Matiə 28

Yezu yii a kaa a bɔ geren bii

(MAR 16.1-10; LUK 24.1-12; ZAÃ 20.1-10)

1 *Susu ǹ pii á kiɛ̃ kio, dimaasi pinaa, wasa a bɔ tán-a waáraa, Magadalaan Mariya laanka Mariya goon kɛ lɛ daa ga yala lɛ ganaa. 2A din bǎã-n gɔrɔ, tán bìn da gole gole, Dɛnaa a dia dí-a wole goon nə́ n toa lon á daa, á kɔlɔ lɛ birikəə᷉ á da para li, á giã la. 3A n tɛ pii ka la a tɛ-pɛ bɛ́ lɔn, a mɔnaan man fu ka koara nɛ. 4Nyɛ́ɛ yala-lɛduə̃lin lɛn kũ yǎa ǹ gɔ̀nɔn yii bìn da, ǹ nə́ kere ka n pɛ mà maǹ nə́ gã.

5Lon a dia dí-a wole lɛ tɔ́n pɛ lɔn lɛn manɛ: – Ka baran nyɛ́ɛ baa wa. Masɛ á doɛ̃ máa minin nə Yezu mɛn dere gɔn ganaa, ka ǹ giɛ bɛ lɛ li. 6A ba kànaa wa, a yii kaa á n bɔ geren bii, ka a bɛ́ á pɛ lɔn. Ǹ naa tán bǎã mɛn nɛ, ka da ga a bǎã ganaa. 7Ka wo pɛ a kialandɛnan manɛ fufuu: «A yii kaa á n bɔ geren bii, á die woe ǹ nyɛɛnɛ Galilee gána-n sisia, ǹ tá re woe yiɛ walan.» Boo mɛn bɛ́ masɛ lɛ-n ma pɛ ka nɛ, bɛ lɛ-n ka kɛ nɛ.

8Ǹ nə́ n nanaa, ǹ nə́ n bɔ yala lɛ lɛ-a, nyɛ́ɛ nə́ ǹ ganaa taãn-taãnɛ, nyɛnyɛɛ gole dɔ nə́ ǹ foo ne. Ǹ nə́ baa si ǹ nə́ woo boo lɛ pɛ Yezu a kialandɛnan manɛ.

9Boɛɛn gɔrɔ, Yezu daa n da ǹ lɛ, á pɛ: «Ma á fòo diɛ ka nɛ!»

Ǹ nə́ n zɔ̃ ǹ nə́ dɔ Yezu li, ǹ nə́ kaa tán a giulun, ǹ ná a gòãn kũ, ǹ ná a guguru kɔ. 10Yezu tɔ́n pɛ ǹ nɛ: «Ka baran nyɛ́ɛ baa wa. Ka wo pɛ ma dɔɔ̃nɔn manɛ, mà ǹ wo Galilee gána nɛ, ǹ tá re die masɛ yiɛ walan.»

Yezu a yala-lɛduə̃lin nə boo mɛn da

11Lɔn lɛn bɛ́ zii la, sɔraasin mɛnɛn nə́ goã yala lɛ lɛduĩ, bɛn kɔnɔn nə́ n bɔyaa, ǹ nə́ daa kiwi gɔ́ɔ̃ nɛ, sii mɛn tumaa nə n zɛnaa, ǹ ná a tumaa laakalaa Lawa a wúlu-bɔlen goledɛnan lɛn manɛ. 12Wúlu-bɔlen goledɛnan laanka Zuifun goledɛnan nə́ n lɛ sɔkɔn. Ǹ bɛ́ ǹ nə́ da ǹ nə́ kaa kun, ǹ nə́ wɔrɔ gole kɔ sɔraasin lɛn ma la, 13ǹ nə́ pɛ ǹ nɛ: «Ka pɛ mà a kialandɛnan man nə́ daa tèlò-n, ǹ ná a gere lɛ koã, bɛ̀ kasɛn tá nyuù ni. 14Bɛ̀ gánadɛnaa ná a boo ma, wɔsɛn dinin tá re n doɛ wɔ bebele, màn mɛn bɛ́ toɛ, a baran màn kɔ́n zɛnaa ka-n wa.»

15Yala-lɛduə̃lin lɛn nə́ wɔrɔ lɛ si, ǹ pɛ ǹ nɛ lɔn, ǹ nə́ zɛnaa miɛ̃. Bɛ lɛ nɛ, bɛa boo lɛ nə́ n da wɔlɔ la Zuifun bii, yǎa á daa pelo ǹ yaa.

Yezu nə́ n din nyaa a kialandɛnan nɛ

(MAR 16.14-18; LUK 24.36-49; ZAÃ 20.19-23; NDS 1.6-8)

16 # MAT 26.32; MAR 14.28. Kialandɛnaa fulugoon lɛ woo Galilee gána nɛ. Yezu kele mɛn boo da ǹ nɛ, ǹ nə́ woo ǹ yii da la walan. 17Ǹ bɛ́ ǹ nə́ yɛ, ǹ ná a guguru kɔ, sɛnɛ, ǹ tɛn nə́ n yiri binbirin bɔ. 18Yezu nə́ n zɔ̃ á dɔ, á pɛ ǹ nɛ: «Lawa pàã tumaa kɔ ma la lon, á kɔ ma la tán. 19#NDS 1.8. Bɛ lɛ taman yii, ka woo, ka tɔrɔ tumaa baa maa kialandɛnan lɛa, ka *batɛmu da ǹ ganaa, ka Díi Lawa laanka a Nɛgiĩ ka Yiri Fu tɔ nɛ. 20Ma dí mɛn tumaa pɛ ka nɛ, ka ǹ daraa ǹ ganaa ǹ nə ǹ nya. Ka dɔ̃: Ma á kun ka-n baraabaraa, yǎa kanaa a nya pinaa.»

Currently Selected:

Matiə 28: SCE2013

Highlight

Copy