Zakarii 11
11
Gána pàãdɛnan mɛnaa
1Liban gána,
n kiɛnlɛn bũ
tɛ nə n *sɛdrə dan kɛn kũ!
2Siprɛsi dan, ka gini,
a giala, sɛdrə dan nə́ kaa,
bɛa da siĩn-siĩnin lɛn nə́ bɔ̀n baa.
Basan da sɔsɔrɔn,
ka toa kaa ginii wuu bɔ,
a giala, ǹ nə́ kaa daã kɛkɛ lɛ dɛ.
3Ka n too kɔ tɔrɔn
tɔɔn-lɛduə̃lin kɛn lon gini.
A giala, ǹ pàã nya.
Ka n too kɔ yàra nɛ tenən lɛ-baa li.
A giala,
Zurdɛ̃ tà lɛ a bǎã sonbore lɛ ziziɛ̃.
Tɔɔn-lɛduə̃li a boo
4Dɛnaa Lawa, maa Lawa kɛa boo kɛ da ma nɛ: – Ǹ bɛ́ woe ka sèren mɛnɛn nɛ ǹ dɛ ǹ bǎã nɛ, bɛn lɛduə̃li baa. 5Min mɛnɛn bɛ́ ǹ pii ǹ nə́ ǹ dii, maǹ taasɛ mà ǹsɛn ba sii baraa kɔn zɛnɛɛ wa. Ǹ mɛnɛn bɛ́ ǹ siɛ̃, bɛn man pii: «Lawa barka, a giala, wɔ màndɛnan baa!» Ǹ makara dɔ din ba boe ǹ lɛduə̃lin ganaa wa. 6Dɛnaa Lawa a da ǹ boo á ke: – Gána lɛ a minbuiin nɛn makara a re ma kuĩ doo wa. Man die didie diɛ ǹ miãkɛn a pàã giulun, ka ǹ kii ni. KIIN tá re ǹ gána ziziɛ̃ lenlen. Min kɔn ba re kanbiɛ ǹ ganaa wa. 7Ǹ bɛ́ woe ka sèren mɛnɛn nɛ ǹ dɛ ǹ bǎã nɛ, sanparɛ a makaradɛnan kɛn, ma dinmaa-n bɛn lɛduə̃li lɛa. Má tɔɔn lɛduə̃ ǹ bàlà màn paa saa. Má a bibinaa bíi "giaárabaa", má a paabaa ǹ wɔ bíi "goonbaa", má maa sèren lɛduə̃ giala kɔ. 8Bɛ kio, ma boo la má n foo kũ sèren-lɛduə̃lin lɛn li wa. Ma dɔ nə́ ǹ dɔn gɔ̀nɔn bɔ. Mui goon gɔ́ɔ̃ nɛ, má sère-lɛduə̃li sɔɔ toa walan. 9Má tɔ́n nə n toa ǹ ganaa kɛnɛn: «Ma a re giɛ ka walan doo wa. Ǹ mɛnɛn bɛ́ re giɛ̃, ǹ gã! Ǹ mɛnɛn bɛ́ siĩni ǹ gã, ǹ gã! Ǹ mɛnɛn yii bɛ́ re goɛ̃ koo bɛ kio, ǹ dinin nə kɔn sɔ̃!» 10Bɛ kio, má maa "giaárabaa" bàlà kɛ saa, má yiɛ. Bɛa yɔrɔ lɛ la, ma lɛ kɔ kɔn la mɛn wɔ ka tɔrɔn tumaa nɛ, man má bɛ lɛ ziziɛ̃. 11Lɛ kɔ kɔn la lɛ na á n ziziɛ̃ bɛa pinaa kɛ lɛ nɛ. Sère makara dɛnan mɛnɛn nə goã giɛ ma ganaa, bɛn nə dɔ̃, mà Dɛnaa Lawa a boo na a gialaa yɔrɔ yii. 12#MAT 26.15. #MAT 27.9,10.Má tɔ́n nə n toa ǹ ganaa kɛnɛn: «Bɛ̀ á kɔɔ̃n ka ganaa, ka maa saraa kɔ ma la, hinlaa, ka toa walan!» Ǹ nə́ tɔn maa saraa nimi, wɔrɔ we pɔsɔɔ#11.12 Bɛ n bɛ̀rɛ pii ǹ giɔ̀mɔ lɛa., ǹ nə́ kɔ ma la. 13Dɛnaa Lawa nə́ n toa ma ganaa kɛnɛn: «Ma giɔ̀mɔ n ka kɛ lɛ nɛ ǹ dinin yii li! Bɛa wɔrɔ lɛ zũ dɔn-bɔle ne!» Má bɛa wɔrɔ we pɔsɔɔ lɛ saa, má zũ dɔn-bɔle ne Dɛnaa Lawa a kion. 14Bɛ kio, "goonbaa ǹ" bàlà ke, má bɛ yiɛ. Bɛa yɔrɔ lɛ la, màn mɛn bɛ́ Zudaa laanka Izirayeli biɛ goon ka dɔɔ̃nɔn bɛ́ lɔn, man má bɛ lɛ yiɛ. 15Dɛnaa Lawa wusoo doo á kɛ pɛ ma nɛ: «Sisia, sère-lɛduə̃li baãnaa a mànan si. 16A giala, man die tɔɔ-lɛduə̃li kɔsɔ diɛ gána lɛ nɛ: Sèren mɛnɛn bɛ́ ǹ banban, a re n taasɛ bɛn nɛ wa, ǹ mɛnɛn nə papaã, a re giɛ bɛn li wa, ǹ mɛnɛn bɛ́ busulən lɛa, a re giɛ bɛn walan wa, ǹ mɛnɛn bɛ́ kakabaa la, a re màn kɔn koe bɛn la wa. Sɛnɛ, n mɛnɛn bɛ́ kasiɛ̃ nɛ ǹ bii, a n die bɛn soɛ̃, a ǹ gòon tɔnɔn wɔwoɛ̃.»
17Tɔɔn-lɛduə̃li baãnaa mɛn bɛ́ n la boe a tɔɔn ganaa,
bɛ wɔ n ka bɔ̀n nɛ!
Gɔya sa á re a nyàa goon niɛ̃,
a na a gusin a yii puru!
A nyàa á re laɛ, a laa kakaka.
A gusin a yii á re tiɛ̃, a tã lenlen!
Currently Selected:
Zakarii 11: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
