Deuteronomio 26
26
Qoỹaano quiyim qarachitaxanataxana ca 'auaxaic la ca nanecsec
1Ca' ma' noxoñiu'a yí'maq 'laua ỹaanema qamiri ma'le ñi qara'gaxala' qota'olec caqamiri quiyim ralamaxarichii ra'aari, 2ca ma' naqachii ca 'auaxaic la ca qadañicshiguii ñaxajlec ca na'lauahi, ca' dohiuo lliitagui aca lahi' quecá'maq lca'acsec ñi qara'gaxala' qota'olec caqamiri quiyim qaimaqachin. 3Ca' quirepegue' ca netaxaỹaxanqajnec quiyim qaretaxaỹa'pegue' ñi qota'a. Ca 'ñirapega: Aỹim nagui sa'qaataxan quiñi qara'gaxala' qota'olec caỹim quiyim mashic ñinoxona'a ná'maq 'laua ỹachaxantac na'le ñi qara'gaxala' quesaua 'auaxaqa qareta'al quiyim ỹaanema qomi'. 4Ca cá'maq netaxaỹaxanqajnec icoñiguit cá'maq dohitau'a, ca illaalec aca ncopatoxonaxalate quiyim qanqouagaxainot ñi qara'gaxala' qota'olec caqami'. 5Ca ma'le, ca' qami' taxahi' 'qaachigui qami' ñi qara'gaxala'. Ca 'ñiracsa':
Saua 'auaxaqa ita'al sqo vito'olqai' arameo lase' chaqai huoxoiquipi, ca' chi ỹovireta'a na'le yi Egipto. Ca' quiyi, ca na'ñi, chi ỹovireta'a quiyim nqo'neuec, ca' 'xoic, ca 'ue da lquesaxanaxa. 6Qam so Egipto laseripi se ỹa'maxata'guelo qomi', ỹaatqajam 'ue da lqa'viic coqomi', ca 'xoic nqai'en da qare'xoric, ma' qomi' la'aqa. 7Ca na'le, ca' sashiilaq ñi qara'gaxala' qota'olec queso qareta'allipi quiyim qarotauan. Ca ñi'maxare na'xaỹaxana da qarashiilaxanaxac, ca' iuana da qanqa'viic, ca' qomi' loxonqa da ne'xoric. 8Ca' ñi'maxare ỹachaxan dá'maq chalego lecaic lquesaxanaxa, ca ỹo'uet da chalego nqolonaxa chaqai ỹo'uet ná'maq se qaiuanapega, ca na'le ñi'maxare naqata'alo qomi' quiyi Egipto. 9Ca' nauegalo qomi' ná'maq senqata'ñi nagui. Ca' ỹaanema qomi' najo 'laua ná'maq hua'ñi quiyim sqoue na huaca lo'i' chaqai na rapic li'i. 10Vichiguiño' nagui ñodouo na 'auaxaic la na ỹanecsec ñaxajlec na ña'laua ná'maq nañaañim ñi qara'gaxala'.
Ca chaqa'ma' 'ỹaañitot ñi qara'gaxala' qota'olec acá'maq na'ic lahi'. Ime, ca 'yitoto naua re'cootalli' ñi'maxare. 11Ca ma' ime, ca 'viichi' ca remaqachiqui', taỹaugui nqai'ñi' ná'ogue ná'maq lqouagaxa caqami' ñi qara'gaxala' qota'olec caqami' chaqai ná'ogue na qachaalaxai'pi. Qai'neeta nouanau'a nqai'ñi' da netoonaxaqui' na llaalqaipi so Leví chaqai ná'maq ỹoqa'a ca chicqa'gue neetauguilo qamiri.
Da nachitaxanataxanaxac qaỹachigoxotaugui ca diez quecá'ogue cá'maq hueeto'ot ca qom
12Ca ma' ỹovire'ogalo caua tres ñaxari quiyim ỹovita qoỹaano añi 'oono'lli' quecaua diez quecá'ogue cá'maq hueeto'ot na qomyipi, ca' quiyim mashic añi 'oono'lli' quecaua diez quená'ogue ná'maq la na qadañicshiqui', ca 'ỹaañitem na llaalqaipi so Leví, chaqai ná'maq ỹoqa'a ca chicqa'gue quená'maq neetauguilo qamiri, chaqai na na'pelyipi, chaqai ana pa'ỹellipi, qaiyi que'e ná'maq qomyipi ỹalequetauguilo qamiri quecá'ogue cá'maq nisha'a, 13ca' 'xachi' quiñi qara'gaxala', 'ñiracsa':
Ỹim mashic soỹoote'oga quiyi ỹa'a' quená'maq chicqaugui na ỹanecsec sauaaque saanot qami', chaqai mashic saanougui yi llaalqaipi so Leví, chaqai na ỹoqa'a ca chicqa'gue neetalec na qana'laua, chaqai na na'pelyipi, chaqai na pa'ỹellipi. Ca ỹim sepacqajanchigui ná'ogue ná'maq yilachirelec, chaqai sqaica quet cá'maq se sepacqajñigui quenaua'que na relaataxanaxagohi'. 14Ỹim ỹaatqajam sqaica ca sa'ic quena'maxare na' ñaqa seuetaugui so ỹasauaxac, chaqai na' seuetapougui so se no'uen queda ñachaalataxac, chaqai sqaica ca saanot quena leuaxaiquipi. Qami' ỹa'gaxala' qota'olec caỹim, ỹaatqajam ña'xaỹaxane'ta qami', ca sepacqajanchigui ná'ogue ná'maq yilachirelec. 15Ca' nagui, ca' no'uen quiyim namachira'ña quena ñiisashi'me piguim, ca 'ỹaañitem ca rqouagaxa'e' na ralamaxarichi'ipi Israel llaalqaipi chaqai ná'maq 'laua neetalec ná'maq 'ỹaañitema qomi', ná'maq hua'ñi quiyim sqoue na huaca lo'i' chaqai na rapic li'i, dá'maq chaxañi'sac na'le quesaua 'auaxaqa qareta'al.
(26.16—27.11 So llaalqaipi so Israel ỹaatqajam lalamaxareteripi ñi qota'olec. Da lelaataxanaxaquipi ñi qota'olec qoỹeretalgoto saua qari.)
Currently Selected:
Deuteronomio 26: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
