Proverb 14
14
1Enn fam ki saz pran swin so fami;
me enn fam bet detrir li ar so prop lame.
2Dimoun ki viv enn lavi onet, respekte LESEGNER;
me seki malonet mepriz li.
3Bann parol enn orgeye kouma enn baton pou bat limem;
bann parol ki enn saz protez so lavi.
4Si to pena toro pou labour later, to gardmanze res vid;
lafors enn bef fer twa gagn bon rekolt.
5Vre temwin koz laverite;
fos temwin nek konn rakont mansonz.
6Bann dimoun vantar zame pou vinn saz;
me bann ki intelizan e reflesi, zot aprann vit.
7Pa frekant bann inbesil;
dan zot parol pena nanye ki bon.
8Enn dimoun pridan ena lasazes, e li swazir bon sime;
me lafoli enn vantar amenn li dan perdision.
9Bann vantar pena laont kan zot fer pese;
me bann dimoun drwat rod pardon Bondie.
10Kan to leker dan lapenn, personn pa kone;
kan to leker dan lazwa, personn pa kas latet.
11Lakaz move dimoun fasil kraze;
me lakaz bon dimoun prospere.
12Fer atansion! Ena sime kapav paret bon,
me alafin, to kapav trouv lamor.
13Riye kapav kasiet tristes;
kan lazwa vir ledo, lasagrin asize.
14Move dimoun azir mal e zot pey konsekans;
bon dimoun fer bon aksion e zot gagn rekonpans.
15Dimoun bet, fasilman rant dan piez;
dimoun pridan get bien kot li met so lipie.
16Dimoun saz pran prekosion pou evit problem;
ti-lespri tro prese, li bes latet, li rant dan piez.
17Bann ki ankoler vit fer boukou betiz;
kan ou anbet dimoun, zot deteste ou.
18Bann bet erit zot betiz;
bann intelizan erit konesans kouma enn kouronn.
19Move dimoun pou kourbe divan bon dimoun;
bann malfeter pou dimann sarite divan laport bann dimoun drwat.
20Kan to mizer, dimoun vir ledo ar twa, mem to fami pa frekant twa.
Me kan to ris, boukou dimoun fer kamarad ar twa!
21Kan to mepriz to prosin ki gagn fin, to fer enn pese;
bienere bann ki bon anver bann pov.
22Dimoun ki ena move lintansion swiv sime perdision;
dimoun ki ena bon santiman rekolte labonte ek fidelite.
23Travay dir, e to pou gagn bien to lavi;
pas to letan palabre, e to pou res dan dife.
24Dimoun saz gagn larises kouma rekonpans;
dimoun vantar rekolte divan.
25Enn temwin sov lavi kan li koz laverite;
me li enn tret kan li dir mansonz.
26Kan nou respekte LESEGNER, nou sir nou pwin,
e nou fami viv dan sekirite.
27Respe pou LESEGNER, li enn lasours lavi;
li ed twa evit bann piez mortel.
28Enn gran popilasion fer laglwar enn lerwa;
enn lerwa san enn pep pa vo nanye.
29Si to gard to kalm, savedir to saz;
si to sap lor kal vit, savedir to bet.
30Kan to lespri trankil, to lekor bien;
me kan to zalou, maladi ronz twa andan.
31Kan fer dominer ar dimoun pov, nou insilte zot kreater;
me kan pran swin bann pov, nou onor li.
32Move dimoun pou kraze ar zot prop pese;
bon dimoun ena lasirans, mem divan lamor.
33Lasazes res dan leker enn dimoun intelizan;
me li pa prezan dan leker enn vantar.
34Lazistis fer laglwar enn pei;
linzistis fer laont enn nasion.
35Enn serviter intelizan gagn faver lerwa;
me enn serviter malonet atir so koler.
Currently Selected:
Proverb 14: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.