Zakarii 3
3
Sii-nyaa siibaa ǹ wɔ: Lawa a wúlu-bɔlen kiã Yesuwa
1 #
ƐSID 5.2; SNS 12.10. Dɛnaa Lawa wúlu-bɔlen kiã Yesuwa nyaa ma nɛ. A n golee-n lon Dɛnaa Lawa a lon a dia dí-a wole lɛ yɔrɔ-a. *Sɛtaan, zɛ̀rɛ da ma la wole kɛ n golee-n Yesuwa gusin, a n die a zɛ̀rɛ biɛ. 2#ZUD 9. Dɛnaa Lawa pɛ zɛ̀rɛ da ma la wole lɛ nɛ: «Dɛnaa Lawa nə n lɛ tã, zɛ̀rɛ da ma la wole! Sonbore, á n lɛ tã, asɛ mɛn Zeruzalɛmu bɔ á koa! Yesuwa bie ka gɔn lɛkoro bɛ́ lɔn ǹ nə́ bɔ tɛ-n wa#3.2 Lawa a Wúlu-bɔlen kiã Yesuwa na á bɔ Baabilonii á daa ka Zuifu kuru kɔsɔ nɛ.?» 3Bɛ á zɛnɛɛ bɛ̀ Yesuwa n golee-n lon a dia dí-a wole lɛ yɔrɔ-a mɔnaa gɔgɔrɛn ná a ganaa. 4Min mɛnɛn bɛ́ kun ka lon a dia dí-a wole lɛ nɛ, á pɛ ǹ nɛ mà ǹ na a mɔnaa gɔgɔrɛn lɛn sɔlɔ. Á tɔn pɛ Yesuwa nɛ: «Ga, má n siɛ̃n lɛn bɔ má ǹ bɔ n ganaa. Ǹ tá re zɔ́n mɔnaan we n ganaa.» 5Á pɛ doo mà ǹ mɔnaa gɔn *yoreen yii Yesuwa mìi ganaa. Ǹ nə́ mɔnaa gɔn yoreen yii a mìi-a, ǹ nə́ mɔnaa yoreenən wɔ a ganaa Dɛnaa Lawa a lon a dia dí-a wole lɛ yɔrɔ-a. 6Bɛ kio, Dɛnaa Lawa a lon a dia dí-a wole lɛ pɛ Yesuwa nɛ: 7«Dɛnaa Lawa Pàãyiidɛnaa a lɛ kɔ goon nə́ ke:
Ma bɛ́ boo mɛn pii n ni
bɛ̀ n bɛ zɛnaa,
bɛ̀ n kɔ maa dí-pɛn kɛn lɛ,
n tá re maa kion lɛ a
nyɛɛnaandɛnaa biɛ,
ka a sumun dɔn nɛ.
Min mɛnɛn bɛ́ maa dí nyɛɛ kànaa,
man die n diɛ kun ka bɛn nɛ.
8 #
ZER 23.5; 33.15; ZAK 6.12. Yesuwa, n too kɔ,
nsɛ mɛn bɛ́ Lawa a wúlu-bɔlen
kiã lɛa,
ka kasɛn kɛn dɔn nɛ kun ni
Lawa a wúlu-bɔlen lɛa.
A giala, sii mɛn bɛ́ re n zɛnɛɛ,
kasɛn Lawa a wúlu-bɔlen kɛn
tan nə bɛ giala pii.
Á ke man die die ka maa dí-nyali ni,
a tɔ n "da ten"#3.8 Bɛa tɔ kɛ n kii a bǎã-saali boo diɛ. A n boe la dɔn a n Izirayeli minin nyin-sili boo diɛ..
9Man die kɔlɔ diɛ tán
Yesuwa yɔrɔ-a.
Bɛa kɔlɔ goon kɛ lɛ la,
yii nàn sɔbaa n tɛ pii la.
Ma dinmaa n die sɛ́wɔ kiɛ̃ la.
Lɛawaa goon toto gɔ́ɔ̃ nɛ,
man die gána kɛa sii baraan boe
ma ǹ bɔ a ganaa.
Masɛ Dɛnaa Lawa Pàãyiidɛnaa
a da ǹ boo ne.
10 #
MIS 4.4. Bɛa pinaa lɛ nɛ,
ka á re kɔn bíi kaa rezɛ̃ wurun ni
ka kaa gɔ́rɔ dan giulun ni.
Dɛnaa Lawa a da ǹ boo ne.»
Currently Selected:
Zakarii 3: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
