Deuteronomio 24
24
Da leloxoỹaxac quiyim ca ỹale ỹalat aca loua
1Ca no'm 'ue ca ỹale ỹacona aca 'aalo quiyim loua, qam na' ncopa, ca' se nqo'ta ma' 'ue ca lanatec se no'uen, ca ca'maxare ỹo'uet aca ỹiriñi hueetalec nqai'en quiyim nalate'e' aca'maxare, ca' ỹaanem. Ime, ca' ca'e nqai'en ca la'a'. 2Ca aca'maxare quiyim ma' ime ca'e ca la'a', ca ishit o'ñiguit ca liỹa ỹale. 3Qam no'm cá'maq co'uaataxanaxaic loua qai'neeta se nqo'ta ca lanatec, ca lotqai ỹa'ue aca lomalate quiyim ỹalat, ca' ca'e nqai'en ca la'a', loqo'm ileu cá'maq co'uaataxanaxaic loua, 4ca cá'maq 'auaxaic loua tot ishit pila'guit quiyim loua, ma' mashic napio'xot da no'ueenataxac quedá'maq 'neetari'. Ma' dajo 'ueenataxac ỹaatqajam se nqo'ta ñi qara'gaxala', chaqai qamiri se ỹa'maxañi quiyim 'ec na'axachii najo 'laua ná'maq ỹaanema qamiri ñi qara'gaxala' qota'olec quiyim ralamaxarichii.
(24.5-9 'Xoic na naqataxaquipi.)
Ná'maq ỹoreta'oguit naqataxaquipi
10Ca no'm 'ue ca ỹa'ualaxanaxan ca liỹa, qam sqai taugui ca 'imec quiyim 'ue ca icona quená'maq nouenec, ỹahotaque quiyim qaipo'aano'ot. 11Ta'ta'a quiyim hueeta'oguiyi, nauaanta'a quiyim chaqaica cá'maq ỹaanec cá'maq chi louenec lpo'aanec. 12Chaqai no'm 'xoraic cá'maq qaỹa'ualaxanaxan, 'neeto' viraqchiỹa'guit ca pe quiyim sqai pilaxachii ca louenec. 13Ta'ta'a quiyim pilaxachii ca louenec ma' saqa' inoxonñi aca ra'aasa, qaiyi ca'maxare 'ue ca napo'ña queca pe quiyim laq, qaiyi ca'maxare 'ue ca netoonaxac, qaiyi ñi'maxare nqouagueguelo qamiri quiyim 'viichitac dá'maq lo'yaxanec quiyim iuanchiguilo qamiri ñi qara'gaxala' qota'olec.
14'Neeto' quiyim 'ec nouoritac ca 'xoraic, chaqai mesqai qaua' shivichiñii ca laseuete ca lo'ueenataxanaxac, quiyim chi qauori le'ec, loqo'm quiyim ỹoqa'a ca chicqa'gue ra'aayaxauahi queca na'a' ñiita'ñi. 15Ta'ta'a quiyim chaqa'ma' shivichiñii ca lo'ueenataxanaxac queca na'xa'a quiyim saqa' inoxonñi aca ra'aasa. Ma' 'xoraic chaqai ỹouen acajo lauegue, qaiyi 'ue ca loq. Ma' ca'maxare sqoue quiyim ỹashiila ñi qara'gaxala' sauaxat dá'maq 'ñiitari', ca' qamiri 'ue ma'le ca rasauaxashichii.
16Ná'maq neta'allipi quená'maq 'ue na llaalec se pa'aauec nqohin quiyim qaỹalauat quiyim 'ue ca lasauaxaset ca llaalec, chaqai cá'maq ñaalec se pa'a'guit ca lelauaxa nqohin sauaxat ca lasauaxaset ca leta'a. Ta'ta'a quiyim quiñi 'óna ileualec nqohin cá'maq chi lasauaxaset.
17'Neeto' 'viichii ca se ỹa'maxañi quená'maq ỹoqa'a ca chicqa'gue, chaqai quena na'pelyipi, chaqai mesqai coñiỹa ca louenec aca pa'ỹe quiyim lpo'aanec nqai'en. 18'Neeto' couahitaque quiyim qamiri na'aqa na'le quiyi Egipto, qam ñi ra'gaxalari ñí'maq qota'olec caqamiri naqata'alo na'le qamiri quiyi'maxare. Vichiguiño' nagui selarelgoto qamiri quiyim pacqajñichigui dá'ogue dajo.
19Ca' quiyim ỹovita qataxañitac cana la na qadañicshiguii, ca' couahi'e aca nanaqata quena trigo, qam sqo pillihe'oga. Ta'ta'a quiyim 'xañitac, qaiyi ỹaconsop canchaqaica ỹoqa'a ca chicqa'gue quená'maq ỹalequetauguilo qamiri, loqo'm ca na'pelqotam, loqo'm aca pa'ỹe, qaiyi ñi qara'gaxala' qota'olec 'ue ca lqouagaxa caqamiri quecá'ogue cá'maq 'viichii.
20Ca ma' ỹovita quiyim naqachii ana la na qadañicshii 'oliva, ca' mesqai ỹaatqajam nomachitam ana la quena lasotellipi. Ca ná'maq la no'ueenañi, ca' yí 'xañitac, qaiyi lapoon ma'le na ỹoqa'a ca chicqa'gue, chaqai na na'pelyipi, chaqai ana pa'ỹellipi.
21Ca ma' ỹovita quiyim naqachii ana qadañicshii 'uva, 'neeto' paguec nomachitam ana la. Ca ná'maq no'ueenañi la, ca le'neetari' nqai'ñii, qaiyi ne'pala ma'le ná'maq ỹoqa'a ca chicqa'gue, chaqai na na'pelyipi, chaqai ana pa'ỹe. 22'Neeto' couahi'e quiyim qamiri na'aqa na'le queda Egipto. Vichiguiño' nagui selarelgoto qamiri quiyim pacqajñichigui dá'ogue dajo.
Currently Selected:
Deuteronomio 24: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.