Génesis 39

Joseymanta Potifarpa warminmantawan

1Ismaelita runakunan Joseytaqa Egipto *nacionman aparanku. Chaypin paytaqa venderanku Egipto nacionniyoq Potifar sutiyoq runaman, *esclavon kananpaq. Chay Potifarqa karan Egipto nacionpi rey Faraonpa ejercitonpi kaq soldadokunapa capitanninmi. 2Ichaqa Señor Diosmi Joseywanqa kasharan. Chayraykun patronninpa wasinpi kashaqtin, ima ruwasqankunapas allinpuni lloqsiran. 3Chayraykun Joseypa patronninqa cuentata qorukuran, Señor Diosqa paywan kasqanta hinallataq tukuy imapi yanapasqantawan ima. 4Hinaqtinmi Joseyqa Potifarpa confianzanta ganakuyta qallariran. Chaymi Joseytaqa churaran mayordomon kananpaq. Hinaspan wasinpi llapallan kapuqninta cuidananpaq entregaran. 5Egipto nacionniyoq Potifarqa ancha bendecisqan karan, Joseyta wasinpi mayordomon kananpaq churasqanmantapacha. Hinaspapas Señor Diosmi tukuy imapi Potifartaqa bendeciran, wasinpipas hinallataq campopipas. 6Chayraykun Potifarqa llapallan kapuqninkunata Joseyman encargaran, pay cuidananpaq. Hinaspan Potifarqa manaña ni imamantapas preocupakuranñachu; aswanmi payqa mikhuyllapiña piensaran.

Joseyqa allin simpático hinallataq sumaq jovenmi karan. 7Hinaqtinmi tiempo pasasqanman hina, patronninpa warmin Joseyta munapayaspa qawapayaran. Hinaspan khaynata niran:

—Noqawan puñuy, nispa.

8Ichaqa Joseyqa manan munaranchu imatapas yachayta chaykunamantaqa. Aswanmi payqa contestaran khaynata:

—Señora, patronniyqa noqapi confiasqanraykun, wasinpi ima kaqkunatapas noqaman dejaykuwan. Chaymi payqa manaña ni imamantapas preocupakunñachu. 9Hinaspapas manan kay wasipiqa kanchu noqamanta aswan más importante kaq runaqa. Chayraykun patronniyqa tukuy imaymananta noqaman encargawaran. Aswanqa qanllatañan mana encargawaranchu, warmin kasqaykirayku. Chayri, ¿imaynataq noqari kay mana allinkunatari ruwayman; hinaspa Diospa contranpi huchallikuymanrí? nispa.

10Ichaqa Potifarpa warminqa sapa p'unchawmi Joseytaqa rimapayaran paywan puñunanpaq hinallataq ladonpi compañananpaq ima. Ichaqa Joseyqa manapunin ni imaraykupas munaranchu, chay warmiwan puñuytaqa.

11Joseyqa huk p'unchawmi wasiman haykuran, imapas ruwanankunata ruwananpaq. Ichaqa manan ni pipas wasipiqa karanchu. 12Hinaqtinmi Joseytaqa Potifarpa warminqa p'achanmanta hap'iruspa, ruegapayaran khaynata:

—Noqawan puñuy, nispa.

Hinaqtinmi Joseyqa p'achanta chay warmipa makinpi dejarpaspa, p'itayllaña lloqsiran. 13Chaymi chay warmiqa Joseypa p'achanta makinpi hap'ispa hinallataq Joseypa ishkapakusqantawan rikuspa, 14altota qapariran. Hinaspan sirvientekunata waqyaspa paykunata khaynata niran:

—Qawariychis, qosaypa pusamusqan chay *hebreo runan noqanchismanta burlakuwashanchis. Paymi kay wasiyman haykumuspa, noqawan puñuyta munaran. Ichaqa noqaqa tukuy kallpaywanmi qaparirani. 15Chaymi qaparispa waqyakuqtiy, p'achantapas ladoypi saqerpatamuspa, p'itayllaña lloqsirpatamun, nispa.

16Hinaspan chay warmiqa Joseypa p'achanta waqaycharan, qosan Potifar wasiman chayamunankama. 17Chayaramuqtintaqmi willaran, imaynan sirvientenkunamanpas willaran saynallatataq, khaynata nispa:

—Chay apamusqayki esclavo hebreo runan cuartoyman haykumuspa, noqata abusawayta munan. 18Ichaqa tukuy kallpaywan qaparispa waqyakuqtiymi, payqa p'itayllaña lloqsirpatamun. Hinaspan p'achantapas ladoypi saqerpatamun, nispa.

19Hinaqtinmi Joseypa patronnin Potifarqa, warminpa willasqanta uyarispa, anchata phiñakuran. 20Chaymi Joseyta hap'ichispa carcelman churachimuran. Chaypin Joseyqa reypa presonkunawan kushka unay tiempo qepakuran. 21Ichaqa José carcelpi kashaqtinpas, Señor Diosmi paywan kasharan. Chaymi paytaqa Señor Dios khuyapayaspa yanaparan. Saynapin Joseyqa carcelta cuidaq jefepa confianzanta ganakuran. 22Chaymi chay jefeqa Joseyta llapallan presokunata carcelpi kamachinanpaq churaran. Chayraykun Joseyqa carcelpi kaqkunata cuidaran hinallataq jefepa ima ruwanankunatapas ruwaran. 23Chay ruwasqankunapiqa Señor Diosmi Joseywan kasharan. Chaymi Joseypa ima ruwasqankunapas allinpuni karan. Chayraykun chay jefeqa manaña preocupakuranñachu ima qawaytapas, Joseymanña dejasqa kasqanrayku.

Currently Selected:

Génesis 39: QEAÑT

Highlight

Copy