Proverb 5
5
Avertisman kont linfidelite
1Mo zanfan, pran kont mo bann parol sazes;
ouver zorey pou ekout mo bann konsey.
2Koumsa, to pou gagn disernman;
e bann bon parol pou sorti dan to labous.
3Fer atansion! Enn fam adilter, dan so labous, koumadir ena dimiel;
so koze pli dou ki siro.
4Me alafin, li vinn amer kouma mazanbron#5:4 Mazanbron: Enn plant ki bien amer.;
li fite kouma kouto mousana#5:4 Kouto mousana: Enn kouto ki koup de kote. .
5Si to swiv li, li pou trenn twa dan lamor;
so sime desann direk dan lafos.
6Li pa finn swazir sime lavi;
li pa mem kone ki li dan sime perdision.
7Asterla, mo piti, ekout mwa;
pa rezet mo konsey.
8Pa koste ar fam move lavi;
pa les laport so lakaz tant twa.
9Sinon, to pou perdi to repitasion;
e bann dimoun san-pitie pou tir to lavi.
10Lerla, bann etranze ki pou profit to rises;
lezot ki pou zwir dibien ki to finn ramase ar to laswer.
11Finalman, kan maladi pou devor to lekor;
kan to trouv to lavi pe ale, to pou plengne.
12Lerla, to pou dir: “Kifer mo finn vir ledo ar bann avertisman?
Kifer mo pa finn pran kont bann repros?
13Mo finn ignor parol mo bann edikater;
mo finn rezet bann instriksion mo profeser.
14Asterla, mo dan bor presipis;
mo loner finn rwine dan lasosiete.”
Fidelite ek lamour pou so fam
15Dan to lakaz, to fam kouma enn lasours dilo kler ki prop. Pa al bwar andeor!
Kot tomem ena enn basin dilo fre; rafresi twa.
16Pa kit to semans dan tou kwin lari;
oubien dan bann plas piblik.
17Rezerv to plezir zis pou to fam;
pa partaz li avek bann etranze.
18To fam marye, li kouma enn lasours beni;
zwir lavi ek trouv to lazwa ar li.
19To fam ena enn bon leker,
li enn bote;
ki so lekor atir twa,
ki so lamour rann twa fou.
20Napa rod plezir ar bann fam move lavi;
pa les twa atire ar lekor enn fam ki tronp so mari.
21Pa bliye, LESEGNER trouv tou seki bann imin fer;
li okouran tou zot bann aksion.
22Bann malfeter may dan latrap zot prop erer;
zot tas dan file zot prop pese.
23Zot pou perdi lavi parski zot mank disiplinn;
zot pou al dan perdision parski zot foli tro gran.
Currently Selected:
Proverb 5: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
