Proverb 10
10
Bann proverb Salomon lor lavi moral
1Bann zanfan saz fer leker zot paran kontan;
zanfan bet fer leker zot paran fermal.
2Rises mal-gagne fer lavi amer;
me enn lavi onet tir twa dan piez lamor.
3 LESEGNER pa pou les bon dimoun mordefin;
me li pou anpes bann malfeter akonpli zot move dezir.
4Lame enn dimoun pares amenn lamizer;
me lame enn bon travayer amenn larises.
5Li enn loner pou dimoun ki rekolte dan bon sezon;
me li enn laont pou dimoun ki dormi dan sezon rekolt.
6Benediksion pou lor latet bann bon dimoun;
me laviolans sort dan labous bann leker sal.
7Souvenir enn bon dimoun rann nou ere.
Me kan enn malfeter mor, bien vit nou bliye so nom.
8Dimoun saz ek rezonab ekout bon konsey;
me enn bet ki koz ninport fini dan presipis.
9Dimoun onet viv an-sekirite;
me bann malonet zwenn tase.
10Dimoun ki pez lizie pou anbet lezot, amenn problem;
bann ki pa per pou korize, amenn lape.
11Parol bon dimoun kouma enn lasours ki donn lavi;
me parol enn malfeter kasiet boukou violans.
12Laenn alim dife;
lamour pardonn erer.
13Bann dimoun intelizan pronons bann bon parol;
me bann ki koz ninport merit enn pinision.
14Dimoun ki saz gard konesans kouma enn trezor;
me kan ti-lespri koze, larwinn zame lwin.
15Dibien enn ris protez li kouma enn fortres;
lamizer enn pov ronz li kouma karya.
16Lapey enn dimoun onet amenn nouvo lavi;
lapey enn dimoun malonet servi pou fer pese.
17Seki ekoute kan koriz li, li progrese lor sime lavi;
seki zame aksepte so erer, li perdi so sime.
18Seki kasiet laenn dan so leker, li enn manter;
e seki fann fos rimer, li enn palabrer.
19Plis to koz boukou, plis to ena risk fer pese;
enn saz konn kontrol so lalang.
20Parol enn bon dimoun, li kouma metal presie;
lespri dimoun malsin, li kouma enn drom vid.
21Parol bann zis, nouri boukou dimoun;
me bann bet mor par zot prop betiz.
22Benediksion LESEGNER amenn larises;
me pa latristes#10:22 Me pa latristes: Ena tradiksion dir: “Zis travay dir pa fer twa vinn pli ris.” .
23Dimoun ti-lespri gagn plezir dan pratik lemal;
dimoun ki ena rezonnman gagn plezir dan pratik lasazes.
24Dimoun drwat gagn seki zot dezire;
move dimoun gagn seki zot plis per.
25Tanpet vini, move dimoun anvole;
me bon dimoun touletan reziste.
26Dimoun pares minn zot anplwayer,
parey kouma lafime bril lizie, e vineg fer ledan grinse.
27Dimoun ki respekte LESEGNER pou viv pli lontan;
me bann malfeter pou mor avan ler.
28Lespwar bon dimoun donn zot lazwa;
move dimoun pena lavenir ditou.
29 LESEGNER protez bann bon dimoun ar pwisans;
me li detrir bann dimoun ki fer lemal.
30Dimoun drwat pou viv an-sekirite;
dimoun traver pou zwenn tase.
31Bann dimoun drwat koz langaz lasazes;
me bann ki ena lalang manter pou gagn pinision.
32Parol bann bon dimoun fer plezir;
mansonz bann move dimoun fer soufer.
Currently Selected:
Proverb 10: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
