2 Timoteo 4
4
1Ca' dajo ỹaqataxac saanem qami' nagui ỹaatqajam ỹauanchiguilo qomi' nagui ñi qota'a chaqai ñi qara'gaxala' Jesucristo, ma' nac ma'le quiyim nachaxan quiyim nashi, ca' imit na qomyipi quená'maq nca'leetauec chaqai ná'maq mashic ileu. Ca 'xoic da ỹaqataxac caqami', 2quiyim ỹaatqajam 'xachi' da na'qaatec, nquipichira'pegue' quiyim 'ue ca redaaqachi' chaqai 'eno'm qaica ca redaaqachi'. Vire'ta quiyim shichi' ca qom, chaxañi' ca lo'maxac, qachita, chaqai ỹaatqajam neualaxaviñire'e' quiyim paxaguiñi'. 3Ma' 'uo' ma'le ca na'xa'a quiyim na qomyipi tot ishit na'ñaxachiguit cá'maq no'uen napaxaguinataxanaxac. Ta'ta'a quiyim quelec da chi lqo'itaxanqachic, ca' ỹahotaque quiyim 'xoic ca napaxaguinatqo' quiyim qaỹapaxaguinegue qaicaata cá'maq nqo'ta 'xaỹa. 4Ca' ỹapoguilo naua lque'la lauaco, qaiyi sqa 'xaỹa dá'maq ỹaatqajam llic leloxoỹaxac, ca' huelec ná'ogue nanchaqaina la'xaỹaxac. 5Qam qami' ỹaatqajam na'maxachite', chaqai na'ñaxachichiguit da re'xoriqui', quirelec 'xachisac da na'qaatec chicqaugui da nca'laxa, repaquiterelco' da ro'ueenataxanaxaqui'.
6Ma' da ñachaalataxac mashic qoỹaanot ñi qota'a, 'nejme' caua neuo' quiyim qaỹocorelec aca ncopatoxonaxalate, ma' mashic tot ladoc ca ñachaalataxac. 7Ma' mashic somat quiyim ñco'uaateguelec da ỹo'ueenataxanaxac, chaqai somat da ñalliquinaxac. Ỹaatqajam llo'qoochiguiñi da npi'ỹaxac. 8Ca' nagui nauaantaiguit ca ñishiue' quedá'maq lalamaxa da ñachaalataxac, qam dajo nañaañim so qara'gaxala' Jesús quecajo na'xa'a, só'maq se ỹo'maac quiyim imit ca qom. Qam mesqaỹimeta nañaañim, ma' qai'neeta ỹaanem ná'ogue ná'maq 'xoic lqo'iichi queca loviraxac.
Dá'maq naqataxac tai'ot so Timoteo
9Ỹaatqajam se naỹaloxoriñi' quiyim naquirepegue' najo, qaiyi ñauane'e' qami'. 10Ma' so Demas yalat, ma' ỹapacqajnauec na lqo'itaxanqachic quená'maq huelec najo, ca' taigue da Tesalónica. Chaqai so Crescente taigue da Galacia, chaqai so Tito taigue da Dalmacia. 11Chaqaiñiita ñi Lucas ñaq iỹaatac. Daañiraco' ca Marcos, ca naviquisa'pegue' ma'le, ma' ca'maxare ishit yotauan queda qaro'ueenataxanaxac. 12Ca' so Tíquico selategue da na'a' lodegaxat Efeso. 13Ca ma' naqui', ca' quiyi Troas ne'xachi' aca ipooto, spo'aana'ñi na'le yi la'a' ca Carpo. Chaqai ne'xachi' ma'le caua ñilere, chaqai cauá'maq ỹaatqajam ỹeraxanaxalate.
14Ca lecat lo'o leenaxat Alejandro ỹaatqajam 'xoic na se no'uen 'ne'tegue caỹim, qam so qara'gaxala' ishiueten ma'le dá'ogue dá'maq 'ne'tegue caỹim. 15Qam qami' rovichiro'o' so'maxare, ma' so'maxare ỹaatqajam se nqo'ta da na'qaatec sa'xatqatac.
16Na' ñaqai chita'gue so'uet da itaxaỹaxac quiyim setaxaỹa'pegue' na nashillipi, qaica ca yotauan quiyim retaqalec aỹim. Ná'ogue yalat, qam no'uen quiyim ñi qota'a se ra'igui dá'ogue dajo. 17Qalaxam ñi qara'gaxala' Jesús yotauan, ca ỹo'uet ca ỹa'ñaxac quiyim yipaquejlec quiyim sa'xat da na'qaatec chicqaugui da nca'laxa, qaiyi 'xaỹa dajo ná'ogue ná'maq sqai judioipi. Ca' chaqaida 'neeta quiyim so qara'gaxala' nca'laxatec aỹim quesó'maq toxonaxai. 18Chaqai quepaqataxanlec aỹim quená'ogue ná'maq se no'uen, chaqai ỹoxojñi aỹim, qaiyi sovirau'a ca lo'ueenataxanaxac hueeto'ot na piguim. Ma' so'maxare hueeto'ot dá'maq qaremaqajnataxanaxac qaica lqodoc. Ajá'a, ca' chaqaida 'neeta dajo.
Dá'maq pa'aatec liquinaxanaxac so Pablo
19Selata da iquinaxanaxac aca Prisca chaqai ca loua Aquila, chaqai ca lauo' laseripi ca Onesíforo. 20Ca' ca Erasto no'ueena'ñi yi Corinto, chaqai ca Trófimo ño'ueenaqta'ñi yi Mileto, ma' ralolaxaic. 21Riỹalli'saco' quiyim na'itquena ma' saqa' novi' ca no'oomaxa. Ilata qami' da liquinaxanaxac ñi Eubulo, Pudente, Lino, chaqai añi Claudia, chaqai ná'ogue na qarqaỹaripi.
22Ñi qara'gaxala' Jesucristo ỹalequetauguilo qamiri, chaqai ñi qota'a ỹaanema qamiri da no'uen qayicyaxaguii. Ajá'a, ca' chaqaida 'neeta dajo.
Currently Selected:
2 Timoteo 4: MCV91
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.