Génesis 33

Jacob wawqen Esauwan tupasqanmanta

1Jacobmi qawarispa, Esauta rikuran, 400 runakunapiwan hamushaqta. Hinaqtinmi Jacobqa wawankunata rakiran Leaman, Raquelman hinallataq ishkaynin sirvientan warmikunamanwan ima. 2Hinaspan primer kaq puntapi churaran ishkaynin sirvientan warmikunata wawakunantinta. Chaypa qepanmantaqmi churaran Leata wawakunantinta, último qepapitaq Raquelta wawan Joseytawan. 3Ichaqa Jacobñataqmi llapankupa ñawpaqninman pasaspa, ñawpaqninkuta riran. Hinaspan pampakama k'umuykuspa-k'umuykuspa riran, asta wawqen Esauman ashuykunankama. Jacobqa wawqen Esauman ashuykunankamaqa qanchis kutitan pampakamaqa k'umuykuran. 4Ichaqa Esauñataqmi wawqen Jacobman p'itayllaña hamuran. Hinaspan Jacobta abrazaykuspa uyanpi much'ayuran. Chaypin paykunaqa ishkayninku kusikuymanta waqakuranku. 5Chaymantan Esauqa rikuran Jacobpa warminkunata hinallataq wawankunatawan ima. Chaymi khaynata tapuran:

—¿Pikunataq paykunarí? nispa.

Jacobtaqmi contestaran:

—Paykunaqa wawaykunan. Diosmi ancha khuyakuq kaspa paykunataqa noqa serviqniykiman qoykuwaran, nispa.

6Hinaqtinmi Jacobpa sirvientan warmikunaqa, wawakunantin ima, Esauman ashuyuspa ñawpaqninpi k'umuykuranku. 7Chaymantan Leapas wawakunantin ashuyullarankutaq. Hinaspan paykunapas Esaupa ñawpaqninpi k'umuykullarankutaq. Saynallataqmi Joseypas hinallataq mamitan Raquelpas ashuyullarankutaq. Hinaspan Esaupa ñawpaqninpi paykunapas k'umuykullarankutaq. 8Hinaqtinmi Esauqa khaynata tapuran:

—¿Imatataq qanri ruwayta munanki, hamusqay ñanpi tupamusqay grupo-grupo animalkunawanrí? nispa.

Hinaqtinmi Jacobqa contestaran:

—Señorlláy, qanmanmi chay animalkunataqa qoyki, saynapi qanpa favorniykita merecenaypaq, nispa.

9Chaymi Esauqa niran:

—Wawqelláy, noqapaqa ashkan tukuy imaypas kapuwashan. Qanpa kapusuqniykikunaqa qanpaqyá kachun, nispa.

10Ichaqa Jacobñataqmi yapa-yapamanta niran:

—Amayá. Noqaqa qantan ruegakuyki. Sichus qanpa favorniykita mereceni chayqa, chashkiykuwayyá kay regalo qosqayta. Noqaqa sumaqta chashkiykuwasqaykiraykun, Diospa uyantatapas rikushayman hinan, qanpa uyaykitaqa rikushani. 11Noqaqa ruegakuykin kay regalo apamusqayta chashkiykuwanaykipaq. Diosmi tukuy ima kapuwaqniykunatapas qowaran. Chaymi tukuy ima kaypi kaqkunaqa noqapa, nispa.

Saynata yapa-yapamanta niqtinmi, Esauqa aceptaran Jacobpa regalonta. 12Chaymantan Esauqa niran:

—Hakuchi kaymanta. Noqaqa ñawpaqniykitan risaq, nispa.

13Chaymi Jacobqa niran:

—Señorlláy, rikusqaykiman hinan wawaykunaqa nishu wawallaraq kashanku. Saynallataqmi ovejaykunapas, wakaykunapas qolla uñayoqkama kashanku. Sichus nishuta purichispa pisiparachisun chayqa, huk p'unchawllapichá llapallan animalkuna wañurunkuman. 14Señorlláy, aswanyá qan ñawparuy. Noqañataq wawakunapa hinallataq animalkunapa purisqanman hinalla, allillamanta hamusaq, asta qanpa tiyasqayki Seir sutiyoq lugarman chayamunaykama, nispa.

15Chaymi Esauqa niran:

—Saynaqa noqawan hamuq runaykunamantayá wakinta saqesqayki yanapasunaykipaq, nispa.

Ichaqa Jacobñataqmi niran:

—Señorlláy, amañayá noqamantaqa preocupakuychu. Noqaqa ñan kusisqaña kashani sumaqta chashkiykuwasqaykiwan, nispa.

16Hinaqtinmi Esauqa chay p'unchaw kutipuran, tiyasqan Seir sutiyoq lugarman. 17Ichaqa Jacobñataqmi Sucot sutiyoq lugarman riran. Hinaspan chaypi tiyananpaq wasita ruwakuran. Hinallataqmi animalninkuna llantukunanpaqpas ramadakunata ruwaran. Chayraykun chay lugarpa sutinta churaran Sucot sutiwan.

18Jacobqa ñawpaqtaqa Padan-aram lawpin suegron Labanwan tiyaran. Chaymantan Jacobqa Canaán nación ukhupi *Siquem nisqa llaqtaman sanolla hinallataq allinlla chayamuran. Hinaspan chay Siquem llaqtapa chimpanpi carpanta armaspa samaran. 19Chaymantan Jacobqa samasqan allpata rantiran Hamor sutiyoq runapa wawankunamanta 100 qolqewan. Chay Hamor sutiyoq runaqa Siquem sutiyoq runapa papanmi karan. Hinaspan Jacobqa chay rantisqan allpapi carpankunata armaran. 20Hinaspapas Jacobqa ruwallarantaqmi huk altartapas. Hinaspan chay ruwasqan altarpa sutinta churaran “El-Elohe-Israel” sutiwan. [Nota: Hebreo rimaypiqa “El-Elohe-Israel” sutiqa “Diosmi Israel runakunapa Diosnin” ninantan nin.]

Currently Selected:

Génesis 33: QEAÑT

Highlight

Copy