Matiə 27
27
Maǹ Yezu koe Pilati la
(MAR 15.1; LUK 23.1-2; ZAÃ 18.28-32)
1Baayɛlɛ yiisoon ne, Lawa a wúlu-bɔlen goledɛnan tumaa nə́ n lɛ kaa kun ka Zuifun goledɛnan kɔsɔn nɛ, mà maǹ die Yezu dii a gã. 2Ǹ nə́ Yezu yii, ǹ nə́ woo kɔ Rɔmun gánadɛnaa Pilati la.
Zudaasi a gɛ̀
(NDS 1.18-19)
3Zudaasi mɛn nə Yezu kɔ a zɔ́ɔn la, bɛ bɛ́ á yɛ mà ǹ nə́ Yezu a dɛ sii yɔrɔ bɔ, a gɔ́ɔ̃ yii wɔ̃. Á nɔmaa á wɔrɔ we pɔsɔɔ lɛ goa á woo ne Lawa a wúlu-bɔlen goledɛnan lɛn laanka Zuifun goledɛnan lɛn li, 4á pɛ ǹ nɛ: «Maa zɛ̀rɛ baãnaa kɔ ka la ke, má sii baraa zɛnaa!»
Ǹ nə́ tɔ́n pɛ nɛ: «Wɔsɛn wàa n sii n bɛ nɛ? N din mìi gɔ́ɔ̃ ǹ sii ni!»
5Zudaasi nə́ n gɔn bɔ wɔrɔ lɛ ganaa, á pɛsɛ̃ tán Lawa a kion, á soo á woo n din bɔlɔ da biɛ nɛ.
6Wúlu-bɔlen goledɛnan nə́ wɔrɔ lɛ goa, ǹ nə́ pɛ: «A kɔnpɛ ka wɔsɛn landa nɛ, minin bɛ́ Lawa goe ka wɔrɔ mɛn nɛ, wɔrɔ kɛ doamaa bie a n kaa kun ka bɛ-n wa, a giala minbuiin nyin giɔ̀mɔ nɛ.»
7Ǹ bɛ́ ǹ nə́ da ǹ nə́ kaa kun, ǹ nə́ woo bǎã kɔ́n pii dɔnɔn-zɛnaali lon ka bɛa wɔrɔ lɛ nɛ, mà maǹ die tiin gere biĩ a nɛ. 8Bɛ lɛ na á toa, ǹ tá bɛa bǎã lɛ bíi "mà bǎã" haalɛ tɔn pelo. 9#ZAK 11.12-13. Lawa a boo gii-dali Zeremii boo mɛn pɛ, bɛ lɛ lɛ nɔmaa á pã: «Ǹ nə́ wɔrɔ pɔsɔɔ lɛ goa, Izirayeli minin nə́ lɛ kɔ mà ǹ tá màn mɛn sarɛɛ a pii ǹ giɔ̀mɔ lɛa, 10ǹ nə́ woo bǎã pii ni dɔnɔn-zɛnaali lon, ka Dɛnaa bɛ́ á pɛ masɛ-n lɔn.»
Pilati nɔ̀n mɛn da Yezu la
(MAR 15.2-5; LUK 23.3-5; ZAÃ 18.33-38)
11Yezu woo, á n bɔlɔ pɛ gánadɛnaa yɔrɔ-a. Bɛ́ nɔ̀n da la: «N din lɛ n Zuifun kii lɛa ya?»
Yezu tɔ́n pɛ: «N din nə bɛ pii.»
12Bɛ kio, Lawa a wúlu-bɔlen goledɛnan laanka Zuifun goledɛnan kɔsɔn bɛ́ a zɛ̀rɛ biɛ, a boo kɔ́n da wa. 13Pilati tɔ́n pɛ nɛ: «Ǹ bɛ́ zɛ̀rɛ mɛn tumaa diɛ n la, n too a miɛ wa?»
14Sɛnɛ, Yezu na a lɛ si ka bɛ kɔ́n nɛ wa. Bɛ lɛ na á gánadɛnaa tɔwaa parsiini.
Pilati a lɛ kɔ Yezu a gɛ̀ ganaa
(MAR 15.6-15; LUK 23.13-25; ZAÃ 18.39—19.16)
15Bɛ̀ *kiɛ̃mala ǹ zɔ́n nə́ dɔ lɔn, gánadɛnaa n kòso nɛ goon diɛ. Zaman bɛ́ giɛ li, mà a min mɛn da, a n bɛ diɛ. 16Bɛa waáraa lɛ nɛ, bɛ̀ kòso nɛ goon tá ǹ lon, a tɔ n Yezu ǹ nə́ bíi Barabaasi. A tɔ bɔ parsiini. 17Zaman lɛ bɛ́ á n lɛ sɔkɔn, Pilati tɔ́n nɔ̀n da ǹ la: «Ka ǹ giɛ li ma die da? Yezu mɛn bɛ́ ka á bíi Barabaasi, hinlaa Yezu mɛn bɛ́ ka á bíi Minin Nyin-sili?»
18A giala Pilati dɔ̃ parsiini, mà foo a wuu pɛ na á toa ǹ nə́ Yezu wɔ asɛ gɔn.
19Pilati bɛ́ kiri wɔ ǹ bǎã nɛ, a lɔ min dia mà a wo pɛ nɛ: «N nyan toa n nə n sii wɔ giĩ zɛ̀rɛ baãnaa kɛ a sii-n wa. A giala masɛ narɛɛ mɛn wɔ a wɔ gɔn la gunun tèlò-n, á masɛ nɔmaa parsiini.»
20Lawa a wúlu-bɔlen goledɛnan laanka Zuifun goledɛnan nə́ zaman lɛ gòãn sɔmɔ, mà ǹ Pilati nyankɔ a Barabaasi da, a Yezu dɛ. 21Gánadɛnaa wusoo á nɔ̀n da ǹ la: «Ka ǹ giɛ li ma kɛa min paa kɛ lɛ mɛn da?»
Ǹ nə́ tɔ́n pɛ nɛ: «Barabaasi!»
22Pilati tɔ́n nɔ̀n da ǹ la: «Yezu mɛn bɛ́ ǹ tá bíi Minin Nyin-sili, ma wàa zɛnaa bɛ nɛ?»
Ǹ dinin tumaa nə́ n toa: «A dere gɔn ganaa!»
23Pilati wusoo á nɔ̀n da: «A na á wàa sii baraa zɛnaa?»
Sɛnɛ, ǹ nə́ wusoo ǹ nə́ n lɛn saa lon kɔsɛkɔsɛ: «A dere gɔn ganaa!»
24 #
TDP 21.6-9. Pilati bɛ́ á dɔ̃, mà asɛ a die boe la a sii kɔ́n zɛnaa wa, mà màn nə́ tɔn miɛ zaman lɛ a lala diɛ li, á mu saa, á n gɔn pii zaman lɛ yɔrɔ-a, á pɛ: «Ma gòɛ̃ ba giĩ kɛ a gɛ̀ sii-n wa! Ka dinin mìi gɔ́ɔ̃ ǹ sii ni!»
25Zaman lɛ tumaa tɔ́n pɛ: «A gɛ̀ lɛ a koen nə goã wɔsɛn dinin laanka wɔa nɛnyaanan mìi ni!»
26Pilati nɔmaa á Barabaasi bɔ á kɔ ǹ la, á minin kaa Yezu ganaa ǹ nə́ duwəə ka sɔsɔrɔ nɛ, á tɔ́n kɔ ǹ la mà ǹ dere gɔn-lakerekaã ganaa.
Sɔraasin man yaa we Yezu ganaa
(MAR 15.16-20; ZAÃ 19.2-3)
27Gánadɛnaa a sɔraasin nə́ woo ka Yezu ni a sumu-n. Sɔraasin tumaa daa a lɛnpɛnɛ walan. 28Ǹ ná a mɔnaan sɔlɔ ǹ nə́ ǹ bɔ a ganaa, ǹ nə́ dɔnkɛ tã wɔ a ganaa. 29Ǹ nə́ kii bafolo tã ka nyan gùrùn ni, ǹ nə́ wɔ a mìi ganaa, ǹ nə́ bàbàla wɔ a gusin a gɔn, ka n pɛ mà maǹ koɛ kii lɛa. Bɛ kio, ǹ nə́ n musi lɛn kurumaa tán a giulun, ǹ nə́ yaa wɔ a ganaa, bɛ̀ ǹ tá pii: «Fòo le, Zuifun kii!»
30Ǹ nə́ sɛ̀ kaa a ganaa, ǹ nə́ bàbàla lɛ saa bɛ̀ ǹ duwəə ne a mìi ganaa. 31Ǹ bɛ́ ǹ nə́ yaa wɔ a ganaa ǹ nə́ nya ǹ mɛn waáraa, ǹ nə́ dɔnkɛ lɛ sɔlɔ ǹ nə́ bɔ a ganaa, ǹ nə́ wusoo ǹ ná a din a mɔnaan goa ǹ nə́ ǹ wɔ a ganaa, bɛ kio ǹ nə́ woo ne, mà maǹ dere gɔn ganaa.
Maǹ Yezu dere gɔn-lakerekaã ganaa
(MAR 15.21-32; LUK 22.26-43; ZAÃ 19.17-27)
32Ǹ bɛ́ soe kiwi gɔ́ɔ̃ nɛ, ǹ nə́ kaa Sirɛnin giĩ goon lɛ, a tɔ n Simɔn. Sɔraasin lɛn nə́ kũ ka pàã nɛ, mà a Yezu a dere ǹ gɔn gũ. 33Ǹ nə́ dɔ bǎã kɔ́n nɛ, ǹ nə́ bíi "mìi pán bǎã", ǹ dinin bɔlɔ nɛ, mà "Golgootaa". 34#LOE 69.22. Ǹ nə́ duvɛ̃ lɔlɔkɔn ka yii tii ǹ màn kɔɔsɛ kɔ́n nɛ walan, ǹ nə́ kɔ Yezu la mà a mi. Sɛnɛ, a bɛ́ a ná a nɛ̀n da, a lɛ kɔ á mi wa.
35 #
LOE 22.19. Ǹ nə́ dere gɔn ganaa, ǹ nə́ n pã a mɔnaan ganaa, ǹ nə́ tɔ́n nə ǹ gii kɔn. 36Bɛ kio, ǹ nə́ giã tán-a ǹ ná a lɛduə̃. 37Ǹ dɔlɔ bɔ a ganaa sii mɛn tumaa taman yii, ǹ nə́ bɛn kiɛ̃ màn ganaa, ǹ nə́ dere a mìi la mà "Zuifun kii Yezu lɛ n ka kɛ nɛ". 38Ǹ nə́ mɛnaa minin la wole min paa dɔ dere gɔn ganaa Yezu li, goon ná a gusin, goon ná a gɔsɛ.
39 #
LOE 22.8; 109.25. Min mɛnɛn nə́ goã kiɛ̃ walan, bɛn man nə́ goã ǹ mìi papasɛ bɛ̀ ǹ tá sɔ kiɛ la. 40#MAT 26.61; ZAÃ 2.19. Maǹ nə́ goã pii ni: «N din mɛn bɛ́ mà nsɛ n die Lawa a Kion wurii, n wusoo n kɔsɔ dɔ lɛawaa sɔɔ gɔ́ɔ̃ nɛ, n din kirisibaa, bɛ̀ ma n Lawa a Nɛgiĩ lɛa sonbore, gisĩ n nə n bɔ dere ǹ gɔn ganaa kəni!»
41Lawa a wúlu-bɔlen goledɛnan laanka landa sii-daraalin dɔn nə́ yaa wɔ a ganaa kun ka Zuifun goledɛnan nɛ, ǹ nə́ pɛ: 42«N min kɔsɔn kirisibaa, sɛnɛ, n din ba boe la n nə n din kirisibaa wa! Táa ma n Izirayelin kii lɛa? Gisĩ sisia kəni n nə n bɔ dere ǹ gɔn ganaa, wɔsɛn nə tɔn golee n li. 43#LOE 22.9. N foo doa Lawa ganaa n pɛ, mà nsɛ n Lawa a Nɛgiĩ lɛa. Haya! Bɛ̀ Lawa lɛ a n narɛ kəni, a n kirisibaa sisia, wɔsɛn nə yɛ!»
44Ǹ mɛnaa minin la wole min paa mɛn dɔ dere gɔnɔn ganaa a li, bɛn dɔn man nə́ goã sɔ kiɛ la miɛ̃.
Yezu a gɛ̀
(MAR 15.33-41; LUK 23.44-49; ZAÃ 19.28-30)
45Wasa bɛ́ á dɔ baã bii, wɔlɔ tii gána lɛ paǹ din tumaa nɛ yǎa biikoo sɔɔ, wasa lɛ kanɛɛ a biikoo li. 46#LOE 22.2. Wasa lɛ bɛ́ á kanaa, Yezu nə́ n lɛ dɛ kɔsɛkɔsɛ á pɛ: «Maa Lawa, maa Lawa, wàa na á baa n tá masɛ toɛ walan?» (ǹ dinin bɔlɔ nɛ, mà "Yilii, Yilii, lema sabakatanii?")
47Min mɛnɛn bɛ́ ǹ nə́ goã walan, bɛn tɛn ná a lɛ ma, ǹ nə́ tɔ́n pɛ: «Á ke lɛ diɛ Yilii la!»
48 #
LOE 69.22. Ǹ goon nə́ baa si gɔrɔ, á woo màn sã duvɛ̃ pipiã li á wɔ bàbàla ganaa á dia Yezu la, mà a mi.
49Gialakunun nə́ tɔ́n pɛ: «A toa dɛ, bɛ̀ Yilii á die a kirisibiɛ, wɔsɛn tá re giɛ a ganaa!»
50Yezu wusoo á n lɛ dɛ doo ka kɔsɛkɔsɛ, a fɔfoã nə́ n si la.
51 #
BBN 26.31-33. A din biikoo lɛ li, Lawa a kion gɔ́ɔ̃ kuru kɔn-a ǹ mɔnaa toɛ̃ kɔn-a màn paa, a saa a lon ganaa, a daa a tán-a yaa. Tán bìn da, páran nə́ yuyu, 52yalan nə́ n lɛ bũ. Lawa a minin mɛnɛn nə gã lɛlɛ, bɛ gigiã yii wusoo á kaa, 53ǹ nə́ soo ǹ nə́ ǹ bɔ yala-n. Yezu yii a kaa a bɔ geren bii kio, ǹ nə́ wɔ Zeruzalɛmu kiwi lɛ gɔ́ɔ̃ nɛ, min gigiã nə́ ǹ yɛ walan.
54Rɔmun sɔraasin goledɛnaa laanka sɔraasin mɛnɛn nə́ goã Yezu lɛduĩ, bɛn nə́ tán a bìn-diɛ lɛ yɛ, kun ka sii mɛn tumaa nə́ n zɛnaa, nyɛ́ɛ nə́ ǹ kũ parsiini, ǹ nə́ tɔ́n pɛ: «A na á goã Lawa a Nɛgiĩ lɛa sonbore!»
55 #
LUK 8.2-3. Lɔ gigiã mɛn nə kɔ Yezu kio lɛ haalɛ Galilee gána nɛ, bɛ̀ ǹ dí nya nɛ, bɛn nə́ ǹ toa sɔsɔɔ ǹ nə́ ga bɛa siin lɛn ganaa. 56Bɛa lɔn lɛn bii, Magadalaan Mariya tan, Zaaki laanka Zozɛfu a náa Mariya nɛ, ka Zebedee a nɛnyaanan náa nɛ.
Yezu gere biĩ boo
(MAR 15.42-47; LUK 23.50-56; ZAÃ 19.38-42)
57Wasa bɛ́ á mɛ, Arimateen giĩ pàãma goon nə́ daa, á tɔ n Zozɛfu, a dɔ na á goã koe Yezu lɛ. 58Á woo Pilati li, á Yezu gere nyankɔ a lon. Pilati tɔ́n pɛ mà ǹ kɔ la. 59Zozɛfu ná a gere lɛ saa, á bĩ ǹ mɔnaa dii pɛnɛ a ganaa. 60A yala mɛn fɔ̃ kele kolo ganaa a din wɔ lɛa, á woo bĩ walan. Bɛ kio, á kɔlɔ kaara birikəə᷉ á yala lɛ lɛ tã nɛ, á tɔn kiɛ̃. 61Magadalaan Mariya laanka Mariya goon kɛ lɛ goã walan giã-n tán-a yala lɛ yɔrɔ-a.
Yezu a yala lɛduə̃
62Bɛa lɛawaa, *susu ǹ pii a siin yɔrɔ bɔ pinaa a lɛawaa, Lawa a wúlu-bɔlen goledɛnan laanka *Fariziɛ̃n nə́ woo Pilati li kun, 63#MAT 16.21; 17.23; 20.19; MAR 8.31; 9.31; 10.33-34; LUK 9.22; 18.31-33. ǹ nə́ pɛ: «Goledɛnaa, wɔsɛn yiri tá a nɛ minin yiri-sãli kɛ lɛ pɛ, bɛ̀ a yii bɛ́ tɔn koo mà asɛ a gɛ̀ lɛawaa sɔɔ, mà asɛ yii á die kiɛ. 64Bɛ lɛ taman yii, wɔsɛn man nə n nyankoe, n pɛ n sɔraasin manɛ ǹ yala lɛ lɛduə̃ yǎa a lɛawaa sɔɔbaa ǹ wɔ pinaa, màn mɛn bɛ́ toɛ, a kialandɛnan baran da a gere lɛ koã, ǹ wusoo ǹ pɛ minin manɛ bɛ kio, mà a yii na á kaa á n bɔ geren bii wa. Bɛ̀ a n zɛnaa miɛ̃ wa, bɛa minin yiri sã á gole koe á la bibinaa wɔ kɛ nɛ.»
65Pilati tɔ́n pɛ ǹ nɛ: «Sɔraasin nə́ ke, ǹ tá boe la ǹ na a lɛduə̃. Ka woo ka n doa ka ga yala lɛ walan parsiini.»
66Ǹ nə́ tɔ́n woo ǹ nə́ yala lɛ a lɛduə̃ sii yɔrɔ bɔ. Kɔlɔ mɛn bɛ́ a lɛ tiɛ̃, ǹ nə́ gɔn bǎã da bɛ ganaa, min ba a lɛ buĩ a din gɔn wìi a lɛa wa. Ǹ nə́ sɔraasin koa a li, mà ǹ na a lɛduə̃.
Currently Selected:
Matiə 27: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
