Amɔɔsi 4
4
Boo mɛn nə n da Samarii lɔn wɔ paǹ li
1Amɔɔsi tɔn pɛ:
Kasɛn Samarii lɔn kɛn, ka n too kɔ,
ka bɛ́ kasiɛ̃ nɛ
ka Basan kiwi a dii daanan
kɛn bɛ́ lɔn,
buu soɛ̃ a kelen la,
ka n mɛnɛɛ nɔmaa-wɔlen la.
Ka n boe doobaan yii ni,
ka n kɛ pii ka zuũn manɛ:
«Ka da nɛ wɔ mi».
2Bɛ lɛ nɛ, Dɛnaa Lawa nə́ n liɛ:
Bɛ̀ ma dinsɔɔ̃-n
Dɛnaa Lawa taãn lɛa sonbore,
á ke, lɛawaan tá re die,
ǹ tá re ka kuĩ, ka kan nɛ,
ǹ tá re kaa nɛnyaanan kuĩ,
ka kòɛɛ̃nɛn nɛ,
zɔ̀ wɔ baa nɛ.
3Ka á re soe ka kungɔn kɛa yalan nɛ,
didie á re giɛ a din a woo ǹ bǎã li,
ǹ tá re ka lui
ǹ wo ka nɛ Ɛrmɔn kele la.
Dɛnaa Lawa a da ǹ boo ne.
Izirayeli nə́ n piã ka daraa nɛ
4Amɔɔsi pɛ:
Ka da Betɛli ka piã ǹ siin lɛn zɛnaa,
ka da Gilgaali#4.4 Betɛli, laanka Gilgaali n wúlu bɔ ǹ bǎã dadaran lɛa.
ka màn da kaa piã ǹ siin lɛn li.
Bɛ̀ lɛ̀ waa lɔn,
ka kaa wúlun lɛn bɔbɔ,
a lɛawaa sɔɔbaa ǹ wɔ,
ka Lawa wɔ gii bɔ.
5Izirayeli minin lɛn,
ka kaa yɔ bù buurun#4.5 Yɔ bù: LWS 7.13, yɔ bù ba siĩn wúlu bɔ ǹ màn li wa. lɛn tã,
ka kaa Lawa gɔ ǹ mànan lɛn
boo da,
ka lɛn gole ne, a giala,
bɛ lɛ n kɔɔ̃n ka ganaa.
Dɛnaa Lawa a da ǹ boo ne.
6Ma din nə má toa bòo wɔ
kaa kiwin tumaa nɛ,
ma din nə má toa màn-bii wɛɛ̃ kɔ
kaa kionən tumaa nɛ.
Sɛnɛ a laan bɛ yii ni,
ka wusoo ka daa ma li wa.
Dɛnaa Lawa a da ǹ boo ne.
7Ma din nə má goã má ka nu
ka la nɛ,
bɛ̀ mui sɔɔ n kanaa,
kaa-piɛ dɔ.
Má la kaa kiwi goon ne,
má kiwi goon toa kooro.
La na á goã kiɛ wuru goon ne,
bɛ̀ lɛ̀ gere n wuru lɛ a kɔsɔ
kɛ gialaa.
8Minin man soe kiwi kɛ-a,
ǹ wo kɛ nɛ,
ǹ nə́ tatalɛ, ǹ nə́ giɛ mi ǹ mu li,
sɛnɛ, ǹ mu yɛ ǹ nə́ mi, á ǹ bɔ wa.
A laan bɛ yii ni,
ka wusoo ka daa ma li wa.
Dɛnaa Lawa a da ǹ boo ne.
9Ma din nə má gìa laanka
doloka kaa
kaa màn kɔsiɛn ganaa.
Bisinin nə́ kaa dù gɔ̀rɔ gɔ́ɔ̃
màn damata kɛ sɔ̃,
kaa *rezɛ̃ dan nɛ,
kaa gɔ́rɔ dan laanka
kaa *olivie dan nɛ.
Sɛnɛ, a laan bɛ yii ni,
ka n gɔ́ɔ̃ dɔn bii
ká wusoo ká daa ma li wa.
Dɛnaa Lawa a da ǹ boo ne.
10Má busu babaraa dia ka la,
ka busu kɛ bɛ́ lɔn ma dia Ezipti.
Má toa ǹ nə́ kaa nɛ tenən dɛ zia la,
ǹ nə́ kaa ziabaa ǹ sùin si ka la.
Kaa piɛ,
má toa geren kɛn gìĩ kaa ka nyin ni.
Sɛnɛ, a laan bɛ yii ni,
ka wusoo ká daa ma li wa.
Dɛnaa Lawa a da ǹ boo ne.
11 #
SGK 19.24. Má bɔ̀n da ka ganaa,
ká ma goã má da
Sodɔmu laanka Gomɔɔrɔ ganaa lɔn lɛlɛ.
Ka n ka tɛ gɔn lɛ bɛ́ lɔn,
ǹ nə́ bɔ ǹ nə́ bɔ tɛ-n.
Sɛnɛ, a laan bɛ yii ni,
ka n gɔ́ɔ̃ dɔn bii ká wusoo
ká daa ma li wa.
Dɛnaa Lawa a da ǹ boo ne.
12Bɛ lɛ na á toa,
Izirayeli minin lɛn,
ka sii mɛn zɛnaa,
man die a dɔlɔ boe ka ganaa.
A bɛ́ miɛ̃, Izirayeli minin lɛn,
ma din bɛ́ n kaa Lawa lɛa,
ka n yɔrɔ bɔ,
ka da n da kaa Lawa lɛ.
13Ga le, a din na á kelen zɛnaa,
a din nə piɛ̃ diɛ bɔ ganaa,
a din na a taasiɛ nyɛɛ
minbuiinin manɛ,
a din nə wɔlɔ fúlu bɔyɛɛ
a baa wɔlɔ tì lɛa,
a din nə tɔ we
kanaa a kele dadaran kɛn mìi ni kiɛ̃.
A tɔ mà Dɛnaa Lawa,
Lawa Pàãyiidɛnaa.
Currently Selected:
Amɔɔsi 4: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
