Exodo 6

1Niptinmi Tayta Dios: “Cananmi licanqui Faraoncäwan imacta lulanätapis. Nanay maquïwanmi malcäta caćhaycachishä. Nanay maquïwantacmi quiquillan caćhaycunꞌa” nin.

2Juc cutićhüñatacmi Moisesta Tayta Dios nin: “Yaꞌapa śhutí Tayta Diosmi. 3Ñatac Abrahamman, Isaacman, Jacobman camalachiculá sumä munayniyu śhutiwanmi. Tayta Dios shutïtá manamari camalachiculächu.#Exo 3.13-15. 4Paycunamantacmi jamapacünülla capäcuśhayqui Canaan allpäta unäpä limaliculá. 5Cananmi Israel caśhtacunäta Egipto nunacunaca ñacachipäcuśhanpi apalcaćhaywan mañacuyninta uyalïlul limalicuśhäta yalpälú.

6“Chaymi Israel caśhtacunäta ninqui: Yaꞌami Tayta Dios cá. Egiptop maquinpïta yaꞌami juluycuśhayqui. Uyway capäcuśhayquipïtapis sumä nana-nanay maquïwanmi tincüninman-cama licaycul libraycälishayqui. 7Amcunam malcá capäcunqui; yaꞌañatacmi Tayta Diosniqui caśhä. Chaynüpam yaćhaycälinꞌa yaꞌa Tayta Diosniqui Egiptop ñacachiyninpi julaycälishacta. 8Jinalculmi Abrahamman, Isaacman, Jacobman limalicuśhá allpaman puśhaycapäcuśhayqui. Yaꞌa Tayta Diosmi cay allpacta tücäniquipä uycälishayqui” nil.

9Cay nishantam lluy Israelcunäta Moises willaycula. Ñatac Israel caśhtacunacá ancha-anchap ñacayninwan jucmanyäśha cayalcalmi mana cäsütuculcälachu.

10Chaymi Moisesta Tayta Dios nin: 11“Egiptop mandacünin Faraonman lil niycamuy: ‘Cay malcayquipïta Israel malcantaśh caćhaycapunqui’ ” nil. 12Niptinmi Moises: “Israel caśhtacunäpis mana cäsuyalcämaptinchun ¿aclluśh shimi cayaptïla Faraonca cäsümanman?” nin.

13Chaypïtam Tayta Dios Moisestawan Aaronta camachila, Israel caśhtacunäwan mandacü Faraoncäwan limananpä, jinaman malcanta Egiptopïta julumunanpäpis.

Moisespawan Aaronpa milaynincuna

14Israel caśhtacunäpä puydïnincuna caycunam: Israelpa wamä chulin Rubenpa milaynincuna: Hanoc, Falu, Hezron, Carmipis. Paycunamari Rubenpa milaynincuna cala.

15Semionpa chulincunañatacmi: Jemuel, Jamin, Ohad, Jaquin, Zohar, jinaman Canaan lädu walminćhu chulin Saulpis. Paycunamari Simeonpa milaynincuna capäcula.

16Levipa chulincunañatacmi: Gerson, Coat, Meraripis. Paćhac quimsa ćhunca anćhishniyu (137) watacaman Levi cawsala. 17Gersonpa chulincunañatacmi: Libniwan, Simei aylluntin-cama cala. 18Coatpa chulincunañatacmi: Amram, Izhar, Hebron, Uzielpis. Coatmi paćhac quimsa ćhunca quimsayu (133) watancama cawsala. 19Merarip chulincunañatacmi: Mahliwan Musi cala. Paycunamari Levi ayllup milaynincuna ayllunpa-cama capäcula.#Num 3.17-20; 26.57-58; 1Cro 6.16-19.

20Amramñatacmi tiyan Jocabedwan casaracüla. Payćhümi ishcay chulin cala: Aaronwan Moises. Paćhac quimsa ćhunca anćhishniyu (137) watancaman Amram cawsala.

21Izharpa chulincunañatacmi: Core, Nefeg, Zicri cala.

22Uzielpa chulincunañatacmi: Misael, Elzafan, Sitri cala.

23Aaronmi casaracüla Aminadabpa chulin Elisabetwan; Naasonpa paninwan. Paypa chulincuna: Nadab, Abiu, Eleazar, Itamar cala.

24Corepa chulincunañatacmi: Asir, Elcana, Abiasaf cala. Paycunamari Corepa milaynincuna capäcula.

25Aaronpa chulin Eleazarmi casaracüla Futielpa jucnin wanlanwan. Paypam Finees chulillan cala. Lluy caycunam levitap milaynincuna ayllunpa-cama capäcula.

26Cay Moisestawan Aarontam Tayta Dios camachila Egiptopïta Israel caśhtacunäta śhuyullacta#6.26 śhuyullacta ninanta waquincunaćhuꞌa “fïlallacta” ütac “achallacta” nipäcunmi. julapämunanpä. 27Cay Moiseswan Aaronmi mandacü Faraoncäwan limäca capäcula israelcunäta Egiptop maquinpïta julamunanpä.

Moisestam Faraoncäman caćhan

28Egiptoćhu Moises cayaptinmi Tayta Dios nin: 29“Yaꞌami Tayta Dios cá. Lluy ima nishäcunätapis mandacü Faraoncämanmi niycamunqui” nil. 30Niptinmi Moises: “Yaꞌa aclluśh shimi cayaptí ¿Faraoncälächućh uyaliycamanman?” nin.

Currently Selected:

Exodo 6: QVW

Highlight

Copy