Sofonii 3
3
Zeruzalɛmu wɔ paǹ li
1Kiwi mɛn bɛ́ piã-wɔle lɛa,
á n din ziziɛ̃,
piɛ̃ nɛ ka pàã zɛnaa wolen ne,
bɔ̀n bɛ yɛ.
2A n too kɔ min kɔn a bii wɔ li wa.
A n too kɔ min kɔn a doroo li wa.
A n foo doa Dɛnaa Lawa ganaa wa.
A n mɔrɔ a Lawa ganaa wa.
3A nyɛɛnaandɛnan man
ka yàran mɛnɛn bɛ́ gini.
A kiri-wɔlen man ka don ginin
bɛ́ lɔn,
ǹ nə́ goɛ̃ bɛ ǹ dɔ dɔ wasamiɛ̃nɛ,
sɛnɛ baayɛlɛ, màn kɔn ba goɛ̃ wa.
4A Lawa a boo gii-dalin man
din koa wolen lɛa,
ǹ tá ǹ miãn yiri siɛ̃.
A wúlu-bɔlen man Lawa a kion zaãbiɛ,
ǹ ná a dí-pɛn ziziɛ̃.
5A da yaa,
Dɛnaa Lawa tá kunun ǹ ni bɛa kiwi lɛ nɛ,
a sii kɔn zɛnɛɛ baraa wa.
Baayɛlɛ woo baayɛlɛ,
a n kiri pepere we,
a nyaabiɛ a zɛnaa ganaa pinin goon wa.
Bɛ tumaa kio,
min baraan man sii kɔkɔrɔ zɛnɛɛ,
sìi ná a ba ǹ kuĩ wa.
6Dɛnaa Lawa pɛ:
Má tɔrɔn papaã,
má ǹ lɛduə̃ ǹ kungɔnɔn kɛn wuru,
má ǹ kiwi gɔ́ɔ̃ baa ka diə gole bɛ́,
min kɔn din ba kiɛ̃ walan doo wa.
Ǹ kiwin nə́ bɔ̀n baa lenlen,
min goon din ba ǹ nɛ doo wa.
7Má pɛ ma din ni:
Sisia, kiwi lɛ á die ma guguru koe,
á re n too koe maa doroon li.
Bɛ̀ á miɛ̃, ma a re maa dɔlɔn
kɛn boe a ganaa doo wa,
ma a re a bɔ̀n biɛ doo wa.
Sɛnɛ, haayii!
Kiwi lɛ a minin man nə́ n gòã
yii fuu saa
ǹ nə́ kaa sii baraa nɛ.
8Dɛnaa Lawa a da ǹ boo á ke:
Ka n yii da lɛawaa kɛ la kəni,
man die zɛ̀rɛ diɛ ka la!
A n ma gɔ́ɔ̃ nɛ
ma zaman tumaa sɔkɔn,
ma gánan tumaa kaa kun,
màn mɛn bɛ́ toɛ,
ma maa foo-yoo baraa kɛ kaa ǹ la.
Hĩĩ, maa foo-yoo tɛ kɛ n die tán
din tumaa kukuĩ.
Tɔrɔn tumaa a gɔ́ɔ̃ binyəə
9Ma á re tɔrɔn tumaa *yoreen koe,
màn mɛn bɛ́ toɛ,
ǹ boo la ǹ masɛ
Dɛnaa Lawa nyankɔ,
ǹ dí nya ma nɛ ka foo goon ne.
10Min mɛnɛn bɛ́ ma guguru koe,
giã nɛ gána tumaa nɛ,
bɛn tá re boe bǎã sɔsɔɔn nɛ
Etiopii tàn kɛn kio dinin,
ǹ da gɔn màn kɔ ma la.
Izirayeli a gɔ́ɔ̃ binyəə
11Bɛa pinaa lɛ nɛ,
maa zaman sii baraa mɛn
tumaa zɛnaa,
ǹ sii woo sii zɛnaa masɛ nɛ,
bɛa sìi ba re ǹ kuĩ doo wa.
Bɛa biikoo li kəni,
min mɛn tumaa bɛ́ ka bii
ǹ nə́ n dinin gole koe,
ma á re bɛn lui ma ǹ bɔ ka bii,
nsɛ, maa zaman,
n tɔ nə n din gole kɔ kɛ kaa kəni,
n bɔ maa kele sonbore kɛ la.
12Má bɛ́ re min mɛnɛn toɛ ka bii,
doobaan laanka pàãwɛɛnaan manɛ,
ǹsɛn mɛnɛn foo bɛ́ doa-n Dɛnaa Lawa ganaa.
13 #
SNS 14.5. Izirayeli minin mɛnɛn yii bɛ́ re goɛ̃ koo,
bɛn ba re sii baraa zɛnɛɛ doo wa,
ǹ ba re soɛ boe doo wa,
ǹ ba re ǹ miãn yiri siɛ̃ ka ǹ da ǹ boo n doo wa,
ǹ tá re màn bii, ǹ nyuù wɔ,
min kɔn ba re nyɛ́ɛ diɛ ǹ ganaa wa.
Zeruzalɛmu n die n doe doo
14LOE lɔ, n bɛ̀ baa, *Siɔn kiwi!
Ka foo kɔɔ̃n lɛ dɛ, Izirayeli minin!
N nyanyaa ka n foo tumaa nɛ,
Zeruzalɛmu!
15Zɛ̀rɛ mɛn tumaa bɛ́ ka bɔlɔ-a,
Dɛnaa Lawa bɛ bɔ,
á kaa zɔ́ɔn kaa baa la.
Dɛnaa Lawa, Izirayelin kii
tá kun ka ka nɛ.
Ka nyan nyɛ́ɛ baa bɔ̀n nɛ doo wa.
16Bɛa pinaa kɛ lɛ nɛ,
ǹ tá re pii Zeruzalɛmu ni:
N nyan nyɛ́ɛ baa doo wa,
Siɔn kiwi,
n foo nyan ziziɛ̃ wa!
17Dɛnaa Lawa,
n Lawa ta kunun n ni.
A din nə gɔ̀lɔ̀ lɛa,
a n gɔ̀lɔ̀ biɛ miɛ̃,
a foo n kɔɔ̃nɛ n wɔ paǹ li.
A kɔn-narɛɛ n nyin dii koe n la.
A n foo kɔɔ̃n lɛ dii n din taman yii,
18ka zɔ́n pinaa bɛ́ lɔn.
Dɛnaa Lawa pɛ:
Màn mɛn bɛ́ guĩ lɛa n
ganaa Zeruzalɛmu,
ma á re bɛ wɔlɔ lui n ganaa,
màn mɛn bɛ toɛ,
sìi nyan nə n kũ doo wa.
19Bɛa biikoo li,
min mɛnɛn nə bɔ n yii ni ka
mɛnaa ma la siin ni,
ma á re yui bɛn gialaa.
Ma á re kaa busulən kaka koe.
Ǹ wo ka min mɛnɛn nɛ gùli
kɔ ǹ bàã nɛ,
ma á re die bɛn nɛ piɛ.
Kaa tɔ golebaa á re n diɛ wɔlɔ la,
sìi ka kũ gánan mɛnɛn tumaa nɛ.
20Bɛa biikoo li,
ma á re die ka ka nɛ.
Bɛa biikoo li,
ma á re ka lɛ soekɔn.
Kanna kəni, ka tɔ á re boe,
ka tɔ á re gole koe
a là tɔrɔ tumaa nɛ tán la,
ma wusoo ma bǐɛ̃ kɔ ka ganaa
ka gɔn-nyɔmiɛ̃ sonbore ne.
Dɛnaa Lawa mà miɛ̃.
Currently Selected:
Sofonii 3: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
