Génesis 35

Jacobta Dios bendecisqanmanta

1Diosmi Jacobta niran:

—Noqaqa wawqeyki Esaumanta ishkapakamushaqtiyki qanman rikhuriykuq Diosmi kani. Sayarispa ripuy Betel lugarman, chaypi tiyanaykipaq. Hinaspa noqata yupaychawanaykipaq chay lugarpi huk *altarta ruway, nispa.

2Chaymantan Jacobqa familiankunata hinallataq llapallan paywan kushka tiyaq runakunatawan khaynata niran:

—Llapallan hap'isqaykichis idolokunata orqomuychis. Hinaspa ch'uyanchakuychis; Saynallataqyá p'achaykichistapas cambiakuychis. 3Hinaspa hakuchi Betelman. Chay lugarpin noqaqa Diospaq huk altarta ruwasaq. Diosqa llakisqa purishaqtiymi yanapawaran. Hinaspapas maypiña chaypiña purishaqtiypas, Diosqa noqawan kushkan karan, nispa.

4Hinaspan paykunaqa tukuy clase llapallan idolokuna hap'isqankuta Jacobman entregaranku. Hinaspapas entregallarankutaqmi, ninrinkupi churakusqanku aretekunatapas. Chaymi Jacobqa llapallan chay entregasqankuta encina nisqa sach'apa sikinpi p'amparan. Chay sach'aqa karan Siquem nisqa lugarpin. 5Chaymantan Jacobqa llapallan familiantin chay lugarmanta lloqsiran. Ichaqa chay muyuriqnin llaqtakunapi tiyaq runakunaqa manan Jacobpa familiantaqa qatirankuchu, sonqonkupi Señor Dios ancha manchakuyta churasqanrayku.

6Hinaqtinmi Jacobqa paywan kushka riq llapallan runakunapiwan, Canaán nación ukhupi kaq Luz sutiyoq llaqtaman chayaranku. Chay Luz llaqtapa huknin sutinmi Betel. 7Chay lugarpin Jacobqa huk altarta ruwaran. Hinaspan chay lugarpa sutinta churaran “El-Betel” sutiwan, chay lugarpi wawqen Esaumanta ishkapakushaqtin Dios rikhurisqanrayku. [Nota: Hebreo rimaypiqa “El-Betel” sutiqa “Betel llaqtapa Diosnin” ninantan nin.] 8Chay lugarpin Rebecata uywaq Débora sutiyoq warmi wañukapuran. Chaymi p'ampasqa karan Betel lugarpa cercanpi kaq *encina nisqa sach'apa sikinpi. Chayraykun Jacobqa chay lugarta suticharan Waqana Encina sach'awan.

9Saynallataqmi Señor Diosqa kaqmanta Jacobman rikhuriran Padan-aram lawmanta kutimushaqtin. Hinaspan yuyarichiran khayna 10bendecisqanta:

—Qanpa sutiykiqa Jacobmi. Ichaqa kunanmantaqa manañan Jacobñachu sutiykiqa kanqa. Aswanqa Israelñan sutiykiqa kanqa, nispa.

Saynatan Señor Diosqa Jacobpa sutinta cambiaran Israel sutiwan. 11Saynallataqmi Diosqa nillarantaq:

—Noqan Tukuy Atiyniyoq Señor Diosqa kani. Ashka wawayoq kay; hinaspa ashkaman miraychis. Qanpa mirayniykimantaqa ashka nacionkunan hinallataq ashka llaqtakunan paqarinqaku. Saynallataqmi qanpa mirayniykikunamantaqa ashka *reykuna paqarimunqaku. 12Abrahamman hinallataq Isaacman qosqay allpatan qanmanpas qosqayki. Saynallataqmi kay allpataqa qollasaqtaq mirayniykikunamanpas, nispa.

13Chaymantan Diosqa Jacobwan parlaruspa, chay lugarmanta ripuran. 14Hinaqtinmi Jacobqa huk rumita sayachiran, huk señal kananpaq, chay lugarpi Dios rimapayasqanrayku. Hinaspan chay rumiman aceiteta, vinotawan hich'aykuran. 15Hinaspan Jacobqa chay lugarpa sutinta churaran Betelwan, chay lugarpi Dios payta rimapayasqanrayku.

Raquelpa wañukapusqanmanta

16Chaymantan paykunaqa chay Betel lugarmanta ripuranku. Ichaqa Efrata llaqtaman manaraq chayashaqtinkun, Raquelqa huk wawata onqokuspa nishuta ñak'ariran. 17Saynata Raquel onqokuspa nanaywan nishuta ñak'arishaqtinmi, Raquelta atiendeq parteraqa khaynata niran:

—Ama manchakuychu. Kay onqokusqayki wawapas qarillataqmi kasqa, nispa.

18Ichaqa Raquelqa onqorukuspanmi, nanaywan anchata ñak'arispa, yaqaña wañurusharan. Hinaspan chay wawanman sutinta churaran Benoni sutiwan. Chaymantan Raquelqa wañukapuran. Ichaqa papanñataqmi chay wawanpa sutintaqa cambiaran Benjamín sutiwan. [Nota: Hebreo rimaypiqa “Benoni” sutiqa “llakichikuq wawa” ninantan nin. Ichaqa “Benjamín” sutiqa “phaña makiymi” ninantan nin.] 19Saynatan Raquelqa wañukapuran. Hinaspan p'ampasqa karan Efrata llaqtaman rinanku ñan patapi. Chay llaqtapa huknin sutinqa Belén llaqtan. 20Hinaqtinmi Jacobqa Raquelta p'ampasqanku sepultura hawapi huk rumita sayachiran. Chay rumiwanmi Raquelpa sepulturanqa señalasqa kashan asta kunankamapas.

21Chaymantan Israelqa viajenta seguiran. Hinaspan campamentonta armaran Migdal-edar nisqa torrepa waq lawninpi. 22Chay lugarpi Israel tiyashaqtinmi, wawan Rubén papanpa tiyasqan Bilha sutiyoq warmiwan puñuran. Chayta Israel yacharuspanmi nishuta phiñakuran. [Nota: “Israel” sutiqa, Jacobpa mosoq kaq sutinmi.]

Jacobpa wawankunamanta

(1 Cr 2.1-2)

Jacobpa wawankunaqa chunka ishkayniyoqmi karan. 23Lea sutiyoq warminpin kaykuna karanku: kurak kaq Rubén, payman qatiqkunataq Simeón, Leví, Judá, Isacar hinallataq Zabulón ima. 24Raquel warminpitaqmi kaykuna karanku: José hinallataq Benjamín ima. 25Raquelpa sirvientan Bilha warmipitaqmi kaykuna karanku: Dan hinallataq Neftalí ima. 26Leapa sirvientan Zilpa warmipitaqmi kaykuna karanku: Gad hinallataq Aser ima. Jacobpa chay wawankunan Padan-aram allpapi naceranku.

Isaacpa wañukapusqanmanta

27Chaymantan Jacobqa kutiran papan Isaacpa tiyasqan Mamre llaqtaman. Chay Mamre llaqtaqa karan Quiriat Arbá llaqtapa cercanpin. Chay Quiriat Arbá llaqtataqa reqsillarankutaqmi Hebrón sutiwanpas. Chay lugarpin Abrahamqa hinallataq Isaacpas ñawpaqtaqa tiyaranku. 28Isaacqa 180 watankaman kawsaran. 29Hinaspan Isaacqa anciano kayninpiña hawkayaypi wañukapuran. Chaymi paytaqa ñawpaq abuelonkunapa kasqanpi p'ampapuranku. Hinaqtinmi Isaactaqa ishkaynin wawankuna Esauwan hinallataq Jacobpiwan p'amparanku.

Currently Selected:

Génesis 35: QEAÑT

Highlight

Copy