1 Corintios 6

Qaỹashiila ca nashi quená'maq saqa' icoñiguit da na'qaatec quiyim ỹa'maxajñi ca nasauaxaset

1Ca no'm 'ue ca 'óna caqamiri 'ue ca lasauaxaset queca liỹa quená'maq mashic icoñiguit da na'qaatec, ca quepegue' ca nashi saqa' icoñiguit da na'qaatec, ca ¿chi'negue ma' se roỹaxanougui na lalamqateripi ñi qota'a? 2Loqo'm ¿sqa 'yiiñii quiyim na lalamqateripi ñi qota'a imit ma'le ná'ogue na hueetalec na 'laua qomyipi? Ca no'm qamiri michii ma'le na'maxare, ca ¿sqai shichio' michii dá'maq qaica ca nishaaque? 3¿Sqa 'yiiñio' quiyim qomi' sovirqau'a quiyim semitaq ma'le qai'neeta na chicqashiguim qota'a lelaatqaipi? Ca ¿chi'negue queta' se qaralou'a ná'maq sqaica ca nishaaque hueetaugui da qanachaalataxac? 4Ca no'm 'ue ca se ỹa'maxañi hueetalgoto qamiri, ca ¿chi'negue ma' ỹaxañiỹa ca sqaica ca taỹapegueu'a quena mashic icoñiguit da na'qaatec quiyim 'ue ca ỹa'maxajñi? 5Ca' dajo shinac, qaiyi 'ue ca rayiloxohi. Ma' 'eco' qaico' ca 'oonoqui' ishit imitaque ca leloxoỹaxac cajo quená'maq nqaỹaripi. 6¿Peeta'a ỹouen ca mashic icoñiguit da na'qaatec quiyim 'ue ca qaỹasauaxat queca lqaỹa lpi'ỹaxaua quiyim quepegue' ca nashi saqa' icoñiguit da na'qaatec quiyim ỹa'maxajñi?

7'Nesa ma' llic quiyim qaidaata quiyim se neuojñiỹata', chaqa'ma' re'oq quiyim 'xoic la'aaxa da hueetanguilo qamiri. ¿Chi'negue ma' se na'ñaxachiiguit da se no'uen? ¿Chi'negue ma' sqai 'xañiỹac quiyim liyi qarocachiỹoto qamiri? 8Qam qamiri lama'xa 'viichii da se no'uen chaqai cuachiỹot ca rqaỹahi rpi'ỹaxauahi.

9-10¿Sqa 'yiiñio' qamiri dajo, ma' queca ỹo'ueetetac ca se ỹa'maxañi queca liỹa, ca se ishit inoxonou'a ca ñaq naataho lo'ueenataxanaxac ñi qota'a? 'Neeto' lotqai quiita'uegue ca nayinaxaguii, ma' se ishit inoxonou'a ma'le da lo'ueenataxanaxac ñi qota'a ná'maq ñaqai queetalec da nedequenaxac, chaqai na ñaq nqouagaxaintacot ca nashiilec, chaqai na lapaatapi'ñi' aca se loua, chaqai ca hueeta'piguit ca nallishiua, chaqai na cuataxaiquipi, chaqai namataxalaic, ne'taaxai, la'axaqa lo'o', chaqai ỹayin ca liỹa quiyim naqat aca lam. 11Quedajo 'ue quen na 'neetari' caqamiri quesom. Qam nagui mashic qamiri qaico'taxate', chaqai mashic nañaañiỹot ñi qota'a, chaqai ñi'maxare mashic ỹa'maxarente' qamiri. Qam dajo chicqochigui da leenaxat so qara'gaxala' Jesús chaqai so Espíritu chicqo'ot ñi qota'olec.

Na qaroshicmaxa quiyim lalamaxat ñi qota'a

12Ỹaatqajam llic da na'qaatec 'naac: “Quiñi 'óna se qaỹollapeguem quiyim ỹoiquentac cá'maq shim ỹo'uet”, qam mesqai ná'ogue no'uenaxat ca qom. Ajá'a, llic quiyim se qaỹollapeguem ca 'óna quiyim ỹoiquentac cá'maq ỹo'uet, qam quiyim ca qom mesqai ỹaxane'tegue quiyim chi ncoñiralta' quecá'maq ỹo'uet. 13Ỹaatqajam llic dá'maq qohinac: Quiyim na na'ic qaỹo'uet quiyim taỹa'ña añi qaracom, chaqai añi qaracom qaỹo'uet qaiyi taỹapi'ña na na'ic. Qam ñi qota'a ỹomate' ma'le ñaua dos. Qam dá'maq sqai llic quiyim na noshicmaxa tau'a nqohin ca dequenaxac. Chaqaidaata quiyim lalamaxat nqohin so qara'gaxala', qaiyi ma' novi' so qara'gaxala', ca nca'laxatec na qaroshicmaxa. 14Ca' ñi qota'a ma' nca'leuec nqai'en so qara'gaxala' na' qaỹalauat, ñi'maxare qai'neeta nca'laxaterec qomi' ma'le, ỹahote'e da chi lquesaxanaxa.

15¿Sqa 'yiiñio'da, quiyim ca loshicmaxa quiñi 'óna na'deetau'a ca loshicmaxa so Cristo? Ca ¿peeta'a seshit ñaqateu'a na ỹoshicmaxa na'deetau'a so Cristo, ime, ca' na'deu'a nqaishin ca loshicmaxa aca nedequenaxai? ¡'E', sqaica ma' shi'ntegue queto' dá! 16¿Loqo'm sqa 'yiiñii quiyim quena' ca ỹale o'ñiguit aca 'aalo nedequenaxai, ca' quecaua dos 'neesari' ca 'oonoqui' noshicmaxa? Ma' naua nerecse' la'qaatqa ñi qota'a 'nerac: “Caua dos ỹovirera'a quiyim 'eco' 'oonoqui'.” 17Ca' vichiguiño' queca qom no'm na'deetau'a so qara'gaxala', ca 'neesari' ca 'oonoqui', ma' ncoñiresagui so Espíritu Santo.

18Ca vichiguiño' 'iichiỹapeguem da dequenaxac. Canchaqaica liỹa quená'maq nasauaxaset quiyim ỹo'uet ca qom, qam se ishit pa'aauo quena loshicmaxa. Qam ca queetalec da nedequenaxac, ca ca'maxare chi ỹasauaxat ca chi lalamaxat loshicmaxa. 19¿Sqa 'yiiñio' qamiri quiyim na roshicmaxahi mashic lauo' so Espíritu Santo, só'maq ỹaanema qamiri ñi qota'a, chaqai so'maxare mashic neetauguilo qamiri? Ca' qamiri se ralamaxarichii dá'maq no'ueenataxaguii, 20ma' ñi qota'a lishiujnaxanqate' qamiri, qam chalego lecaic ca nishiuetenaxaguii. Ca' no'uen quiyim machii'ot quiyim pacqajñiỹauec ñi qota'a quena roshicmaxahi chaqai queda no'ueenataxaguii, ma' naua'que lalamaxarete' ñi qota'a.

Currently Selected:

1 Corintios 6: MCV91

Highlight

Copy