Proverb 2
2
1Mo zanfan, pran kont mo parol;
gard mo bann instriksion kouma enn trezor.
2Ouver to zorey ekout lasazes,
e grav so mesaz dan to leker.
3Wi, kontign sipliye pou to gagn disernman,
pa aret insiste pou to gagn konpreansion.
4Mo zanfan, rod lasazes kouma larzan,
resers li kouma enn trezor.
5Lerla, to pou konn respekte LESEGNER
e vremem, to ava konn Bondie.
6Parski LESEGNER, limem lasours lasazes,
so parol donn konesans ek disernman.
7Li enn gran proteksion pou dimoun drwat;
li enn boukliye pou dimoun onet.
8Li vey sime bann ki fer lazistis,
li protez larout so bann fidel.
9Si to pran kont tousala, lerla, to pou konn ladrwatir ek lazistis,
to pou konpran lonette ek bon manier viv.
10Alor, lasazes pou ranpli to leker,
konesans pou ranpli to lespri ar lazwa.
11Lerla, to bon rezonnman pou gid twa,
to disernman pou protez twa.
12Li pou anpes twa mars lor sime lemal,
li pou prezerv twa kont bann manter,
13kont bann ki abandonn sime lazistis,
e ki mars dan sime marenwar.
14Zot gagn plezir dan fer pese,
ek lazwa dan fer lemal;
15Zot finn swazir sime traver,
e zot konportman pa drwat.
16Me twa, pa les twa rant dan siro bann move fam,
bann fam move lavi ki anbobinn bon dimoun ar zot parol dou.
17Zot abandonn zot mari marye,
e zot pa respekte serman sakre zot maryaz.
18Si to swiv sime so lakaz, to pou al trouv lamor;
Si to mars lor so larout, to pou al dan marenwar.
19Seki al kot li, zot gagn sime rantre, me pena sime sorti;
zot pa pou kapav retourn dan sime lavi.
20Alor, swiv sime bon dimoun,
e imit bann ki pratik lazistis.
21Zis bann dimoun drwat ki pou viv dan nou pei;
zis bann dimoun ki lame prop#2:21 “Lame prop” vedir bann dimoun ki “san repros”. , ki pou res isi.
22Bann malfeter pou bizin lev pake ale;
Bann tret pou bizin demenaze.
Currently Selected:
Proverb 2: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
