Zakarii 9
9
Lawa n barka diɛ a zaman ganaa, a n là nyantoro koe ǹ la
Izirayeli miãkɛnɛn ba re ǹ yɔyɔrɛ doo wa
1 #
IZA 17.1-3; ZER 49.23-27; AMƆ 1.3-5. #
IZA 23.1-18; EZE 26.1—28.26; ZOW 4.4-8; AMƆ 1.9-10; MAT 11.21-22; LUK 10.13-14. Dɛnaa Lawa a da ǹ boo á ke:
Dɛnaa Lawa a boo dɔ Adraki gána nɛ,
á dɔ yǎa Damaasi kiwi.
A giala, Dɛnaa Lawa bie n yiin doɛ
Izirayeli tɔrɔn dininsɔɔ̃nɔn la wa,
sɛnɛ, a n doɛ minbuiin nɛ tumaa la.
2A n boo diɛ ka Amaati ni,
kunu Damaasi kiwi ganaa,
ka Tiiri kiwi laanka Sidɔn kiwi ni,
ǹsɛn mɛnɛn doɛ̃ bɛ́ gole.
3Tiiri kiwi tamaa ǹ kungɔn dɔ.
Á wɔrɔ laanka sana sɔkɔn gigiã,
mɔnaa nɛ ka tii bɛ́ lɔn.
4Sɛnɛ, Dɛnaa Lawa á re sii.
A kiwi tamaa ǹ kungɔnɔn kɛn,
á re bɛn noɛ̃ a ǹ kaa Yìsi mu gole li.
Tɛ á re bɛa kiwi lɛ kuĩ.
5 #
IZA 14.29-31; ZER 47.1-7; EZE 25.15-17; ZOW 4.4-8; AMƆ 1.6-8; SOF 2.4-7. Bɛ̀ ǹ nə́ bɛ yɛ,
nyɛ́ɛ á re Asikalɔn kiwi kuĩ,
Gaazaa gɔ̀nɔn tá re bìn diɛ nyɛ́ɛ gɔn.
Foo doa ǹ bǎã ba Ekrɔn la wa,
kii ba re yii Gaazaa doo wa,
min ba re goɛ̃ Asikalɔn kiwi-n wa.
6Minbuiinin man die goɛ̃ lɔloɛ-n kɔn
Asidɔdi kiwi.
Dɛnaa Lawa pɛ:
«Kɛa yɔrɔ kɛ lɛ la,
man die Filisiti minin din gole kɔ kɛ nyɛɛ.
7Siĩ gɔ̀dɛnaa ke ǹ lɛ-n,
ma á re bɛ boe ma bɔ a nɛ.
Mà bɔbɔnɛɛ ke a ganaa,
ma á re bɛ pii ma bɔ a ganaa.
Min mɛnɛn yii bɛ́ re goɛ̃ koo ǹ bii,
bɛn tá re maa wɔn biɛ
ka Zudaa a kiã bɛ́ lɔn,
Ekrɔn minin tá re goɛ̃
ka Zebuzu tɔrɔn bɛ́ lɔn.
8Ma á re maa gána lɛ lɛduĩ,
ma a kirisibaa zɔ́ɔ woo a daa wolen ganaa.
Tiin kiã kɔn ba re die
boe maa zaman yii-n doo wa.
A giala, má n yiin doa ǹ la kanna.»
Kii mɛn bɛ́ die ka là nyantoro ne
9 #
MAT 21.5; ZAÃ 12.15. *Siɔn kiwi,
bɛ̀ baa ka n we tumaa nɛ!
Zeruzalɛmu minin,
ka foo kɔɔ̃nbaa ǹ lɛ dɛ!
Ga, n kii n die n li.
A n pepere, gɔ̀lɔ̀ lɛa,
a nə n din boɛɛn koe.
A na á dii dundun la,
dundun nɛ la,
dundun dan a nɛ.
10 #
LOE 72.8. Ma á re ziabaa ǹ wotoron boe
ma ǹ bɔ Efrayimu,
ma ziabaa ǹ sùin bɔ
ma ǹ bɔ Zeruzalɛmu.
Ma á re ziabaa ǹ san yiyiɛ.
Kii lɛ á re là nyantoro koe tɔrɔn la.
A n die Dɛnaa biɛ,
a kũ Yìsi mu kɔsɛ kɔsɛ ganaa
a wo Yìsi mu gole kɔsɔn yaa,
a kũ Efrati tà ganaa,
a wo kanaa lɛ dan yaa.
Dɛnaa Lawa n die kòso nɛn kiɛ
11 #
BBN 24.8. Dɛnaa Lawa pɛ:
«Maa lɛ kɔ kɔn la kɛ taman yii
má wɔ kɔn ka ka nɛ,
mà na a siére lɛa,
min mɛnɛn bɛ́ kòso ne,
nyankɔrɔ gole ne,
mu ná a ba a-n wa,
man die bɛn wɛɛ, ma ǹ kaa.
12Kòso nɛ foo doa wolen lɛn,
ka n bɔyaa ka da kaa kiwi tamaa wole ne!
Pelo dinin,
man pii ka nɛ,
màn mɛn bɛ́ ka lon,
man die bɛa la ma-n paa koe ka la.
13Man die Zudaa gána biɛ
maa ziabaa ǹ sa lɛa,
ma Efrayimu baa a kiɛ lɛa.
Siɔn, man die
n nɛnyaanan diɛ Grɛki minin gialaa.
Maǹ die goɛ̃ ma gɔn
ka zia-baali a gɔya sa bɛ́ lɔn.»
14Ka bɛ-n kəni,
Dɛnaa Lawa n die yui lon ǹ mìi la,
a kiɛ kɛ wo ka la a tɛ pɛ bɛ́ lɔn.
Dɛnaa Lawa n die bɛn pii,
a wo nyɛɛnɛ ka labara nɛ,
boe gusin a lɛ̀gɔn la.
15Dɛnaa Lawa Pàãyiidɛnaa á re a zaman tamɛɛ.
Ǹ tá re boe ǹ zɔ́ɔn la,
ǹ nə ǹ baragii kɔlɔn yɔyɔrɛ.
Ǹ tá re màn mii,
ǹ bìn diɛ gole wɔ
ka yɔ bɛ min yii ganaa lɔn.
Ǹ tá re piɛ̃
ka *wúlu màn mà bɛ́ lɔn paan nɛ,
hinlaa ka mà mɛn bɛ́ ǹ kaa
*wúlu bɔ ǹ bǎã karan ganaa.
16Bɛa pinaa,
Dɛnaa Lawa, ǹ Lawa á re ǹ kirisibiɛ
ka tɔɔn-lɛduə̃li bɛ́ a tɔɔn
kirisibiɛ lɔn.
Maǹ die tɛ pii ǹ gána nɛ
ka kɔlɔ giɔ̀mɔ kaka bɛ́ lɔn,
kii bafolo ganaa.
17Ǹ foo á re kɔɔ̃n koe parsiini!
Ǹ tá re siĩn koe parsiini!
*Belee á re pàã koe nɛ tenən la,
duvɛ̃ dii pàã kɔ nɛlɔ tenən la.
Currently Selected:
Zakarii 9: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
