Proverb 19
19
1Preferab pov, me onet;
ki manter e bet.
2Kan pa pran letan reflesi avan azir, li danzere;
kan tro prese, kapav zwenn kogne.
3Ena ki detrir zot lavi ar zot prop erer;
apre sa, zot ankoler kont LESEGNER.
4Dimoun ris, touletan gagn boukou nouvo kamarad;
dimoun pov perdi so sel kamarad.
5Enn zour, fos temwin pou konn kondanasion;
manter pou gagn so pinision.
6Setaki oule gagn faver enn dimoun bon leker;
tou dimoun kamarad ar kikenn ki zenere.
7Si dimoun mizer gagn rezete par so prop frer,
zize aster kouma so bann kamarad pou fer ar li!
Li fer tou pou koz ar zot, me so parol tom dan dilo.
8Aprann gagn lasazes e to pou viv ere;
viv ek disernman e to pou prospere.
9Enn zour, fos temwin pou gagn seki li merite;
bann manter napa pou sape.
10Li drol kan enn dimoun bet viv dan lix;
me li pli drol kan enn serviter diriz so sef.
11Dimoun rezonab kontrol so koler;
kan li pardonn lezot, li gagn plis loner.
12Kan lerwa ankoler tou dimoun gagn per;
me so bonte kouma laroze ki rafresi lerb ver.
13Zanfan malelve met papa dan traka;
enn fam ki pa aret dispite, li kouma enn tiyo ki perse.
14Enn dimoun kapav erit lakaz ek larzan ar so paran;
me enn fam intelizan, li enn benediksion LESEGNER.
15Si to pares, si to kontan dormi,
pa rod manze kan vant grogne.
16Obzerv komannman Bondie e to pou viv bien;
me si to rezet so parol to pou trouv lamor.
17Kan to ed bann pov, to pe pret LESEGNER,
limem ki pou rekonpans twa.
18Koriz to zanfan kan ankor ena letan;
me dan to koler, zame pa swet so maler.
19Enn dimoun violan bizin pey konsekans;
sinon, sak fwa li pou refer so violans.
20Si to ekout bann konsey, si to dispoze pou aprann to leson,
dousma-dousma to pou vinn saz.
21Dimoun kapav fer boukou proze;
me volonte LESEGNER ki pou realize.
22Nou apresie dimoun bon ek sinser;
mil fwa to pov ki to manter.
23Respekte LESEGNER e to pou viv bien;
to pou viv an-sekirite e maler pa pou koste ar twa.
24Dimoun pares met lame dan lasiet manze,
me li tro feb pou met manze-la dan so labous.
25Koriz enn insolan, bann bet pou aprann vinn pridan;
montre enn bon dimoun so erer, li pou vinn pli intelizan.
26Zanfan ki bat so papa e rezet so mama,
li atir laont ek dezoner.
27Mo zanfan, pa aret aprann;
sinon, to pou bliye seki to deza kone.
28Pena lazistis kan fos temwin koz manti pou koulout bon dimoun.
Move dimoun nek medit lemal.
29Bann insolan pou gagn kondanasion;
bann bet pou gagn pinision.
Currently Selected:
Proverb 19: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
