Matiə 20
20
Yezu boo giməə mɛn da rezɛ̃ da wuru dí-nyalin wɔ paǹ li
1Lawa a dí lɛ a nya ǹ gɔn a kɔnboe n ka kɛ nɛ: Kɛdɛnaa goon na á da wuru bɔ, bɛa da lɛ tɔ n *rezɛ̃ da. Ǹ kɔ́n pinaa, á yoo baayɛlɛ yiisoone, a n giɛ dí-nyalin li ǹ kiɛ a nɛ. 2A laanka dí-nyalin lɛn nə́ lɛ kɔ kɔn la, ka pinin goon dí nya ǹ giɔ̀mɔ nɛ ǹ saraa lɛa. Bɛ kio, á ǹ dia a wuru lɛ nɛ. 3Wasa bɛ́ á kaa, á wusoo á soo kanaa doo, á kɔsɔn yɛ golee-n bii-a, dí ba ǹ gɔn wa. 4Á tɔ́n pɛ ǹ nɛ: «Ka dɔn nə wo dí nya maa wuru-n, màn mɛn bɛ́ kɔnpii kaa saraa nɛ, ma á die bɛ koe ka la.» 5Ǹ nə́ woo. A bɛ́ á wusoo á soo kanaa penleen ne, bɛ kio doo, wasa lɛ kanaa-a, a dí-nyalin mɛnɛn yɛ, á bɛn dɔn dia miɛ̃. 6Wasa miɛ-n lɛn li, á soo á kɔsɔn dɔn yɛ golee-n bii-a, á tɔ́n nɔ̀n da ǹ la: «Wàa na á baa ka lɛawaa kaara lɛ nya baãnbii-a kooro ka n ka a dí nyɛɛ wa?» 7Ǹ nə́ tɔ́n pɛ nɛ: «A giala min na a wɔsɛn goa dí-n wa.» Á tɔ́n pɛ ǹ nɛ: «Ka dɔn nə wo maa wuru-n.»
8 #
LWS 19.13; TDP 24.15. Wasamiɛn nɛ, yoo waáraa bɛ́ á dɔ, á tɔ́n pɛ a dí sii yɔrɔ-bɔle ne: «Lɛ dia dí-nyalin lɛn la, n didie a saraa kɔ la, a saa da nyɔɔbaa wolen ganaa a wo bibinaa wolen yaa.» 9Min mɛnɛn nə dí giala kɔ wasamiɛn lɛn li, bɛn nə́ daa ǹ nə́ pinin goon dí nya ǹ giɔ̀mɔ yɛ. 10Min mɛn tumaa dí giala kɔ ǹsɛn nyɛɛnɛ, bɛn bɛ́ die, ǹ nə́ taasɛ mà ǹsɛn wɔ á die liɛ bɛ nɛ. Sɛnɛ, ǹ dɔn gogoonmaa na á pinin goon dí nya ǹ giɔ̀mɔ yɛ. 11Maǹ nə́ bɛa wɔrɔ lɛ si, bɛ̀ ǹ tá sɛ̀ bisin pii wurudɛnaa lɛ ganaa ǹ lɛ giulun: 12«Da nyɔɔbaa wolen kɛn, ǹ dí nya á kiɛ̃ biikoo goon la wa, maǹ bɛn saraa biɛ goon ka wɔsɛn wɔ nɛ, a da yaa wɔsɛn nə́ lɛawaa goon dí kɛ lɛ a nɔmaa si wɔ ganaa, wasa panpan kɛ giulun!» 13Á tɔ́n pɛ ǹ goon ne: «Giaáragiĩ, masɛ bie mɛnɛɛ n la wa. Wɔ bie wɔ́ lɛ kɔ kɔn la ka pinin goon dí nya ǹ giɔ̀mɔ nɛ kaa saraa lɛa wa ya? 14N wɔ si n woo. Ma màn mɛn kɔ n la, a na á kɔɔ̃n kɔ ma-a ma bɛ lɛ miã kɔ a dɔ la. 15Bɛ̀ ma tá li ma sii mɛn zɛnaa ka ma din a wɔrɔ nɛ, ma a boe la ma bɛ zɛnaa-n wa? Ma nə n yii baraa boe ma li sii sonbore zɛnaa lɛ taman yii!»
16Yezu tɔ́n pɛ: «A n miɛ̃, kiodɛnan tá re nyɛɛnaandɛnan biɛ, min mɛnɛn bɛ́ nyɛɛnaandɛnan lɛa, bɛn tá re kiodɛnan biɛ.»
Yezu a gɛ̀ laanka a yii kaa boo diɛ a gunyin sɔɔbaa ǹ wɔ
(MAR 10.32-34; LUK 18.31-34)
17Yezu bɛ́ re woe Zeruzalɛmu, a ná a kialandɛnaa fulupaa lɛ kũ ǹ dininsɔɔ̃nɔn, ǹ bɛ́ zii la á pɛ ǹ nɛ: 18«Haya, wɔsɛn nə́ ke woe Zeruzalɛmu. Ǹ tá re Min a Nɛgiĩ we Lawa a wúlu-bɔlen goledɛnan laanka landa sii-daraalin gɔn walan. Bɛn tá re ma zɛ̀rɛ biɛ mà ma doamaa-n ka gɛ̀ nɛ. 19Ǹ tá re ma koe tɔrɔ kɔsɔn la. Bɛn tá re yaa we ma ganaa, ǹ ma duwəə ka sɛ̌n nɛ, ǹ ma dere gɔn ganaa. Ma a gɛ̀ lɛawaa sɔɔ, ma yii á die kiɛ.»
Zaaki laanka ZAÃ a náa màn mɛn nyankɔ Yezu la
(MAR 10.35-45)
20Zebedee a lɔ nə́ n zɔ̃ á dɔ Yezu li ka a nɛnyaan min paa nɛ, á kaa tán-a a giulun, a ná a nyankɔ mà a bǐɛ̃ kɔ asɛ ganaa. 21Yezu tɔ́n nɔ̀n da la: «Ma n giɛ wàa li?»
Á tɔ́n pɛ nɛ: «Bɛ̀ n dɔ n kiibaa lɛ nɛ ǹ mɛn waáraa, masɛ a nɛnyaan min paa ke bii-a, lɛ kɔ goon nə giã n gusin, goon nə giã n gɔsɛ.»
22Yezu tɔ́n pɛ: «Ka bɛ́ màn mɛn nyankoe, ka a doɛ̃ wa. Masɛ bɛ́ re là-paparɛɛ mɛn yii, ka tá re boe la ka bɛ si ka ganaa?»
Ǹ nə́ tɔ́n pɛ Yezu ni: «Wɔsɛn tá boe la.»
23Yezu tɔ́n pɛ ǹ nɛ: «Ka tá re masɛ a là-paparɛɛ kɛ tɔrɔ yii sɛn. Sɛnɛ, min mɛn bɛ́ re giɛ̃ ma gusin hinlaa ma gɔsɛ, masɛ bie bɛ yɔrɔ boe wa. Maa Díi Lawa bǎãn lɛn zɛnaa min mɛnɛn manɛ, bɛa dɛnan wɔn manɛ.»
24Kialandɛnaa fù gialakun lɛ bɛa boo lɛ ma lɔn, ǹ foo busu dɔɔ̃n min paa lɛ li. 25#LUK 22.25-26. Yezu tɔ́n nə ǹ tumaa bíi, á pɛ ǹ nɛ: «Ka á doɛ̃, tɔrɔ kɔsɔn kiin man boe ǹ minin yii ni, ǹ pàãdɛnan man pàã nyɛɛ ǹ nɛ. 26#MAT 23.11; MAR 9.35; LUK 22.26. Bɛ miã doamaa bie a n zɛnaa ka bii wa. Bɛ̀ min mɛn tá ka bii, a n giɛ goledɛnaabaa li, bɛa dɛnaa doamaa nɛ a n baa kaa dí-nyali lɛa. 27Bɛ̀ min mɛn dɔ tá ka bii, a n giɛ nyɛɛnaandɛnaabaa li, yǎa ǹ dɛnaa nə n din biɛ kaa bɛ̀rɛ lɛa. 28Min a Nɛgiĩ dinmaa kɛ lɛ na á daa miɛ̃, a bie á daa mà minin nə dí nya asɛ-n wa, sɛnɛ, a na á daa dí nya minin manɛ, á n din nyin kɔ minbuiin tumaa nyin si ǹ giɔ̀mɔ lɛa.»
Yii tere-a min paa yii buĩ
(MAR 10.46-52; LUK 18.35-43)
29Yezu laanka a kialandɛnan bɛ́ soe Zerikoo, zaman gole kɔ ǹ kio lɛ. 30Yii tere-a min paa kɔ́n nə́ goã giã-n tán-a zii para-a. Ǹ bɛ́ ǹ nə́ ma mà Yezu n kiɛ̃, ǹ nə́ yoo ǹ nə́ n lɛ dɛ a ganaa: «Dɛnaa, kii Davida tɔrɔ ganaa, makara bɔ wɔsɛn ganaa!»
31Zaman lɛ yoo ǹ gialaa, màn mɛn bɛ́ toɛ, ǹ nə n lɛ tã. Sɛnɛ, ǹ nə́ wusoo ǹ nə́ màn da ǹ lɛ-dɛ li: «Dɛnaa, wɔsɛn kii Davida tɔrɔ lɛɛ, makara bɔ wɔ ganaa!»
32Yezu golee, á lɛ dia ǹ la, á tɔ́n pɛ ǹ nɛ: «Ka n giɛ li ma wàa zɛnaa ka nɛ?»
33Ǹ nə́ tɔ́n pɛ Yezu ni: «Wɔ n giɛ li n wɔ yiin bũ.»
34Ǹ makara Yezu kũ, á nɔmaa á n gɔn da ǹ yiin ganaa. A din bǎã-n gɔrɔ, ǹ yiin nə́ n bũ, ǹ nə́ kɔ Yezu kio lɛ.
Currently Selected:
Matiə 20: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
