurtshiya.
39Htshihetjerewle tshinanu rutspalakajyana. Waneya Barnabé haniklu João Marcos Chipre tshijne nwaka hyahap-hatna.
40Seyni Paulo nuretlu Silas hiyáhoni hyatkana. Antioquia hajene Cristo halixatshine heneklu Paulo Hoyakalu hislahlewleya.
41Waneya Paulo Síria tshijne hiyrunu Cilícia tshijne hyapamta Cristo halixatshine hapatjetatshine xkehkaka hmixkotahchinikanuxyawakapna.
Currently Selected:
Atos 15: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
