Matiə 6

Yezu a boo doobaan gɔ màn nɛ wɔ paǹ li

1 # MAT 23.5. Ka bɛ́ Lawa a zii tɔ wɔ ǹ siin mɛnɛn zɛnɛɛ minin yɔrɔ-a, ka tá n dinin nyɛɛ ǹ nɛ, ka n parabaa ka bɛ nɛ. Bɛ̀ ka á zɛnɛɛ miɛ̃, ka a re saraa yii a bɔ kaa Díi Lawa li lon wa.

2Bɛ̀ ka á doobaan goe ka wɔrɔ nɛ, ka baran n dinin nyaa minin yɔrɔ-a buəbuə, ka gɔ́ɔ̃ tì-an bɛ́ zɛnɛɛ Zuifun lɛsɔkɔn kionən laanka zii giala-an nɛ lɔn wa. Maǹ zɛnɛɛ miɛ̃ mà minin nə ǹsɛn laakalaa. Masɛ n pii ka nɛ, sonbore ne, ká kaa saraa yɛ á nya. 3Bɛ̀ ka á doobaan goe ka wɔrɔ nɛ, ka nyan toa ka gɔsɛ a gɔn nə bɔ ka gusin a gɔn a sii zɛnaa siére-a wa. 4Màn-gɔ n siĩni a goã durii ni. Ka Di Lawa mɛn bɛ́ sii-duriin doɛ̃, bɛ lɛ á die ka sarɛɛ.

Yezu boo mɛn da Lawa nyankɔ wɔ paǹ li

(LUK 11.2-4)

5 # LUK 18.10-14. Bɛ̀ ka á Lawa nyankoe, ka nyan nə n baa ka gɔ́ɔ̃ tì-an kɛn bɛ́ lɔn wa. Bɛ̀ ǹ tá lɛsɔkɔn kion hinlaa zii giala-a, golee lon a Lawa nyankɔ lɛ n kɔɔ̃nɛ ǹ ganaa. Maǹ giɛ li mà min din tumaa nə ǹsɛn yɛ. Masɛ n pii ka nɛ, sonbore ne, ǹ nə́ ǹ saraa yɛ á nya. 6Bɛ̀ ka tá li ka Lawa nyankɔ, ka wɔ kaa kion, ka kiɛnlɛ tã ka dinin lɛ. Ka Di Lawa mɛn bɛ́ bɛa bǎã durii lɛ nɛ, ka bɛ lɛ nyankɔ walan, bɛ mɛn bɛ́ sii-duriin doɛ̃, a din lɛ n die ka sarɛɛ.

7Bɛ̀ ka tá Lawa nyankoe, ka baran boo gigiã da, ka min kooron bɛ́ zɛnɛɛ lɔn wa. Maǹ taasɛ mà bɛ̀ ǹsɛn nə́ boo gigiã da, mà bɛ lɛ n toɛ Lawa nə n too kɔ ǹsɛn lon. 8Ka baran ǹ lɛn zɔɔ̃ wa. A giala, ka laadoo bɛ́ màn mɛn ganaa, ka Di Lawa bɛ dɔ̃ gɔrɔ, bɛ̀ ka n ka tɔn na a nyan din kɔ la wa. 9Ka doamaa nɛ ka Lawa nyankɔ kɛnɛn:

Wɔ Di mɛn bɛ́ lon,

toa n tɔ gole kɔ.

10Toa n kiibaa daa,

n foo sii bɛ́ n zɛnɛɛ lon lɔn ke,

toa a n zɛnaa tán dɔn miɛ̃.

11Wɔa pelo a màn-bii kɔ wɔ la.

12Wɔ zɛ̀rɛn toa wɔ nɛ,

ka wɔ dɔn bɛ́ wɔ miãn wɔn toɛ ǹ nɛ lɔn.

13Sii mɛn bɛ́ damagɔ́ɔ̃li ǹ sii lɛa,

bɛ wɔlɔ lui wɔ ganaa,

sɛnɛ, wɔ kanbaa baraa ganaa.

[A giala kiibaa nɛ,

pàã nɛ ka gugurubaa nɛ,

bɛn manə n din wɔ lɛa miɛ̃,

yǎa duduu. A n miɛ̃.]

14 # MAR 11.25-26. A giala, bɛ̀ ka tá kaa wɔmalon wolen zɛ̀rɛ toɛ ǹ nɛ, ka Di Lawa á die ka dɔn zɛ̀rɛ toɛ ka nɛ. 15Sɛnɛ bɛ̀ ka a lɛ koe ka tá kaa wɔmalon wolen zɛ̀rɛ toɛ ǹ nɛ wa, ka dɔn Di Lawa a re ka dɔn zɛ̀rɛ toɛ ka nɛ wa.

Yezu boo mɛn da lɛ-sɔɔ wɔ paǹ li

16Bɛ̀ ka n lɛ sɔɔ, ka baran n yɔrɔ kɔsɛ ka gɔ́ɔ̃ tì-an kɛn bɛ́ zɛnɛɛ lɔn wa. Maǹ nə́ n yɔrɔ kɔsɛ, mà min din tumaa dɔ̃ mà ǹsɛn man nə́ n lɛ sɔɔ. Masɛ n pii ka nɛ, sonbore ne, ǹ nə́ ǹ saraa yɛ á nya. 17Sɛnɛ, nsɛ, bɛ̀ n nə́ n lɛ sɔɔ, n yɔrɔ pii, n nə n mìi wɔraa, 18màn mɛn bɛ́ toɛ, minin baran dɔ̃ mà n nə́ n lɛ sɔɔ wa. N Di Lawa mɛn bɛ́ bǎã durii ni, bɛ lɛ dinsɔɔ̃ n die doɛ̃. Asɛ mɛn bɛ́ sii-duriin doɛ̃, a din lɛ n die n sarɛɛ.

Naforo tamaa Lawa a piɛ

(LUK 12.33-34)

19 # ZAAKI 5.2-3. Ka baran naforo lɛ sɔkɔn-a ka koa ka dinin manɛ kanaa wa. A giala, nimii laanka soe tá kanaa, ǹ tá basaã koe, wurumunun tá kiɛnlɛ yiɛ bɛ̀ ǹ mànan koã. 20Ka naforo lɛ sɔkɔn ka koa ka dinin manɛ Lawa a piɛ. A giala, nimii laanka soe ba boe la ǹ basaã kɔ walan wa, wurumunun ba boe la ǹ kiɛnlɛ yiɛ wa, ǹ ba boe la ǹ màn dɔ koã wa. 21A giala, bɛ̀ n naforo tá koa-n bǎã mɛn nɛ, n taasiɛ dɔ n walan.

Yii nàn á bólonbaa

(LUK 11.34-36)

22Yii nàn nə ka bólon bɛ́ lɔn, a din nə wɔlɔ fúlu kiɛ gɔ̀nɔn nɛ. Bɛ̀ n yii nànan tá siĩni, n gɔ̀nɔn tumaa n die goɛ̃ wɔlɔ fúlu li. 23Sɛnɛ, bɛ̀ min yii nàn ba siĩn wa, a gɔ̀nɔn din tumaa n wɔlɔ tì li. Bólon mɛn bɛ́ n ganaa, bɛ̀ bɛa wɔlɔ fúli wa, ma n wɔlɔ tì gole li.

Wɔrɔ hinlaa Lawa

(LUK 16.13)

24Min kɔ́n ba boe la a dí nya mìinaa paa-n wa. Bɛ̀ min bɛ zɛnaa, a n die goon biɛ zɔ́ɔ, a goon narɛ, a n die goon bɔlɔ sii, a goon kɛ puusə kɔ. Ka a boe la ka n dinin kɔ Lawa la, ka n dinin kɔ wɔrɔ dɔ la wa.

Foo doa Lawa ganaa

(LUK 12.22-31)

25Bɛ lɛ na á toa masɛ n pii ka nɛ, ka baran n gɔ́ɔ̃ bii ka dinin too ǹ màn-bii laanka kaa mi ǹ màn sii-n wa. Ka baran n gɔ́ɔ̃ bii ka ka gɔ̀nɔn kũ ǹ mɔnaa sii-n wa. Táa yiikoonaabaa á soɛ màn-bii ni, táa gɔ̀nɔn dɔ á soɛ mɔnaan manɛ? 26Ka ga bàanan kɛn ganaa kiɛ̃ lon. Ǹ ba màn kɔ́n diɛ wa, ǹ ba màn kɔ́n kuri ǹ kaa dɔǹ nɛ wa, sɛnɛ, Díi Lawa nə ǹ toe! Ka a soɛ bàanan manɛ lenlen wa? 27Die n kun ka nɛ, a din a gɔ́ɔ̃-bii kɛ lɛ boo la a biikoo boɛɛn da a din a nyin sasabaa li.

28Wàa na á baa ka tá n gɔ́ɔ̃ din bii ka mɔnaa sii ni? Ka ga dan buũ kɔ ǹ gɔn ganaa don. Ǹ ba dí nyɛɛ wa, ǹ ba mɔnaa tiɛ̃ wa. 29#KIIN1 10.4-7; KZS2 9.3-6. Bɛ din tumaa kio, masɛ n pii ka nɛ, kii Salomɔn laanka a naforodɛnaabaa kɛ lɛ din ni, a wɔ ǹ mɔnaan nə goã siĩni ka da buũn kɛn lɛn kɔ́n bɛ́ lɔn wa. 30Buu mɛn bɛ́ don pelo, minin nə die tɛ koɛ-n biɛ̃, bɛ̀ Lawa tá n yiri koɛ bɛ li á n tamaɛ, sanparɛ ka kasɛn nɛ! Á die n yiri koɛ ka dɔn nɛ a ka dɔn tamaa. Kaa golee Lawa li á kiɛɛrɛ dɛ!

31Ka baran n gɔ́ɔ̃ bii, ka pɛ: «Wɔsɛn man die wàa bii?» Ka baran pɛ: «Wɔsɛn man die wàa we wɔ ganaa?» 32Bɛ din tumaa, min kooron man giɛ li ka n yiin paanan nɛ. Sɛnɛ kasɛn Di Lawa tá doɛ̃ mà ka laadoo tá ǹ ganaa. 33Ka ga *Lawa a kiibaa laanka a peperebaa li bɔrɔ, bɛ kio, Lawa á die bɛa mànan kɛn tumaa koe ka la. 34Ka baran n gɔ́ɔ̃ bii ka biɛ̃ ǹ sii ni pelo wa. Biɛ̃ ǹ dɔ á re die ka a din a gɔ́ɔ̃ bii ǹ siin ni. Lɛawaa din tumaa laanka a nɔmaa nɛ.

Currently Selected:

Matiə 6: SCE2013

Highlight

Copy