Genesis 38

Judapa llumchuynin Tamarmi dirichunta bälichin

1Chay timpucunam wawꞌi-caśhancunapïta Juda japächaculcul Adulam malcaćhu apanacuśhan Hira śhutiyu nunap wasinćhu yaćhamü licula. 2Chayćhümi Canaan caśhta Sua śhutiyu nunap walmi chulinta Juda lisïlun. Chaymi paywan cuscapäcula. 3Paymi patayu licalilcul walaśhta ishyacüla. Paytam “Er” nishanwan śhutichäla. 4Chaypïta yapa patayu licalilculmi walaśhtatac ishyacüla. Paytañatacmi “Onan” nishanwan śhutichäla. 5Chaypïta Quezib malcaćhu Juda cayaptinmi walmin yapa patayu licalilcul ishyacüla. Paytam “Sela” nishanwan śhutichäla.

6Ñä Judapa wamä chulin Er casaracuyninman ćhäluptinmi Tamar nishan wamlawan casarächila. 7Judapa chay wamä chulin Ermi Tayta Diospa ñawpäninćhu juyu mana allin lulä cala. Chaymi Tayta Dios wañuyta talïchila.

8Jinaptinmi Juda chulin Onanta nin: “Alma mayurniquip walminwan amñari yapacuy milayninta śhalcachinayquipä”#Deut 25.5-6. nil.

9Chaymi Onan cuscäśhaña cayal: “Milayní captinpis yaꞌapächun imatá canꞌa” nil patayu mana licalinanpä puñupäcuśhanćhu juc läduman śhutuchï-śhutuchï cala. 10Cay lulayninmi Tayta Diosta piñachila. Chaymi paytapis wañuyta talïchila.

11Jinaptinmi llumchuynin Tamarta Juda nin: “Taytayquip wasinta cuticuchcay aśhta chulí Sela müsunancama” nil. Chaynu nila “Yanꞌalätac mayurnincunanu Selapis wañülu imanman” nilmi. Niptinmi Tamar taytanpa maquinćhu yaćhamula.

12Achca watapïñatacmi Judapa walmin wañucula. Sua nishanpa chulinmi pay cala. Chay lutunta jitalculñam Adulam caśhta Hirawan Timnat malcäta lipäcula uwishninpa millwanta lutuchimü.

13Ñatac Timnat malcäta millwa lutuchï suydrun lishanta llumchuynin Tamar yaćhälunmi. 14Chaymi lutunta juluculcul mana lisinanpä cäranta śhucupaculcul Enaim malcäman yaycunanćhu Tamar alcala. Chay cayäla Timnat malcaman lina caminup patanćhümi. Chayta lulala cuñädun Sela müsuña cayaptinpis suydrun mana cuscachiyta munaptinmari.

15Ñatac cäranta śhucupacüśha chayćhu täcuyaptinmi “watica walmićh” nil Juda nila. 16Chaymi chay walmiman aśhuycul: “Amwanmi puñuycuyta muná” nin. Chaynu nila llumchuynin caśhanta mana lisilmi.

Niptinmi walmica: “Imactaćh umanquiman puñuycuptinchic” nin.

17Niptinmi Juda: “Jucnin capischätam apächipamuśhayqui” nin. Niptinmi walmïñatac: “Prindacta caćhaycamay, apachimumänayquicama” nin.

18Chaymi Juda: “¿Imäta caćhaycunätam munanqui?” nin. Niptinmi: “Caćhaycamay surtijayquita, garutiquita, wiꞌaw watacuyquitapis” nin. Chaynu awniyculmi Tamarwan puñuycul patacta talicächila. 19Chaypïtam Tamar wasinta cuticulcul śhucupanta wicapaycul lutu müdananwan caśhan ćhulacüla.

20Ñatac Juda chay prinda caćhaycuśhanta unanpämi, apanacuśhan Adulam lädu nunawan limalicuśhan capischäta chay walmiman apachila. Ñatac maynu ashilpis manam talilañachu.

21Chaymi chayćhu cä nunacunäta tapupacula: “¿Manachun licalanqui Enaimpa caminu patanćhu alcä watica walmïta?” nil. Niptinmi: “Manam cayćhu ima waticapis canchu” nipäcula.

22Chaypïta Judaman cutilculmi: “Manam talimüchu. Chayćhu nunacunäpis ‘cayćhu manam ima watica walmipis canchu’ nipämanmi” nin.

23Niptinmi Juda: “Chayurá jinañari chaywan quïdacuchun manaña asipäcamänanchicpä. Yaꞌa limalicuśhá capischäta apayächiptïpis payꞌa manam calachu” nin.

24Ñatac quimsa quillapïtanümi Judata willälälin: “Llumchuyniqui Tamarmi waticaculcul patayu cayan” nil. Chayta uyalilculmi Juda: “¡Malcapi aysalcälil lluy cañaycäläliy!” nicuyan.

25Ñä malcapi aysayalcaptinmi suydrunman caćhäla cay nil: “Cay prinda uywaśhäcäpactam patalayá. ¿Lisiycuy má, mayanpam cay surtija, garuti, cay wiꞌaw watacuca?” nin.

26Chaymi Juda quiquinpa caśhanta lisilcul: “Yaꞌami juchayu cá; payꞌa mana juchayümi. Chulí Selawan mana casarachiynïwanmi caynu lulalá” nin. Chaypïtam Tamarwan manaña mastá puñulachu. 27Ñatac ishyacunan muyun ćhämuptinmi awachacta pataläña. 28Chay jucnin ñä näsilpayämulmi puntächimun maquinta. Chaymi atindïca “Caymi puntaca” nil maquinman puca puchcacta wataycula. 29Ñatac maquinta caśhan cuticalcachiptinmi juccäca puntacta näsïmun. Chaymi: “¡Imanuypatá yalamunayquipä quićhamulanqui!” nil Fares#38.29 Fares ninanꞌa hebreo limayćhu “quićhacacun” ninanmi. nishanwan śhutichäla. 30Jina ipanmanmi puca puchcawan maquin wataśhancäpis näsïmula. Paytam Zara#38.30 Zara ninanꞌa hebreo limayćhu “achqui” ütac “chipipicya” ninanmi. nishanwan śhutichäla.

Currently Selected:

Genesis 38: QVW

Highlight

Copy