Proverb 18
18
1Dimoun egois rod so prop lintere;
li ankoler kan donn li bon konsey.
2Dimoun bet pa sey konpran;
li rod montre ki li enn gran tenor.
3Pese amenn laont;
kan loner tonbe, mepri pran plas.
4Ena dimoun, zot parol profon kouma losean;
zot sazes kler kouma dilo lasours.
5Li pa korek protez koupab;
li inakseptab met inosan dan prizon.
6Parol enn bagarer atir dispit,
seki rod lager gagn rakle.
7Kan enn vantar koze, li rwinn limem;
so parol kouma enn piez pou may limem.
8Ayo palab! To kouma enn gato fondan;
to fondan dan pale, to glise, to desann.
9Enn dimoun ki pares,
li frer avek destrikter.
10 LESEGNER, li kouma enn latour bien solid;
kot li, bon dimoun gagn lape ek sekirite.
11Ena dimoun ris ki krwar zot lamone kapav protez zot,
zot panse zot rises kouma enn miray fortifie.
12Leker ki ranpli ar lorgey atir katastrof;
me limilite atir loner.
13Ekoute avan reponn,
sinon to pou pas pou enn bet e to pou onte.
14Kan to moral for, to konbat maladi;
me si to moral ba, kouma to pou manz ar li?
15Enn dimoun intelizan touletan anvi aprann;
enn saz touletan anvi ekout bon lansegnman.
16Si to anvi zwenn enn dimoun inportan,
amenn enn kado valab e laport pou ouver.
17Premie dimoun ki koze divan ziz, paret pe koz vre;
me tou sanze kan so adverser koumans kestionn li.
18Kouma pou aret enn dispit ant de dimoun ris dan lakour?
Meyer tir lakourtpay pou departaz zot.
19Pa ofans enn frer, li pou bien difisil pou to afront li apre.
Dispit ferm leker, kouma verou enn laport an-fer.
20Bon parol enn dimoun ranpli so vant;
so zoli diskour rasazie li.
21Lalang ena pouvwar, li kapav amenn lavi ouswa lamor;
si to kontan koze, fer tansion konsekans.
22Kan enn zom marye avek enn fam, li trouv so boner;
li enn benediksion LESEGNER.
23Bann pov sipliye pou gagn faver;
bann ris reponn ar koler.
24Parfwa kamarad vinn kamaron;
me enn kamarad sinser, li kapav pli serye ki frer-ser.
Currently Selected:
Proverb 18: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
