Génesis 40

Ishkay presokunapa sueñokusqankumanta

1Chaykunaq pasasqanpa qepantan Egipto *nacionpa *reyninpa contranpi ishkay jefekuna huchallikuranku. Chay jefekunamanta hukninmi karan reyman copata haywaq runakunapa jefen; hukninñataqmi karan t'anta ruwaq runakunapa jefen. 2Chay ishkaynin serviqnin jefekunapaqmi rey Faraonqa anchata phiñakuran. 3Hinaqtinmi paykunataqa presota apachiran, presokunata cuidaq guardiakunapa capitanninpa wasinman. Chay carcellapitaqmi Joseypas preso kasharan. 4Hinaspan presokunata cuidaq guardiakunapa capitanninqa Joseyman chay presokunata encargaran, paykunata atiendenanpaq. Saynapin chay ishkay jefekunaqa preso karanku huk tiempo.

5Hinaqtinmi reyman copata haywaq runakunapa jefenqa hinallataq t'anta ruwaq runakunapa jefenpas, huk tuta sueñokuranku. Chay sueñoyninkuqa sapankamapaqmi huk yachachikuy karan. 6Paqarisnintin tutallamantan Joseyqa paykunapa kasqanman hamuran. Hinaspan llakisqa kasqankuta rikuran. 7Hinaqtinmi Joseyqa rey Faraonpa serviqnin presomasin runakunata khaynata tapuran:

—¿Imanaqtintaq qankunari llakisqallaña kashankichís? nispa.

8Paykunataqmi contestaranku khaynata:

—Noqaykuqa sapankamaykun sueñorukuyku. Ichaqa manan ni pipas kanchu, ima ninantas nin chay sueñokusqayku chayta niwanankupaqqa, nispa.

Chaymi Joseyqa paykunata niran:

—Willawaychis chay sueñokusqaykichista; Diosllan noqantakama willasunkichis, ima ninantas nin chay sueñokusqaykichis chaytaqa, nispa.

9Chaymi rey Faraonman copata haywaq runakunapa jefenqa Joseyman willaran sueñoyninta:

—Noqan sueñoyniypi rikurani ñawpaqniypi huk uvas plantata. 10Chay uvas plantapitaqmi kinsa ramakuna kasqa. Chay ramakunan t'ikarimuspa rururan. Hinaspan chay uvas ruruqa poqorpasqa. 11Hinaqtinmi noqaqa rey Faraonpa copanta makiypi hap'ishasqani. Hinaspan chay uvaskunata pallaspa q'apishasqani. Chay jugontataqmi rey Faraonman copanpi haywashasqani, nispa.

12Chaymi Joseyqa niran:

—Chay sueñokusqaykiqa kay ninantan nin: Kinsa ramakunaqa kinsa p'unchawmi. 13Kinsa p'unchawmantan rey Faraonqa kay carcelmanta orqochisunki. Hinaspan ñawpaq puestoykiman churasunki. Chaymi kaqmanta haywanki copanta rey Faraonman, imaynan ñawpaqtapas ruwaranki chay hinata. 14Saynaqa, kay pasaqtinqa amayá noqamantaqa qonqarunkichu. Aswanyá ama hina kaspayki noqamanta rey Faraonman willaykapuwanki, kay carcelmanta orqowananpaq. 15Noqataqa *hebreo runakunapa allpanmantan suwakuq runata hina mana munashaqta apamuwaranku. Saynallataqmi mana imamanta kay carcelmanqa churaykuwan, nispa.

16Joseyqa copa haywaq runakunapa jefenpa sueñokusqantaqa favorninpin willaran. Chayta rikuspan, t'anta ruwaq runakunapa jefenpas Joseyman sueñokusqanta willakullarantaq khaynata:

—Noqapa sueñoyniypiqa kinsa canastakunapin yuraq t'antakuna umay patapi kashasqa. 17Chay canastakunapa hawanpi kaq canastapin, rey Faraonpa mikhunanpaq tukuy clase pastelkuna kashasqa. Hinaqtinmi chay umay patapi kaq canastamanta alton phawaq animalkuna mikhushasqaku, nispa.

18Saynata chay sueñonninta willaqtinmi, Joseyqa niran:

—Chay sueñoyniykiqa kay ninantan nin: Kinsa canastakunaqa kinsa p'unchawmi. 19Kinsa p'unchawmantan rey Faraonqa kay carcelmanta orqochisunki. Hinaspan kunkaykita kuchuchispa, cuerpoykitapas huk sach'api warkuchinqa. Chaymi aychaykitaqa alton phawaq animalkuna mikhunqaku, nispa.

20Kinsa p'unchawmantan rey Faraonpa cumpleañon karan. Chaymi rey Faraonqa llapallan payta serviq runakunapaq huk fiestata ruwaran. Hinaspan carcelmanta orqochimuspa, paykunapa ñawpaqninman pusachimuran payman copata haywaqkunapa jefenta hinallataq t'antata ruwaqkunapa jefentawan ima. 21Hinaspan copa haywaqkunapa jefentaqa kaq puestollanman churaran. Chaymi chay jefeqa kaqmanta rey Faraonman copanta haywaran. 22Ichaqa t'anta ruwaqkunapa jefentañataqmi, Joseypa nisqanman hina huk sach'api seq'ochiran. 23Ichaqa rey Faraonman copan haywaqkunapa jefenqa manan yuyaranchu Joseymantaqa; aswanmi paymantaqa qonqaran.

Currently Selected:

Génesis 40: QEAÑT

Highlight

Copy