Amɔɔsi 5
5
Foo ziziɛ̃ loe Izirayeli wɔ paǹ li
1Amɔɔsi tɔn pɛ:
Izirayeli minin lɛn,
ka n too kɔ boo kɛ li,
ka n too kɔ gɛ̀ loe kɛ li,
ma á loe kaa wɔ paǹ li:
2Izirayeli minin lɛn nə́ kaa,
ǹ ba re yui doo wa.
Ǹ tá tán-a, min kɔn banban
a tá ǹ goɛ ǹ kiɛ lon wa.
3Dɛnaa Lawa na á kɛ pɛ
Izirayeli tɔrɔn wɔ paǹ li:
Bɛ̀ giĩ duu goon (1 000) soo kiwi
ǹ nə́ woo zia la,
min paabiɛ (100) nə n bɔyɛɛ.
Bɛ̀ giĩ paabiɛ soo kiwi
ǹ nə́ woo zia la,
min fù nə n bɔyɛɛ.
Yiikoonaabaa hinlaa gɛ̀
4Dɛnaa Lawa n kɛ pii
Izirayeli minin manɛ:
Bɛ̀ ka tá li ka yii goã koo,
yǎa ka giɛ masɛ Lawa li.
5Sɛnɛ, ka nyan ga ma li
Betɛli wa,
ka nyan wo ma guguru kɔ
Gilgaali wa,
ka nyan nə n gòã da
Bɛɛr-Sebaa dɔn wa.
A giala, ǹ tá re Gilgaali minin tumaa
goɛ ǹ wo ǹ ne bǎã kɔsɔ nɛ.
Lawa a kion ke, a tɔ n Betɛli,
bɛ á re kion kooro biɛ.
6Bɛ̀ ka tá li ka yii goã koo sɛn,
yǎa ka giɛ Dɛnaa Lawa li.
Zozɛfu tɔrɔn lɛn,
ka yiri bɔ ka dinin li,
a nyan yoo ka tɛ bɛ́ lɔn,
a kũ Betɛli wa.
A giala, min kɔn ba re yii
a nimi wa.
7Á ke, ká taãn-pɛ bɔyaa ká
baa kɔɔsɛ,
peperebaa ke, ká bɛ naa tán.
Lawa n kanaa mìi la
8 #
ZƆB 9.9; 38.31. A din na á leeren kɛn zɛnaa,
bɛ̀rɛ-sãlin laanka sɔ̀ nɛ.
A din nə tèlò bɔyɛɛ a baa
baayɛlɛ lɛa,
a baayɛlɛ bɔyaa a baa tèlò lɛa.
A n yìsi mu bíi bɛ̀ a sɔkɔn,
a tɔn bɛ kaa tán la.
A tɔ mà Dɛnaa Lawa.
9Min mɛn bɛ́ pàã nyɛɛ ǹ
miãn manɛ,
a din nə minin kiɛ bɛ ganaa
ǹ basaã kɔ nɛ.
Kiwi mɛn bɛ́ ǹ nə́ kungɔn dɔ
ǹ ná a lɛnpɛnɛ nɛ,
basaã n we bɛa kiwi lɛ nɛ.
10Min mɛn bɛa lɛ koe
mɛnaa mala-a wa,
bɛa dɛnaa tìĩ n boe ne ka nyin ni.
Bɛ̀ min mɛn tá taãn pii,
bɛa dɛnaa tìĩ n boe kasɛn nyin ni.
11Á ke, ka n mɛnɛɛ doobaan la,
bɛ̀ ǹ nə́ dí nya don ǹ nə́ màn
mɛn yɛ,
ka n bɛ kuĩ sii ǹ la ka pàã nɛ.
Bɛ lɛ na á toa,
ka kionən mɛnɛn dɔ
ka kɔlɔ sonboren ne,
ka á re giɛ̃ ǹ nɛ wa.
Ka *rezɛ̃ da tɔrɔ sonboren
mɛnɛn zumu,
ka a re ǹ duvɛ̃ mii wa.
12Ma á doɛ̃, kaa piã ǹ siin nə́ la yii ni,
kaa sii baraan tá mɔnaa nɛ.
Ka n mɛnɛɛ min peperen la.
Ka n lɛ pii ǹ mànan sii,
ka n nɔmaa-wɔlen sonbore bɔyɛɛ,
kiri wɔ ǹ bǎã nɛ.
13Bɛ lɛ n ke, min mɛn bɛ́ sii doɛ̃,
á soɛ, ǹ dɛnaa nə n lɛ tã.
A giala, biikoo lɛ baraa kɔ!
14Ka sii bǐɛ̃ zɛnaa, ka a baraa kaa,
màn mɛn bɛ́ toɛ ka yii tɔn goã koo.
Bɛ̀ ká zɛnaa miɛ̃,
pàã tumaa a Dɛnaa Lawa á re goɛ̃
kun ka nɛ,
ká ka bɛ́ nɛn bɛ̀ ka pɛ lɔn.
15Ka n piã ka sii baraa nɛ,
ka lɛ kɔ sii bǐɛ̃ ganaa.
Ka toa sonbore yɛ kiri wɔ ǹ bǎã nɛ.
Bɛ̀ ká zɛnaa miɛ̃,
kɔntan pàã tumaa a Dɛnaa Lawa
á re makara boe Zozɛfu tɔrɔ
gialakunun kɛn ganaa.
16Bɛ lɛ nɛ,
Dɛnaa Lawa Pàãyiidɛnaa lɛ n kɛ pii:
Zaman paã ǹ bǎã tumaa nɛ,
minin tá re gɛ̀ loe loe.
Kiɛ̃ ǹ ziin tumaa la,
minin tá re n lɛ didi:
Má sàabaa wooo, má sàabaa!
Ǹ tá re woe lɛ diɛ min la wuru-n,
mà a da gɛ̀ wuu pɛ.
Ǹ tá re woe gɛ̀ wuu-pɛlen bíi,
mà ǹ da loe lɔ gere la.
17Bɛ̀ má daa n dɔ ka bii
ǹ mɛn pinaa,
minin tá re gɛ̀ wuu pii,
rezɛ̃ wurun tumaa nɛ,
Dɛnaa Lawa na á pɛ miɛ̃.
Lawa a lɛawaa
18Kasɛn mɛnɛn la bɛ́ kakaɛ̃
Dɛnaa Lawa a lɛawaa
kɛa dɔ pinaa li,
kaa wɔ n ka bɔ̀n nɛ!
Dɛnaa Lawa a lɛawaa lɛ n die
wàa koe ka la?
Wɔlɔ tì biribiri ni,
wɔlɔ fúlu boo bie wa.
19A n die giĩ kɔn wɔ biɛ
baa sii yàra nyɛɛnɛ,
yǎa a wo n da
gòon màn gole kɔsɔ lɛ.
A n die giĩ kɔn wɔ biɛ,
á woo n dɔ a kion,
mà a nə n gɔn doɛ kigiala ganaa,
yǎa miɛ̃ sɔn dɔ a ganaa.
20Dɛnaa Lawa a lɛawaa kɛ lɛ,
ka á re n boe a nɛ?
A n die tèlò biɛ tì biribiri,
wɔlɔ fúlu boo bie wa.
Lawa nə n piã ka sii mɛn nɛ
21 #
IZA 1.11-14. Kaa zɔ́nɔn kɛn lɛn bɛ̀ ká n zɛnaa,
ma ba ǹ li wa, ǹ tìĩ bɔ ma nyin ni.
Kaa lɛ-sɔkɔnɔn kɛn bɛ̀ ka ǹ wɔ,
á ma gɔ̀nɔn bɔ.
22Ka bɛ́ wúlu mànan mɛnɛn tiɛ̃
lenlen maa wɔ lɛa,
ka bɛ́ ma goe ka mànan mɛnɛn nɛ,
ǹ kɔn ba kɔɔ̃n ma ganaa wa.
Ka bɛ́ tɔɔ kasiɛ̃n mɛnɛn koe ma la
barka da ǹ *wúlu màn lɛa,
ma din ba giɛ ǹ ganaa wa.
23Kaa loen lɛn tá sú kiɛ ma too ne,
ka n zɔ̃ ka n bɔ ma yɔrɔ-a
kaa tùtu wuun kɛn,
ma ba li ma ǹ ma doo wa.
24Sɛnɛ ka toa kiri kiɛ̃ a zii li
ka mu bɛ́ lɔn.
Ka toa kaa sii pepere zɛnaa goã
ka tà mu bɛ́ lɔn,
a ná a nyɛɛ wa.
25 #
NDS 7.42-43. Izirayeli tɔrɔn lɛn, ka bɛ́ ká goã diə gole lɛ nɛ, lɛ̀ pusi gɔ́ɔ nɛ, ká wúlu mànan kɔ masɛ la? Ká ma gɔ ka màn nɛ? 26Ka wo kaa kii ka kaa lawa Sukuti li,
kɔnlɛ ka kaa leere Kiyunu kɛ nɛ
kaa lawa lɛa,
ka dinin nə lawan lɛn mɛnɛn zɛnaa.
27Bɛ lɛ nɛ, ma bɛ́ re woe ka nɛ
bɛ̀rɛbaa ǹ bǎã mɛn nɛ,
ka á re Damaasi kiwi kɛ niɛ̃.
Dɛnaa Lawa n bɛ lɛ pii.
A tɔ mà Lawa Pàãyiidɛnaa.
Currently Selected:
Amɔɔsi 5: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
