2 Timoteo 3
3
Dá'maq no'ueenataxac na qomyipi quecaua pa'aaterec na'xata'
1Chaqai qai'neeta 'yiiñi' ma'le ma' nepalata ca nqodoc, ca' novirero naua na'xata' 'xoic lqalaigue'. 2Ma' da no'ueenataxac na qomyipi 'neetasa': chi nauotalta', chaqai queeta'pegue' da lamaanaxanaxa cana plata, nemaqajnaxai, napacqajnaxai, se no'uen na ỹa'xat quiñi qota'a, se na'xaỹaxana na leta'allipi, qaica ca ỹauaaque ca nqouagaxa, chaqai qaica ca ỹauaaque da na'qaatec. 3Ma'le, ca' se re'xorenataxan, chaqai se ỹauotegue ca liỹa, chaqai la'axaqa lo'o', se netelalta', chaqai qa'uaic, chaqai ỹaatqajam npa'guenaxaua dá'maq ỹa'maqachiguiñi. 4Chaqai 'laqataxanaxai, chaqai se illivigui lauel, chaqai ỹaatqajam 'xoic napacqajnaxac, queeta'pegue' dá'maq chaqai 'neetari', ca' sqai queeta'pegue' ñi qota'a. 5Na'maxare qaidaata quiyim 'naac queetalec da na'qaatec, qam se icoñiguit cá'maq ỹaatqajam lquesaxanaxa da'maxare.
Ca' 'ena ná'maq rovichisa'a ma'le. 6Ma' quena'maxare 'ue na ỹovira'a ca na'a', ca' ỹayin ana 'aalo se noqoc chaqai naỹa'que naua no'ueenataxaco. Najo 'aalo queeta'pegue' ná'maq chi lqo'itaxanqachic, 7ỹaatqajam ỹahotaque 'ue ca ỹa'den, qam se ishit quiyim ỹa'den cá'maq ỹaatqajam lliqueta. 8'Nejme' saua 'viiquiaxaiqa Janes chaqai so Jambres npa'guenda'e' so Moisés. Ca' qai'neeta ma'le na qomyipi ỹaatqajam npa'guena'e' dá'maq ỹaatqajam lliqueta leloxoỹaxac. Na'maxare tot ỹalamaq da la'deenataxanaxac chaqai ỹit dá'maq llicyaxac da npi'ỹaxac. 9Qalaxam na'maxare sqoỹoxogue ma'le da llicyaxac, ma' sqaỹaloq qaỹa'den ma'le quiyim qaica ca ỹa'den. Qam na'maxare qohine'tegue dá'maq 'neete' saua dos npa'guenda'e' na'le so Moisés.
Só'maq pa'aatec laqataxac so Pablo queso Timoteo
10Qam qami' mashic 'yiiñite' dá'maq ỹapaxaguinataxanaxac, chaqai quedá'maq ỹa'maqachiguiñi shintari', quedá'maq sahotaque, da ipi'ỹaxac, chaqai da iualaxavic, ỹoqo'iichi, quiyim ña'ñaxachiguit ná'ogue nanchaqaina 11queda ñocanaxac chaqai da i'xoric. Chaqai mashic 'yiiñite' dá'ogue dá'maq qohine'tegue aỹim na' senta'ñi yi Antioquía, Iconio chaqai Listra, chaqai da i'xoric quenaua ñocanaxaco. Qam ñi qara'gaxala' nca'laxatec aỹim quená'ogue. 12Qam ỹaatqajam lliqueta quená'maq quejlec so Cristo Jesús, qai'neeta ỹovirau'a da le'xoric queda nocanaxac. 13Qam na hualoxonyipi chaqai na 'maatqaiquipi taata'nquira, noquiiqueta'guit ná'ogue na se ỹa'maxañi. Na'maxare rayinaxantac, qam na'maxare qai'neeta qaỹayintac.
14Qam qami' ỹaatqajam quiiterelco' da napaxaguinataxaqui' ỹaatqajam llic nqai'ñi', ma' qami' 'yiiñite' negue' cá'maq rapaxaguiñitegue dajo. 15Ma' na' ñaqaqami' noctoqui' chaqa'ma' 'yiiñi' naua naneresañi la'qaatqa ñi qota'a, ma' ishite' rapaxaguiñi' chaqai raviquira'guit da nca'laxa dá'maq chicqochigui da qarpi'ỹaxac queso Cristo Jesús. 16Naua'que naua nerecse' la'qaatqa ñi qota'a, naua'maxare ỹichiñi nqai'ne' so la'qaataxanqajanqaipi. Ca' naua'maxare ta'chiguit qarapaxaguinataxanque chaqai qaỹachaxan da leloxoỹaxac, chaqai quiyim qaỹa'maxajñi ca nasauaxaset, chaqai quiyim qaỹachaxan cá'maq lalamaxa dá'maq co'teeta qanachaalataxac, 17qaiyi cá'maq lelaatec ñi qota'a ỹaatqajam na'maxachichiguiñi quená'ogue, ca' ta'chiguit ỹo'uet canchaqaica no'ueenataxanaxac ỹa'maqachiguiñi.
Currently Selected:
2 Timoteo 3: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
