1 Corintios 10
10
Da naqataxac quiyim se qanqouagaxainot ca nashiilec nqolac
1Ma' ỹim, qamiri ỹaqaỹarolqa, sahotaque ỹaatqajam 'yiiñita quiyim so 'auaxaic qareta'allipi sá'ogue ỹaatqajam hueeto'ot so naueguelec só'maq ỹashaxantac, chaqai sá'ogue paca'ta aso huaaxai, leenaxat Huaaxai Toc. 2Ca' chaqaida 'neeta quiyim sá'ogue qanachilaxan ma' na'deetau'a so Moisés queso naueguelec chaqai caso huaaxai. 3Chaqai qaican ỹapaguec sá'ogue ỹa'queetac so na'ic se re'xogui, 4chaqai sá'ogue ni'chigui so niquip se re'xogui. Ma' ne'teetapigui so huaxaỹaq chicqotapougui aso qa' se re'xogui queeta'pegue' so'maxare quecanchaqa taigue. Ca' sojo qa' chaqaiso so Cristo. 5Qam qaiyiita 'xoico' so se ỹa'maxagui lauel nqai'en ñi qota'a, vichiguiño' 'ue na ileu huaalec so 'laua qaica qom.
6Ca' dá'ogue dajo huaugui so qomyipi ma' qaỹahotaque quiyim 'ec qanapaxaguinataxac, qaiyi se qarqo'ta ca se no'uen, sqai 'nejem dá'maq 'ne'tegue so qomyipi. 7Vichiguiño' qamiri se ishit denaxachii da 'ne'tegue so qomyipi, ma' 'uo' quen na nqouagaxainot na nashiilec nqolac, ma' naua naneresañi la'qaatqa ñi qota'a 'nerac: “So qomyipi nqa'xanñi. Ime, ca' ỹo'uet so lqui'ỹaxac chaqai ne'et. Ime, ca' nachajñi, ca' ỹo'uet ca lemaqachic.” 8Qai'neeta se salegaxaugui na nedequentac, sqai 'nejem da 'ne'teco' na'le so'maxare ma' 'uo' na nedequen, ca vichiguiño' ileuo' so veintitres mil qomyipi queso 'oonoqui' na'xa'a. 9Chaqai qai'neeta se se'guenqatac so qara'gaxala', 'nejem da 'ne'teco' so 'auaxaic qomyipi quiyim 'uo' na i'guen so'maxare, ca' vichiguiño' 'uo' na ileu quena' qaỹa'ac quena nanaic. 10Chaqai se na'quiaaxat ñi qota'a, 'nejem da 'ne'tegue so'maxare quiyim 'uo' quen na queeteguelec ñi'maxare, ca' qanalauajñi queso lelaatec nalauataxanqajnec.
11Ca' dá'ogue dajo huaugui nqohin so 'auaxaic qareta'allipi, ca' qoỹiriñi ma' qaỹauaaque naloqojnaxanaxat quiyim qaraqatalo qomi' quenaua pa'aaterec na'xata'. 12Ca' vichiguiño' quiyim 'ue ca 'neetapega ra'ñichiguiñi, ca' no'uen quiyim netelañi, qaiyi sqai huaañi. 13Da ne'guenaxaguii novitalo qamiri, da'maxare ỹaatqajam 'nejem da ne'guenaxac ná'ogue na liỹaripi. Qam qamiri lama'xa pi'iỹa'a ñi qota'a ma' ñi'maxare se ỹasene'tema qamiri quiyim paguec ca ne'guenaxaguii quecá'maq tot ralohiguit. Chaqaidaata quiyim novi' ca ne'guenaxaguii, ca ñi'maxare ỹa'ue ca la'maqa' quiyim qarayichii, qaiyi ralohita'piguit.
14Vichiguiño' qamiri ñauochaxaua' ỹaqaỹa', 'maxaraic 'iichiỹapeguem nagui quiyim nqouagaxaiñitacot ca nashiilec nqolac. 15Dajo itaxaỹaxac caqamiri shiñitaxaric quiyim qamiri 'deenaxanqachaqaiquipi, chaqai qamiri shichii quiyim nimichiguit da shinac. 16Ana qane'taxaqui quena' qaỹoỹoote'oga quiyim ñqouagaxainaxalec, ime, ca' saanqot da qana'aachic ñi qota'a, ana'maxare ỹovira'a quiyim 'eco' qomi' salecqau'alo saua leuo' so Cristo. Ca' qaican ỹapaguec na pan quena' sasectaxataxagui ỹovira'a quiyim salecqau'a ca loshicmaxa so Cristo. 17Ca 'eno'm qomi' 'xoic, qam qomá'ogue sa'guinaq ñouanqachigui so 'oonoqui' pan, ca vichiguiño' 'ec qomi' 'oonoqui' noshicmaxa.
18Ñaqa 'ajñii na llaalqaipi so Israel quená'maq ỹa'queetac na nachitaxanataxanaxat huaca la'at quená'maq qoỹaano, ca na'maxare qai'neeta ỹalecau'a so nachitaxanataxanaxat. 19Sqai shinac quiyim ca nqolac 'ue ca 'negue chaqai ca nachitaxanataxanaxat la'at sqai paguec 'ue ca 'negue queca liỹa la'at. 20Dá'maq 'neeta dá'maq shinac quiyim quená'maq saqa' iuanapega ñi qota'a, quena' ỹovita quiyim ỹa'ue ca lachitaxanataxanaxat, ỹaanot na lelaatqaipi so na'ỹaapec, ca sqa taỹot ñi qota'a. Ca' se sa'maxaren quiyim qamiri lliguiỹau'a ca 'neeta na lelaatqaipi so na'ỹaapec. 21Ca' se ỹa'maxañi quiyim ni'chiigui aca 'taxaqui tai'a quena' qoyiuelec so qara'gaxala', ca ime lotqai ni'chiigui aca 'taxaqui tai'a quena' qoyiuelec na lelaatqaipi so na'ỹaapec. Chaqai se ỹa'maxañi a'guii ca na'ic tai'a quena' qaỹo'leente so qara'gaxala', ime lotqai a'guii ca na'ic mashic qoỹaanot na lelaatqaipi so na'ỹaapec. 22¿Loqo'm sahoqotaque qomi' quiyim co'ualaxan so qara'gaxala'? ¿Pagueco' qarquesaxanaxa queso'maxare?
Da ne'xorenataxanaxa chaqaida ỹo'uet quiyim qaicanqaida queda qano'ueenataxac
23'Nesa quiyim llic da 'neeta da na'qaatec, 'neetasa': “Se qaỹollapeguem queca qom quiyim ỹoiquentac quecá'maq shim 'ne'tegue ca ỹo'uet”, qam mesqai ná'ogue na leloxoỹaxaquipi no'ueenaxat ca qom. Ajá'a, qaica qaỹollapeguem quiyim ỹoiquentac quecá'maq shim ỹo'uet ca qom, qam sqai ná'ogue rotaanaxanegue da no'uen ñaqtaxac. 24Daañiỹaque quiyim ỹa'maxañi ca liỹa, mesqai daañiỹaque ca chi ra'maxahi.
25Qamiri a'guii ná'ogue na la'at nemeenec queca la'at lahi'. Sqai nataxañitac queca chicqa'gue, qaiyi qaica ma' se ỹa'maxañi quet ca ra'deenataxanaxaguii. 26Ma' na 'laua chaqai ná'ogue na hueetalec ỹaatqajam lalamaxat ñi qara'gaxala'.
27Chaqai no'm 'ue ca saqa' icoñiguit da na'qaatec roỹaxanalo qamiri quiyim rqui'ỹaxauahi, ca' qamii a'guii cá'ogue cá'maq qoỹaanem qamii. Sqai nataxañigue negue' ca chicqa'gue, qaiyi qaica ca se ỹa'maxañi ra'deenataxanaxaguii. 28Qam no'm 'ue ca 'naac caqamiri: “Najo la'at, na'maxare nachitaxanataxanaxat shi'gue qoỹaanot ca nqolac”, ca' sqa 'guii, qaiyi se que'maqachichii cá'maq ra'qaataxanema qamiri, chaqai qaiyi se ỹa'maxañi ca na'deenataxanaxac. 29Quedá'maq sa'xatetac taỹaugui cá'maq la'deenataxanaxac ca liỹa, mesqai taỹaugui qami'.
Qam 'uo' ma'le ca renataxangue: “¿Chi'neco' ma' 'ue quet ca hueetapigui quet iuel nqai'en ca la'deenataxanaxac ca liỹa quiyim 'ue ca sa'queetac? 30Ma' quiyim aỹim saanot ca ña'aachic ñi qota'a quecá'maq sa'queetac, ca' ¿chi'neco' quiyim aỹim qoyiqueteguelec quecá'maq sa'queetac?” 31Hua', no'm qui'ii, loqo'm ni'chii, loqo'm canchaqaica liỹa 'viichii, 'viichii ná'ogue, qam maqajñitac ñi qota'a. 32Mesqai viitaque quiyim 'ue ca huaañi nqai'ñii quena judío laseripi, loqo'm ca sqai judío le'ec, loqo'm quena mashic icoñiguit da la'qaatec ñi qota'a. 33Ỹim ma' quiyim chaqaỹim sahotaque quiyim ná'ogue ỹa'maxarenta quecá'maq so'uet, ma' se semitetaque ca chi ỹa'maxa, ta'ta'a ca la'maxa ca liỹa, sha'apiguito' quiyim 'ue ca nca'leuec.
Currently Selected:
1 Corintios 10: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
