Zakarii 10
10
Dɛnaa Lawa dinsɔɔ̃ n la mu koe
1Ka la mu nyɔɔbaa nyankɔ
Dɛnaa Lawa la,
a din nə die ka la nɛ.
Á re la gigiã koe ka la,
kaa wuru gɔ́ɔ̃gɔ́ɔ̃ ǹ mànan nə siĩn kɔ.
2 #
MAT 9.36; MAR 6.34. Lawa kooron kɛn man soɛ boon diɛ,
wɔ-kũlin man soɛ siin yii.
Maǹ narɛɛ kooron we, fofolo lɛa.
Ǹ foo waa ǹ boon tumaa n piɛ̃ lɛa.
Bɛ lɛ nɛ, zaman lɛ woo,
ka tɔɔ makaradɛnaa bɛ́ lɔn,
a giala, lɛduə̃li ba ǹ la wa.
Dɛnaa Lawa n die wusii a da a zaman nɛ, a pàã kɔ ǹ la
3«Ma foo n yoo-n
sére-lɛduə̃li baraan kɛn li.
Man die yui butumun kɛn gialaa.
Taãn nɛ,
masɛ Dɛnaa Lawa Pàãyiidɛnaa,
man die n doe maa zaman
Zudaa minin kɛn lɛ.
Man die ǹ biɛ maa ziabaa ǹ sùi sonboren lɛa.
4Kiã tɔrɔ tumaa n die boe
Zudaa gána nɛ,
pàã nə́ ǹ tɛnɛn lon ka kion
giala daa ǹ kɔlɔn bɛ́ lɔn,
ǹ tɛnɛn nə́ paraa-n tán ka zìã
kion a kiɛn bɛ́ lɔn,
gialakunun man kaka ka
ziabaa ǹ sa bɛ́ lɔn.
5Maǹ die goɛ̃ ka sɔraasi
foo taãnaan bɛ́ lɔn.
Min mɛnɛn bɛ́ zia biɛ ǹ ganaa,
ǹ tá re bɛn tɔtɔrɛ ka zii la ǹ bɛrɛɛ bɛ́ lɔn.
Maǹ die yɔ boe miɛ̃,
a giala,
Dɛnaa Lawa á re goɛ̃ kunun ǹ ni.
Sìi á re n koe zɔ́ɔn
sùi da baa-a wolen lɛ.
6Ma á re Zudaa a zaman foo kaka koe,
ma Zozɛfu#10.6 Zozɛfu a zaman: Bɛ n gɔsɛ a lɛ̀gɔn la gána giala pii, Izirayeli gána ke. a zaman kirisibaa.
Ma á re wusii ma da ǹ nɛ piɛ,
a giala, ǹ makara ma kũ.
Maǹ die n biɛ ka ma bie
má goã má n la bɔ ǹ ganaa wa.
Hiĩ, ma din nə Dɛnaa Lawa,
ǹ Lawa lɛa,
ma á re ǹ nyankɔ lɛ sii.
7Efrayimu minin foo n die tã koe,
ka zia-baali zanbian bɛ́ lɔn.
Ǹ foo n die kɔɔ̃n koe,
ka maǹ nə́ duvɛ̃ mi.
Ǹ nɛnyaanan tá re bɛ yii,
maǹ die goɛ̃ ǹ foo n kɔɔ̃nɛ,
ǹ nə n nyɛnyɛɛ Dɛnaa Lawa taman yii.
8Man die maa zaman bíi,
ka lɛ pii ni,
ma ǹ sɔkɔn.
Taãn nɛ, man die ǹ sii ma ǹ kaa,
ǹ mɔnaa ka lɛlɛ ǹ bɛ́ lɔn.
9Má ǹ sasawaa paǹ tumaa li tɔrɔn bii,
ka ǹ bɛ́ màn nàn pɛsɛ̃ lɔn.
Sɛnɛ, bɛa gána sɔsɔɔn lɛn nɛ,
ǹ yiri á re gisĩ ma nɛ.
Ǹ tá re giɛ̃ walan,
kun ka ǹ nɛnyaanan nɛ,
ǹ tɔn nə n bɔyaa ǹ daa.
10Ma á re boe ǹ ne Ezipti gána nɛ,
ma bɔ ǹ nɛ Asiirii gána nɛ,
ma da ǹ nɛ Galaati gána nɛ,
ka Liban gána nɛ.
A laan bɛ yii ni,
bǎã ba re yii a ǹ bɔ wa.
11Ǹ tá re koe yìsi mu#10.11 Bɛ n Sawɛɛ tà giala pii. Ka ga BBN 14.21 ganaa. kɛ kuri.
Masɛ Dɛnaa Lawa,
ma á re yìsi mu gole a mu duwii.
Haalɛ Niili tà gɔ́ɔ̃ din tá re laɛ.
Asiirii gána,
din gole-kɔle kɛ á re mɛnɛɛ.
Ezipti a pàã á re nyɛɛ.
12Ma á re pàã koe maa zaman la.
Sii mɛn bɛ́ kɔɔ̃n ma ganaa,
ǹ tá re bɛ zɛnɛɛ.
Dɛnaa Lawa a da ǹ boo ne.»
Currently Selected:
Zakarii 10: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
