Matiə 19

Yezu boo mɛn da lɔ laanka giĩ a toɛ̃ kɔn-a wɔ gɔn la

(MAR 10.1-12)

1Yezu bɛ́ á bɛa doroon lɛn kɔ á nya, á soo Galilee gána nɛ, á woo bǎã kɔ́n nɛ Zudee gána nɛ Zurdɛ̃ tà kio. 2Zaman gigiã kɔ a kio lɛ, á busulə gigiã a busu nya walan.

3 *Fariziɛ̃n kɔnɔn nə́ n zɔ̃ ǹ nə́ dɔ a li, ǹ nə́ nɔ̀n da la ǹ tá n diɛ a gɔ́ɔ̃ li: «Wɔa landa lɛ á lɛ koe giĩ na a lɔ loo haalɛ ta a mìi n ka sii mɛn nɛ?»

4 # SGK 1.27; 5.2. Yezu tɔ́n pɛ ǹ nɛ:

– Lawa a boo bɛ́ màn mɛn diɛ, ka bɛ lɛ pɛ sɛ́wɔ-n wa? Min mɛn lɛ á ke á ǹ zɛnaa, a na á ǹ zɛnaa giĩ laanka lɔ, haalɛ kanaa a giala kɔ waáraa. 5#SGK 2.24. Bɛ kio á tɔ́n pɛ: «Bɛ lɛ a lɛa nɛ, giĩ á re n niɛ̃ a n bɔ ǹ di laanka ǹ dan ganaa, a n doa kɔn ka a lɔ nɛ, ǹ dinin paanan tá re n biɛ goon.» 6Bɛa yɔrɔ lɛ la, ǹ bie min paa doo wa, maǹ nə́ n baa goon. Bɛ lɛ taman yii, Lawa bɛ́ á màn mɛn doa kɔn, min kɔ́n nyan toa a bɛ toɛ̃ a bɔ kɔn wa.

7 # TDP 24.1-4; MAT 5.31. Fariziɛ̃n lɛn nə́ tɔ́n nɔ̀n da la: «Wàa na á baa Muizu pɛ, mà yǎa giĩ toɛ̃ kɔn-a ǹ sɛ́wɔ zɛnɛɛ a koe a lɔ la a tɔn lui?»

8Yezu tɔ́n pɛ ǹ nɛ: «Ka dinin foo a kakabaa na á toa, Muizu tɔ́n lɛ kɔ mà ka kaa lɔn loo. Bɛ̀ bɛ bie wa, a bie miɛ̃ kanaa a giala kɔ waáraa wa. 9#MAT 5.32; KOR1 7.10-11. Masɛ n pii ka nɛ, bɛ̀ giĩ ná a lɔ loo, a da yaa, a n toa li á giĩ kɔsɔ si wa, bɛ̀ á kɔsɔ saa, a na á naarɛbaa zɛnaa.»

10A kialandɛnan nə́ tɔ́n pɛ nɛ: «Bɛ̀ giĩ laanka a lɔ bii gɔ́ɔ̃ ǹ sii n miɛ̃, bɛ̀ n lɔ wɔ wa bɛ á pɛsã.»

11Yezu tɔ́n pɛ ǹ nɛ: «Min tumaa a boe bɛ la wa. Lawa na a boomala ǹ pàã kɔ min mɛnɛn la, bɛn dininsɔɔ̃nɔn man boe la. 12Min tɛn tá yii giĩbaa ná a ba a lon wa, minin tá min tɛn a giĩbaa boe ǹ bɔ a giulun, min tɛn dɔ á n piɛ̃ ka lɔ-saa nɛ lon a kiibaa ǹ dí lɛ taman yii. Bɛ̀ min mɛn tá a giala miɛ, ǹ dɛnaa ná a giala ma.»

Yezu barka da nɛnyaan bɔnboɛɛnɛn ganaa

(MAR 10.13-16; LUK 18.15-17)

13Minin nə́ daa ka nɛnyaanan nɛ Yezu li, mà a n gɔn da ǹ la, a Lawa nyankɔ ǹ lɛa. Sɛnɛ, a kialandɛnan nə́ yoo ǹ gialaa. 14Yezu tɔ́n pɛ: «Ka toa nɛnyaanan lɛn nə da masɛ li, ka baran ǹ kurəə wa. A giala min mɛnɛn bɛ́ ka nɛnyaanan bɛ́ lɔn, *Lawa a kiibaa lɛ n bɛn wɔ lɛa.»

15Á n gɔn da ǹ la, á barka da ǹ ganaa. Bɛ kio á kiɛ̃ á n bɔ walan.

Pàãmabaa a mìi gɔ́ɔ̃ ǹ sii

(MAR 10.17-31; LUK 18.18-30)

16Giĩ goon nə́ n zɔ̃ á dɔ a li gɔrɔ, á nɔ̀n da la: «Mìinaa, masɛ doamaa nɛ ma sii sonbore mɛn zɛnaa, ma tɔn nyin nyabaã yɛ?»

17Yezu tɔ́n pɛ nɛ: «Wàa na á baa n tá nɔ̀n diɛ ma la sii sonbore wɔ gɔn la? Min goon dinsɔɔ̃ n siĩni, bɛ n ka Lawa nɛ. Bɛ̀ n tá li n nyin nyabaã yɛ, Lawa a dí-pɛn tamaa.»

18 # BBN 20.13-16; TDP 5.17-20. Giĩ lɛ tɔ́n nɔ̀n da la: «Ǹ mɛnɛn?»

Yezu tɔ́n pɛ: «N baran gɛ̀ dɛ wa, n baran naarɛbaa zɛnaa wa, n baran wurumu baa wa, n baran soɛ da min la wa, 19#BBN 20.12; TDP 5.16; LWS 19.18. n díi laanka n náa guguru kɔ, n nə n miã kɔsɔ narɛ ka n bɛ́ n din narɛ lɔn.»

20Tɔntɔraa giĩ lɛ tɔ́n pɛ nɛ: «Masɛ bɛ din tumaa tamaa. Wàa n masɛ nyaabiɛ doo?»

21Yezu tɔ́n pɛ nɛ: «Bɛ̀ n tá li a lɛ pã, woo, n nə n gɔn màn tumaa sã, n na a wɔrɔ gii doobaan manɛ, n tá re gɔn màn gigiã yii Lawa a piɛ. Bɛ zɛnaa n tɔn da kɔ masɛ kio lɛ.»

22Giĩ lɛ bɛ́ á bɛa boo lɛ ma lɔn, a yɔrɔ kɔsiɛmaa na á woo, a giala gɔn màn gigiã tá a lon.

23Yezu tɔ́n pɛ a kialandɛnan manɛ: «Masɛ n pii ka nɛ, sonbore ne: Pàãma a wɔ lon a kiibaa-n tá re kaka koe! 24Masɛ n pii ka-n doo: Nyɔɔmaa a wɔ mɛ́sɛn yala-n tá naanaa pàãma a wɔ Lawa a kiibaa-n nɛ.»

25A kialandɛnan lɛn bɛ̀ ǹ nə́ bɛa boo lɛ ma lɔn, á kaãbaa da ǹ ganaa parsiini, ǹ nə́ tɔ́n pɛ: «Bɛ á miɛ̃, die n boe la a kirisibaa?»

26Yezu ga ǹ ganaa ka gongon, á tɔ́n pɛ ǹ nɛ: «Minbuiin nɛ ba boe la a n din kirisibaa wa. Sɛnɛ, Lawa á boe sii din tumaa la.»

27Bɛa biikoo li, Piɛrɛ nə́ n lɛ da boo lɛ nɛ, á pɛ nɛ: «Ga! Wɔsɛn bɛ́ wɔ́ màn tumaa toa walan, wɔ kɔ n lɛ, wɔsɛn wɔ n die n biɛ lɔn kəni?»

28 # MAT 25.31; LUK 22.30. Yezu tɔ́n pɛ ǹ nɛ:

– Masɛ n pii ka nɛ sonbore: Bɛ̀ Min a Nɛgiĩ giã a gugurubaa ǹ kii dankan la, kasɛn min fulupaa mɛn kɔ ma kio lɛ, ka dɔn tá re giɛ̃ kii dankanan la, ka kiri wɔ Izirayeli tɔrɔ fulupaa kɛ lɛ ganaa. 29Bɛ̀ min mɛn ná a kionən toa walan masɛ tɔ taman yii, ǹ dɔɔ̃ngiĩn ni, ǹ miãnɛnɛn nɛ, ǹ di laanka ǹ dan nɛ, a nɛnyaanan nɛ, hinlaa a wuru ni, bɛa dɛnaa á die bɛ din tumaa a laman paabiɛ yii, a wusoo a nyin nyabaã dɔ yɛ. 30#MAT 20.16; LUK 13.30. Pelo a nyɛɛnaandɛnaa gigiã á re kiodɛnan biɛ, pelo a kiodɛnaa gigiã dɔ á re nyɛɛnaandɛnan biɛ.

Currently Selected:

Matiə 19: SCE2013

Highlight

Copy