Proverb 9
9
Lasazes lans enn linvitasion
1Lasazes finn konstrir so lakaz;
li finn met set kolonn tini li.
2Li finn prepar laviann ek divin;
li finn dres so latab pou festin.
3Li finn avoy so bann servant
kriye dan bann plas piblik:
4“Zot ki ignoran, vinn par isi!
Zot ki ti-lespri, lasazes pe dir zot:
5Vini, vini! Vinn manz mo dipin;
vinn bwar divin ki mo finn prepare.
6Aret fer kouma ignoran, e zot pou viv lontan;
mars lor sime disernman!”
Diferans ant enn insolan ek enn saz
7Kan to koriz enn insolan, to gagn maltrete;
kan to kritik enn move dimoun, to gagn insilte.
8Pa kritik enn insolan; li pou deteste twa.
Me si to pas enn remark enn saz, li pou kontan twa.
9Konsey enn saz, e li pou vinn pli saz;
ansegn enn dimoun drwat, e li pou vinn pli intelizan.
10Rekonet lotorite LESEGNER, samem komansman lasazes#9:10 Konpar proverb 1:7. ;
si to konn Sa Enn ki sin-la, to deza ena bon zizman.
11Wi! Mwa, lasazes ki pe dir sa! Ar mwa, to pou viv pli lontan;
to lavi pou vinn pli long par boukou lane.
12Si to saz, twa ki pou gagn lavantaz;
me si to viv dan linsolans, to pou bizin pey konsekans.
Enn linvitasion danzere
13Stipidite, li kouma enn fam ki fer tapaz dan vid;
li enn ignoran ek li pa konpran.
14Li nek kas poz divan lakaz,
oubien kot bazar lor baz.
15Li vey lokazion
pou apel bann pasan ki dan zot lokipasion.
16Li dir ar bann ignoran: “Vinn fer enn letour kot mwa!”
Li dir ar bann ti-lespri:
17“Dilo ki pa pou twa, so gou pli dou;
Manze ki to manz an-sekre gagn pli bon gou.”
18Me so bann viktim pa kone ki laba, kot li, ena lamor ki pe fer letour;
bann ki finn rant kot li avan, zot deza dan lemond bann mor.
Currently Selected:
Proverb 9: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
