Misee 2
2
Mɛnaa kɔn la boo
1Min mɛnɛn bɛ́ n taasɛ
ka sii kokooro zɛnaa nɛ,
bɔ̀n na á bɛn yɛ.
Min mɛnɛn bɛ́
sii baraa zɛnaa a taasiɛ we
ǹ waa ǹ piì la,
bɔ̀n na á bɛn yɛ.
Bɛ̀ wɔlɔ fúlu lɔn,
maǹ yui ǹ nə ǹ sii zɛnaa,
a giala a zɛnaa ǹ pàã tá ǹ lon.
2Bɛ̀ ǹ yii bɔ min a wuru li,
maǹ kuĩ ǹ si la ka pàã nɛ,
ta kion ne, maǹ nɔmɛ a ganaa.
Maǹ boe kɛnaa
laanka a kion minin yii ni.
Ǹ bɔ min yii ni,
ǹ na a gɔn màn kũ ǹ si la.
3Bɛ lɛ na á toa,
masɛ Dɛnaa Lawa á kɛ pii:
Á ke, ma bɛ́ re sii mɛn diɛ
kasɛn kɛn miãn tɔrɔ mìi ni,
ka a re boe la ka n sɔlɔ a-n wa.
Ka a re boe la ka tɔ wɔ ka mìi n lon wa,
a giala, a n die goɛ̃ biikoo babaraa lɛa.
4Bɛa pinaa kɛ lɛ nɛ,
minin tá re suusu diɛ ka ganaa,
ǹ tá re wuu pii ǹ gù wɔ ka la ǹ pɛ:
«Wɔsɛn nə́ ziziɛ̃ lenlen,
á ke, á ma tɔrɔn lɛn bǎã si ǹ la,
á kɔ min kɔsɔn la.
Kɛ mìi n ka wàa nɛ?
Ǹ nə́ ke wɔa wurun gii piã-wɔlen manɛ!»
5Bɛ lɛ na á toa,
Dɛnaa Lawa a zaman kɛ bii,
n ba re min kɔn din yii,
mà a n biɛ diɛ bǎã li,
zoɛ̃ koe min la wa.
Min mɛnɛn bɛ́ Lawa a boo liere koe
6Gialakunun mà yǎa man lɛ tiɛ̃,
mà ma din a pɛ ke,
mà sìi á die ǹsɛn kuĩ,
mà baãnaabaa ǹ boo ne.
7Zakɔba tɔrɔn lɛn,
ka dinin da ǹ boo n ke sonbore?
Ká mà Dɛnaa Lawa a sii simaa lɛ na á nya?
Ká mà a nya ǹ dí n ka kɛ-n sonbore?
Min mɛn bɛ́ tɔ pepere we,
masɛ a boo lɛ a là lɛa bɛ ganaa wa?
8Lɛlɛ doo,
ka dinin man ka goã
masɛ a zaman kɛa zɔ́ɔ lɛa.
Ma min mɛnɛn lɛn si zia la,
ǹ nə́ kiɛ̃ woe piɛ ǹ foo n tã,
ka n ká goã we bɛn lɛ,
bɛ̀ ka ǹ dɔnkɛ gole sɔlɔ,
ka bɔ a boɛɛn lalan.
9Lɔn kɛn, maa zaman lɛ wɔn lɛa,
kionən mɛnɛn bɛ́ kɔɔ̃n bɛn ganaa,
ka nə ǹ lui ǹ boe bɛn nɛ.
Ǹ nɛnyaanan kɛn,
ká maa bǐɛ̃ kurəə bɛn ganaa duduu.
10Ka yoo ka n tan kəni!
A giala,
kànaa kɛ bie kaa susu ǹ bǎã lɛa bɔrɔ wa.
Ka sii gɔgɔrɛ mɛn zɛnaa,
a basaã á die ka yii,
á die baraa koe ka ganaa.
11Min mɛn bɛ́ re die boo kooro diɛ ka nɛ,
a soɛ bɔ ka nɛ,
mà ka á die duvɛ̃ laanka yɔ kakaarɛ yii,
táa ka n giɛ bɛ miã min lɛ li.
Soɛ boon
Sɛnɛ min tɛnɛn maǹ
baãnaabaa ǹ boo kɛ diɛ zaman lɛ nɛ:
12Zakɔba tɔrɔn lɛn,
ma á die ka tumaa soekɔn.
Ma á die Izirayeli minin gialakunun lɛn soekɔn.
Ma á die ǹ soekɔn
ka sèren bɛ́ sèren kion lɔn,
ka tɔɔn bɛ́ ǹ buu sɔ̃ ǹ bǎã-n lɔn.
Ǹ lɛn tá re boe zaman lɛa.
13Min mɛn lɛ bɛ́ zii buĩ ǹ ni,
bɛ lɛ n woe ǹ nyɛɛnɛ.
A zii mɛn bũ ǹ ni,
ǹ nə́ bɔ ka bɛ nɛ, ǹ nə́ soo.
Ǹ kii lɛ mɛ ǹ nyɛɛnɛ,
Dɛnaa Lawa mɛ ǹ nyɛɛnɛ.
Currently Selected:
Misee 2: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
