Deuteronomio 23
23
Cá'maq qom se qaỹalequeta'piguit
2Ca ñaalec no'm chaqai chicqauec peuaq, ca ca'maxare se qaỹalecqajnougui na llaalqaipi so Israel quiyim ỹovita qanqouagaxainot ñi qara'gaxala', chi ỹovireta'a nqohin quiyim se qaicoñiguit ná'maq chigoxougui ca'maxare.
3Na llaalqaipi so Amón chaqai na llaalqaipi so Moab se ỹalegougui nqohin na Israel llaalqaipi quiyim ỹovita qanqouagaxainot ñi qara'gaxala', chi ỹovireta'a nqohin quiyim se qaicoñiguit ná'maq chigoxougui ca'maxare. 4Ma' na' qamiri quiijlec yi na'laua na' chigoxoita'gue da Egipto, na'maxare se ỹo'uet ca raquipii chaqai ca qanoxohi, chaqai vire'ta ishiueten so Balaam, llaalec so Beor chicqa'gue da Petor quiyi 'laua leenaxat Mesopotamia, quiyim ỹahotaque inaxalgoto qamiri ca se no'uen la'qaatec. 5Qam ñi qara'gaxala' qota'olec se na'xaỹaxana so Balaam. Ta'ta'a quiyim ñiguit nqai'en só'maq se no'uen la'qaatec so lo'yaxanec la'qaatec caqamiri, ma' re'xoriñii. 6Ca' sqai viitaque quiyim nemañiguit chaqai quiyim 'maxachii'tegue na'maxare quenaua'que naua na'xata' quiyim ñaq rca'lliitauec.
7Qam 'neeto' sqai coñiguit na llaalqaipi so Edom, ma' chi qauori laseripi na'maxare, chaqai na Egipto laseripi, ma' qamiri ñiitalec na'le yi na'laua. 8Ca' ỹovira'a quiyim na llaalqaipi so lauaripi na'maxare, qaỹa'maxarenta ỹalegougui na Israel llaalqaipi quiyim ỹovita qanqouagaxainot ñi qara'gaxala'.
Da naqataxaquipi co'teeta nqai'en ca qom
9Ca ma' ỹovita quiyim qamiri nalauachii'e' ca npa'guenaxauahi, ca qamiri 'ue ca nco'matqari quena no'ueenaxa, ỹaatqajam reuogoxoỹa'pegue' quiyim qaica ca ỹo'uet ca se no'uen. 10No'm 'ue caqamiri ca 'ec napio'o da no'ueenataxac quiyim se nauate ca nac queca pe quena lagueleteripi, ca 'maxaraic quiyim ca'maxare ca'e ca loma' na ỹalliripi, ca' se ỹoviro quecá'ogue ca na'xa'a. 11Ca ma' mashic avit, ca ca'maxare ỹaatqajam nquiỹoota, ỹahote'e na huaxaỹaq. Ca ma' inoxonñi aca ra'aasa, ca ca'maxare lotqai pila'a ca co'matqa'.
12Ca' ỹaatqajam qaỹa'ue ca naguelet loma', qam qoỹoqote'oga nqohin queca co'matqa'. 13Queca no'goxonqateripi, ca' ỹalequeta'guit nqohin ca shichiguit, qaiyi quiyim qaiuet ca naguelet, ca' qani'ỹaguiñi aca lahi'. Ca ma' ime, ca' qaỹapolec quena 'laua ca naguelet. 14Ma' ñi ra'gaxalari qota'olec ỹalequetauguilo qamiri quena nco'matqari, quepaqataxanteguelgoto qamiri, chaqai ỹo'uet quiyim qadoxoñiguii ca npa'guenaxauahi. Ca' vichiguiño' cá'maq nco'matqari ỹaatqajam co'teeta nqai'ñii, qaiyi ñi qota'olec qaica ca iuana se no'uen queca'maxare, ma' no'me', ca' noỹootec caqamiri.
Da leloxoỹaxac quiyim 'ue ca qaiquepaqataxanlec
15No'm 'ue ca na'ac 'eetapeguem ca na'co', ca' rashiilaxan quiyim na'ñi ca ra'aari, ca' sqo pilaxachim cá'maq shi'gue na'co'. 16Ta'ta'a quiyim 'xañitac quiyim nauguilo qamiri, ca' ỹoiquentac quiyim na'ñi cá'maq nqo'ta na'a'. 'Neeto' 'ue ca ỹoqocatac.
(23.17-25 Nelaataxanaxaquipi chaqai ná'maq se qaỹa'maxaren.)
Currently Selected:
Deuteronomio 23: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
