Atos 14
14
Icônio Rawakanaxyawakna Paulo, Barnabé Piranapni
1Waneya Icônio poktshiya waneko pixka potuko rixatkana Paulo, Barnabé. Hjihlokluna hanjihohnewakapji. Waneya wan-rixa hinkaklewletna haté hixo yine judeu-nerune hiyrun-koxa grego-nerune halixatka.
2Seyni judeu-nerune malixkanetka komyekahchinikanutna judeu mixkane hyokchatna Paulo, Barnabé hma malixyawakanupna.
3Seyni wanepnawaka Paulo, Barnabé hix-hohne Icônio poktshi rawna. Runkakletluna Jesus Cristo pirana hike pikanu. Hiyrun-koxa Hoyakalu hekhitlu halikaka pirana rixyawaka Hoyakalu chinikannu pirana klu tshinanu renekpixkonutna hetkalurkaka hiyrunu himyekaklewatatshri hkamhiywakna.
4Hiyáhoni tsru poktshi hajene kotspalahchinikankaka. Satkaka judeu-ne homkahitatka seyni pimrine nuretkalune romkahitatkana.
5Waneya judeu mixkane hiyrun-koxa judeu-ne h-chefe-teneymakananuko haluka kamniretna hiyrunu hsotlujpiraxyawakna Paulo, Barnabé.
6Seyni rimatatkana Paulo, Barnabé. Hiyáhoni rasukatkana Listra hiyrunu Derbe poktshikaka Licaônia tshijne hwatshine hiyrunu wanestsi hajeru poktshikaka hyana.
7Waneya wane koxa runkaklexyaluna kihle piranalu potuko hiwekkaklewatatshri pirana.
Paulo Hiyrunu Barnabé Listra Hiyrun-koxa Derbe Poktshikaka Rawyawakna Piranapni
8Waneya Listra poktshi rawakanata satu jeji tuplahohnekanatatshri hijixi himtuknu tshinanu. Hmatureyakawa wan-rixatka hiyáhoni hikeklu hohne hyanatka.
9Xye jeji yijnakotlu Paulo tokanu. Waneya Paulo hetlu, rimathetatkalu xye jeji halixlu hiyrunu rumukata hitskalakletko. Paulo yopukhapotutatkalu.
10Waneya Paulo hipokananu hiynumatlu wane htshinru myankatu:
— Ppalnanu! Pyopkakanu!
Waneya jeji palna, hyopkaka waneya hyinuwaka yanretatka.
11Waneya yine hexinri Paulo kamhanru hyinuwaka saplewletna wannako htokanuya:
— Hoyakalune hapoka jejine yáholu rixa hapokletna.
12Waneya Barnabé rutakhiwakatna Júpiter seyni Paulo rutakhiwakatna Mercúrio klu tshinanu walepotni hinkaklewatatshri.
13Júpiter templo-pjite poktshi hinaple rawapa. Hiyáhoni Júpiter sacerdote-te hanikatkalu boi-ne hiyrunu sahyikaka kahwuru kamhakaluru haté poktshi jihlojikowaka yehi. Sacerdote yineymakananuko haluk-hiylaletlu boi-ne henekachalu rixyawakapa Paulo, Barnabé tshinanu.
14Waneya rimaxinixkana nuretkalune Paulo, Barnabé wan-rixpiraxyawakna yine, Paulo, Barnabé suskamkaxnawa waneya yine hixolune hanikajite rapokatkana. Hsaplewatna:
15— Jejine, kluneru tshinanhe wan-hixa? Hix-koxa yinechawu hixa pixka wixa. Klunerukta hjema, hix-koxa jemlu. Hewi wapoka wunkaklexyawaklu kihler-potuko tokantshi hiwekkaklewatatshri pirana, xyekaka hmahijeru kamhaleta hiknokachaxyawaklu hiyáhoni Hoyakalu halikakalutu hiwekatshri homkahitanu, tenhohne, tshiji, mar powha kamhatshri hiyrunu ptowruka nyikaka hitokote hwatshri kamhatshri.
16Mitshikananu Hoyakalu hetachatlu ptowru nerkaka wannako ralujyawakako romkahixyawakna.
17Seyni Hoyakalu ptowru hohnekananuka rekhixnawa katni kihleru hkamhiywaka tshinanu. Hoyakalukatkani hina yokanatatshri tenhohneya hiyrunu ramikowaka papko henekjeru. Hoyakalukatkani nijittshi koxa henekjeru hiyrunu renekwu wumuwaxyawaka.
18Xye pejnu htshinatkana Paulo, Barnabé seyni wanepnawaka psokaklu hi rakot-himaletletna yine hma muylaxyakanupluna boi-ne wanna tshinanu henekachalu tshinanupa.
Paulo Sotlujexikowaka Piranapni
19Seyni satkaka judeu Antioquia, Icônio poktshikaka hichpajikatshine yokchatna hixolune yine hiyáhoni hsotlujetluna Paulo waneya hipnatshri hkahwakluna hkosemtluna tsru poktshi maleka.
20Seyni Cristo halixatshine rapatjeyehitluna, hsajrukluna Paulo. Hpalnatnaka waneya tsru poktshi hjihlokatnaka. Waneya wale prika Paulo, Barnabé-yma Derbe poktshi nwaka hyatka.
21Waneya Paulo, Barnabé hinkakletlu kihle piranalu potuko hiwekkaklewatatshri pirana Derbe poktshiya. Waneya hixo yine Hoyakalu tokanu homkahitatshine rixnawana. Waneya wane pnute Paulo, Barnabé satkapatnaka Listra, Icônio poktshikaka, Antioquia poktshi rapokna.
22Paulo, Barnabé mixkowahchinikankakatkana Cristo halixatshine ralixleyna hiyrunu runkakletluna salewaktshi pirana yine hixo salewaktshikaka retanna haté Hoyakalu pohirewaxyawaka hjihlojyawakapna.
23Waneya Paulo, Barnabé satkaka hapatjexikowaka rutakna Cristo halixatshine hapatjetatshine kosekatshine. Waneya ranjihohnetna, rohajirewatna hiyrunu Tsru Hixikatshriwa Hoyakalu rapohchinikanutna Cristo halixatshine hapatjetatshine kosekatshine tshinanu hmunanhalerna.
24Hiyáhoni Paulo, Barnabé, Pisídia tshijne psoluka hyap-kopruremtna. Waneya Panfília tshijne rapokna.
25Waneya runkakletluna hiwekkaklewatatshri pirana Perge poktshi yehiya waneya hyatkana haté Atália poktshi yopjewakle.
26Wane hpokowniyna kanawa waneya wane ruchpakamxyana, Antioquia poktshi rapokna. Wane mitshi ruchpajyatkana wane rukchijyaluna Hoyakalu hislahle wale kamrurtshi hkamhanruna tshinanu.
27Waneya rapojinixkana Antioquia Paulo, Barnabé hapatjetna Cristo halixatshine hapatjetatshine waneya runkakna psoluka Hoyakalu hixkajyawakna pirana hiyrunu Hoyakalu hixkajyawaklu judeu mixkane koxa ralixyawakna pirana.
28Waneya hix-hohne wan-rutukatkana halixatshineyma.
Currently Selected:
Atos 14: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
