Abakuku 1
1
1Dɛnaa Lawa a boo á ke á da a boo gii-dali Abakuku ni sii-nyaa gɔ́ɔ̃ nɛ.
Lawa a boo gii-dali n Dɛnaa Lawa bii we
2Dɛnaa Lawa,
man die goɛ̃ n bíi we
yǎa biĩ kəni?
N bɛ́ n ba n too koe wa!
Ma nə n lɛ dii
kakaarɛbaa taman yii,
sɛnɛ n ba wɔ kirisibiɛ wa!
3Wàa na á baa n tá toɛ
ma yii á sii baraa yii?
Wàa na á baa n yii
á wɔa fuu ganaa,
n nə́ n ba sii zɛnɛɛ dɔn wa?
Bǎã tumaa nɛ,
minin man kokoo we,
ǹ nə́ kakaarɛbaa zɛnɛɛ.
Kiri laanka zia n bǎã tumaa nɛ.
4Dí-pɛn pàã nya.
Min kɔn ba kiri pepere we wa.
Min baraa n yui
min pepere gialaa,
Kiri-wɔlen man kiri kɔkɔrɔ we.
Lɛ si, Baabilonii minin daa wɔ paǹ li
5 #
NDS 13.41. Dɛnaa Lawa pɛ:
Ka ga,
sii mɛn bɛ́ n zɛnɛɛ
tɔrɔ gialakunun kɛn bii,
ka n yiri kɔ bɛ li taãn nɛ,
a tɔwaa da ka ganaa,
a kaãbaa da ka-a.
Kaa yiikoonaabaa gɔ́ɔ̃ nɛ,
man die kaãbaa sii zɛnɛɛ
Bɛ̀ ǹ tá a laakalɛɛ ka yii ni,
ka a re golee li wa!
6 #
KIIN2 24.2. Á ke,
man die *Baabilonii minin
kiɛ ka-a,
ǹsɛn mɛnɛn bɛ́ kakaarɛ,
ǹ nə́ ǹ ba makara doɛ̃ wa.
Maǹ woe bǎã tumaa nɛ,
ǹ wo gánan kũ,
ǹ mɛnɛn bɛ́ ǹ ba ǹ wɔ lɛa wa.
7Maǹ kakaarɛ, nyɛ́ɛ diɛ.
Ǹ dininmaan manə ǹ dí-pɛn koɛ,
ka ǹ zɛnaa ǹ siin ni.
8Ǹ sùin baa la goen wɔ nɛ.
Don ginin mɛnɛn bɛ́ woe
dɔ doe wasamiɛ̃nɛ,
ǹ kakaarɛbaa la bɛn wɔ nɛ.
Ǹ sùidɛnan man boe sɔsɔɔ die,
ǹ nə́ paparɛ.
Maǹ yui ka giogiatã-a bɛ́ lɔn
woe a siĩ siɛ.
9Ǹ tumaa n die màn kokoo a lɛa.
Maǹ giɛ ǹ nyɛɛnɛ sɔnsɔn.
Maǹ kòso nɛn soekɔn,
mɔnaa nɛ ka nyɔɔsɔ̃ bɛ́ lɔn.
10KIIN ba màn kɔn lɛa ǹ yii li wa.
Ǹ laadoo bie ka
gána a nyɛɛnaandɛnan nɛ wa.
Kiwi tamaa-wolen ba
nyɛ́ɛ diɛ ǹ ganaa wa.
Maǹ tii diɛ kɔn la kungɔnɔn kio,
ǹ dii la, ǹ boo la ǹ kiwin kũ.
11Maǹ kiɛ̃ ka ǹ zii ni,
ka piɛ̃ gole bɛ́ lɔn.
Ǹ dinin yii li,
ǹ pàã kɛ lɛ n lawa lɛa.
Lawa a boo gii-dali n Dɛnaa Lawa bii we doo
12A kũ a giala kɔ waáraa ganaa,
n din nə Dɛnaa Lawa lɛa.
Maa Lawa nɛ n nɛ,
n tá sonbore.
Wɔ a re giɛ̃ wa#1.12 Sɛ́wɔ tɛn nə pii mà: N ba giɛ̃ wa..
Dɛnaa Lawa,
n din ni n Baabilonii minin bɔ
mà ǹ kiri kuru wɔ la.
N din nə maa gɛ̀fu kaka lɛa,
n nə ǹ dia mà ǹ da
dɔlɔ bɔ wɔ ganaa.
13N yii a sonborebaa á gole
sii baraa a ga ma-a ganaa.
N ba lɛ koe sii baraa ganaa wa.
Sɛnɛ, min mɛnɛn bɛ́ ǹ miãn siɛ̃,
ma nə n lɛ tiɛ̃ n tá giɛ bɛn ganaa.
Bɛ̀ min baraan tá basaã koe
min sonboren manɛ,
n ba boo diɛ wa.
14Á ke, ń minbuiin nɛ baa
ka zɔ̀ bɛ́ lɔn,
ka tɔɔ bisinin bɛ́ lɔn,
dɛnaa ná a ba ǹ la wa.
15Baabilonii minin man minin kuĩ
ka koɛ̀ɛ̃n nɛ
ka zɔ̀ bɛ́ lɔn.
Maǹ die ǹ nɛ zɔ̀ɔ nɛ,
ka kokoo ne,
a n foo kɔɔ̃n gole lɛa ǹ ganaa.
16Maǹ wúlu mànan koe
ǹ zɔ̀ɔn lɛn la,
maǹ màn giĩ kɔɔ̃n tiɛ̃
ǹ kokoon wɔ lɛa.
A giala, mà ǹ dinin barka nɛ
ǹ tá zɔ̀ gigiã kuĩ,
ǹ nə́ màn-bii kɔɔ̃n yii#1.16 Kɛ n sii a kɔnboe lɛa nyɛɛ mà Baabilonii minin man taasɛ mà ǹ gɔ̀lɔ̀baa lɛ n boe ǹ dìn li..
17Ǹsɛn man die goɛ̃
ǹ zɔ̀ɔ lɛ binyii miɛ̃ duduu?
Maǹ die goɛ̃ tɔrɔ kɔsɔn
kɛn dii miɛ̃ duduu
ǹ makara ná a boe ǹ ganaa wa?
Currently Selected:
Abakuku 1: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
